BREAKING NEWS
Search

អ្នកនិពន្ធ ៣ រូប ហ្វេនៗស្ងើចសរសើរសរសេររឿងបែបរន្ធត់បានល្អខ្លាំង

អ្នកនិពន្ធប្រលោមលោកគ្រប់រូបមានរសនិយមសរសេរសាច់រឿងតាមបែបផ្សេងគ្នាទៅទេពកោសល្យនិងចំណូលចិត្តរៀងខ្លួន។ អ្នកនិពន្ធខ្លះអាចតាក់តែងបានសាច់រឿងច្រើនប្រភេទ រីឯខ្លះទៀតផ្ដោតលើតែមួយផ្នែកប៉ុណ្ណោះ។

ជាទូទៅប្រលោមលោកមានបែបមនោសញ្ចេតនា ភ័យរន្ធត់​ អភិនីហារ ស៊ើបអង្កេត​ និងកំប្លែងជា​ដើម។ ក្នុងនោះយើងមិនអាចប្រៀបស្នាដៃអ្នកនិពន្ធម្នាក់ទៅម្នាក់ទៀត ថាមួយណាល្អជាងមួយណាឡើយ ព្រោះពួកគាត់មានរសនិយមមិនដូចគ្នា រីឯអ្នកក៏មានការស្រឡាញ់ចូលចិត្តខុសគ្នាដែរ។

យ៉ាងណាមិញ អ្នកនិពន្ធ​ ៣ រូបនេះ ឆក់បានការគាំទ្រលើសលុបពីសំណាក់ប្រិយមិត្តស្រឡាញ់ប្រលោមលោក ដោយចាត់ទុកជាកវីដែលសរសេររឿងរន្ធត់ប្រកបដោយភាពលងបន្លាច ព្រឺខ្លាច និងពុទ្ធិសម្រាប់ដាស់តឿនអ្នកអានគ្រប់គ្នា។

១. អ្នកស្រី ម៉ីសន សុធារី

អ្នកនិពន្ធ​ ពេជ្រ បណ្ឌិត ជាម្ចាស់ស្នាដៃរឿងភ័យរន្ធត់និងអបិយជំនឿដ៏មានប្រជាប្រិយក្នុងចំណោមអ្នកសេ្នហាប្រលោមលោកនានា។ សៀវភៅដែលបានចេញផ្សាយពីអ្នកនិពន្ធរូបនេះគឺរឿង “សង្វៀនផ្លូវងងឹត” និង “អាគមបរព្រៃ” ​ព្រមទាំងប្រលោមលោកច្រើនទៀតដូចជា គារថាបុរាណ, ផ្ទះគ្រូទាយ, គំនូស៤៩, យប់ទី៣១, បាតដៃខ្មៅ។ល។ សុទ្ធសឹងបានផ្សាយក្នុង e-novel។

ពេជ្រ បណ្ឌិត ដែលជានាមប៉ាកការបស់អ្នកស្រី ម៉ីសន សុធារី ត្រូវបានអ្នកអានគ្រប់មជ្ឈដ្ឋានកោតសរសើរនិងគាំទ្រលើបទនិពន្ធផ្នែកអបិយជំនឿប្រកបដោយតថ ពុទ្ធិពីប្រពៃណីដូនតាខ្មែរ និងភាពភ័យខ្លាចគ្រប់ស្នាដៃរន្ធត់របស់កវីរូបនេះ។

២. លោក ម៉ុង ម៉ានិត

លោក ម៉ុង ម៉ានិត​ មិនត្រឹមតែជាតារាចម្រៀងល្បីល្បាញមួយរូប លោកក៏ជាអ្នកតាក់តែងចម្រៀង និងប្រលោមលោកដែលទទួលបានការគាំទ្រមិនស្ទើរនោះដែរ។ ត្បិតតែអ្នកនិពន្ធ​ ម៉ានិត មិនផ្ដោតលើការសរសេររឿងរន្ធត់តែមួយមុខ ប៉ុន្តែស្នាដៃរបស់លោកក្នុងផ្នែកនេះ មានការពេញចិត្តពេញថ្លើមថា ជារឿងដែលព្រឺខ្លាចខ្លាំងមែនទែននៅពេលបានអាន។

អ្នកនិពន្ធវ័យក្មេងរូបនេះ ជាម្ចាស់ស្នាដៃរឿង “ផ្ទះកណ្ដាលបឹង” រឿង “កូនទី៦” កាលពីឆ្នាំកន្លងទៅ។ ប្រិយមិត្តនិយមការអានចាត់ទុករឿងទាំងពីរនេះជាប្រលោកមលោកបែបរន្ធត់គួរឲ្យស្ញើចក្នុងចំណោមស្នាដៃល្អៗប្រចាំឆ្នាំ។

៣. លោក ធឿន វុទ្ធី

អ្នកនិពន្ធក្មេងខ្ចីរូបនេះ ទើបលេចមុខក្នុងវិស័យសំណេរមិនយូរប៉ុន្មានឡើយ ប៉ុន្តែដណ្ដើមបានការគាំទ្រយ៉ាងពេញទំហឹងពីសំណាក់មហាជនដែលចំណូលការអានប្រលោមលោក។

ធឿន វុទ្ធី ជាម្ចាស់ស្នាដៃខ្សែស្រឡាយភ័យរន្ធត់រឿងអារក្សខ្មៅដ៏ល្បីដែលមាន៥ចំណងជើងរួមមាន អារក្សខ្មៅ, អារក្សខ្មៅ-បណ្ដាសារ, អតីតកូនលោកម្ចាស់, បងប្អូនភ្លោះ, និងអារក្សខ្មៅ-បំណុលឈាម។  ក្រៅពីខ្សែស្រឡាយរឿងអារក្សខ្មៅ លោកក៏ម្ចាស់ស្នាដៃ យប់ថ្ងៃព្រហស្បតិ៍ ផងដែរ។

កវីជំនាន់ថ្មីរូបនេះ ត្រូវបានអ្នកស្នេហាសៀវភៅនានាសរសើរមិនដាច់ពីមាត់ថាជា អ្នកសរសេរសាច់រឿងលងបន្លាចបានល្អមិនចាញ់រៀមច្បងឡើយ និងបង្កប់សារអប់រំយ៉ាងសន្ធឹកក្នុងស្នាដៃនីមួយៗ៕

អត្ថបទ៖ សន្យា

ចុចអាន៖ ក្នុងនាមជាបុគ្គលមានឥទ្ធិពលមួយរូប អ្នកនិពន្ធគួរចៀសវាងរឿង ៦ យ៉ាងនេះ

ចុចអាន៖  រឿងមួយចំនួនដែល​ហ្វេនៗមិនចង់បានពីidol របស់ពួកគេ