ព័ត៍មានទាន់​ហេតុការណ៏
Search

ប្រធាន​មន្ទីរពេទ្យ​ប្រតិបត្តិ​ស្រុក​សំពៅ​លូន​ ​​បញ្ជាក់​ពី​ មូលហេតុ​ជុំវិញ​ករណី​សិស្ស​ដួល​សន្លប់

បាត់ដំបង ៖ នៅ​វេលា​ម៉ោង១០និង៣០​នាទី ព្រឹក​ថ្ងៃទី​០៣ ខែ​ធ្នូ ឆ្នាំ​២០១៩​នេះ លោក​ប្រធាន​ប្រតិបត្តិ​នៃ​មន្ទីរពេទ្យបង្អែក​ស្រុក​សំពៅ​លូន បាន​ធ្វើការ​បកស្រាយ​អំពី​បញ្ហា​​មួយ​ចំនួន​​ ទាក់ទិន​នឹង​ករណី​សិស្ស​ដួលសន្លប់​រហូតដល់​២៥​នាក់ កាលពី​ម្សិលមិញ​នេះ។

គួរ​បញ្ជាក់ថា កាលពី​ថ្ងៃទី​០២ ខែ​ធ្នូ ឆ្នាំ​២០១៩ វេលា​ម៉ោង៧​ព្រឹក នៅ​ចំណុច​ក្នុង​បរិវេណ វិទ្យាល័យ​សំពៅ​លូន ស្ថិត​ក្នុងភូមិ​ត្រពាំង​ព្រលិត ឃុំ​សន្តិភាព ស្រុក​សំពៅ​លូន ខេត្ត​បាត់ដំបង មាន​សិស្សានុ​សិស្ស​ចំនួន​២៥​នាក់ ក្នុងនោះ​ស្រី​២៤​នាក់ បាន​ដួលសន្លប់​ជា​បន្តបន្ទាប់​នៅក្នុង​សាលា ដោយ​គេ​នៅ​មិនទាន់​ដឹង​អំពី​មូលហេតុ​នៅឡើយ។

យោងតាម​សភាព​ជាក់ស្តែង ដែល​លោកគ្រូ អ្នកគ្រូ​ បាន​សង្កេត​ឃើញ ​គឺ ដំបូង​មាន​សិស្ស​ខ្លះ​ចាប់​ផ្តើម​មាន​អាការៈ​វិល​មុខ ថប់ៗ​ផ្លូវដង្ហើម ហើយក៏​ចាប់ផ្ដើម​ទន់​ដៃ ទន់​ជើង ដួលសន្លប់​ជា​បន្តបន្ទាប់ តាម​គ្នា រហូត​មាន​ចំនួន​២៥​នាក់ ក្នុងនោះ មាន​ប្រុស​តែ​ម្នាក់​ប៉ុណ្ណោះ ទើប​នាយក​សាលា បាន​ចាត់​បញ្ជូន​ទៅកាន់​មន្ទីរពេទ្យបង្អែក​ស្រុក​សំពៅ​លូន ដើម្បី​សង្គ្រោះ​បឋម​សិន។

ភ្លាមៗ​នោះដែរ ក្រោយពី​បាន​បញ្ជូន​ទៅដល់​មន្ទីរ​ពេទ្យ និង​ដោយមាន​ការយកចិត្តទុកដាក់​ពី​ក្រុម​គ្រូពេទ្យ​ផង​នោះ សិស្សស្រី​ចំនួន៤នាក់ បាន​ធូរស្រាល ព្រមទាំង​បាន​វិលត្រឡប់​ទៅកាន់​លំនៅឋាន​វិញ ដោយឡែក​សិស្ស​ចំនួន២១​នាក់​ទៀត កំពុង​សម្រាក​ព្យាបាល​នៅក្នុង​មន្ទីរពេទ្យ​នៅឡើយ ដោយសារ​តែ​អាការៈ​នៅ​មិនទាន់​ធូរស្រាល​នៅឡើយ។

នៅ​ព្រឹក​មិញ​នេះ លោក​វេជ្ជបណ្ឌិត ចក់ សំអុល ប្រធាន​ប្រតិបត្តិ នៃ​មន្ទីរពេទ្យ​បង្អែក​ស្រុក​សំពៅ​លូន បាន​បញ្ជាក់​តាមរយៈ​ទូរស័ព្ទ​ប្រាប់​កម្ពុជា​ថ្មី​ថា ការដួលសន្លប់​ជា​បន្តបន្ទាប់​របស់​សិស្ស​នៅក្នុង​វិទ្យា​ល័យ​សំពៅ​លូន​នេះ គឺ​មកពី​កត្តា​ច្រើន​យ៉ាង​ដែល​គួបផ្សំ​គ្នា​ដូចជា ការ​ទទួល​ទាន​ចំណីអាហារ​មិន​សូវ​គ្រប់គ្រាន់ ការ​សម្រាក​បាន​តិច ដោយសារតែ​បច្ចុប្បន្ន​សិស្ស​ម្នាក់ៗ​ចូលចិត្ត​សម្ភារៈ​និយម ( ស្មា​ត​ហ្វូ​ន ) ដែល​ធ្វើឲ្យ​ពួកគេ​មិនសូវ​បាន​សម្រាក ដែល​ធ្វើឲ្យ​ជាតិ​កាល់ស្យូម​មានការ​ថយ​ចុះ និង កត្តា​ដែល​សំខាន់​មួយទៀត គឺ​កត្តា​ផ្លូវចិត្ត។

លោក​ប្រធាន​ប្រតិបត្តិ​បាន​សង្កត់ធ្ងន់​ថា យោងទៅលើ​កត្តា​ទាំងនេះហើយ ដែល​ធ្វើឲ្យ​សិស្ស​មាន​សភាព​ទន់ជ្រាយ អស់កម្លាំង ទន់​ដៃ ទន់​ជើង ងងឹតមុខ ហើយក៏​ដួលសន្លប់​តែម្តង ដូច្នេះហើយ​បាន​ជា​សិស្ស​ដទៃ​ឃើញ អាច​ទាញ​ផ្លូវចិត្ត​ឲ្យ​ទន់ជ្រាយ​ទៅតាម​គ្នា ក៏​ចាប់ផ្តើម​កើត​អាកា​រៈ​បែប​នេះ​ដែរ ប៉ុន្តែ​បើ​ឲ្យ​គ្រូពេទ្យ​វិនិច្ឆ័យ​ទៅលើ​រោគសញ្ញា គឺ​មិន​អាច​កំណត់​ទិសដៅ​ នៃ​ជំងឺ​នេះ​បាន​ឡើយ៕

អត្ថបទ ៖ សោ និយម​រ័ត្ន​



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114