បន្ទាយមានជ័យ ៖ រថយន្តដឹកជនជាតិឥណ្ឌា១ក្រុម ចូលតាមច្រកប៉ោយប៉ែត បានបើកជែង រថយន្ត១គ្រឿងទៀត ក៏រេចង្កូតធ្លាក់ទៅស្នាមភ្លោះ បណ្ដាលឲ្យមនុស្សរបួសធ្ងន់/ស្រាល៤នាក់ កាលពីវេលាម៉ោង៨យប់ ថ្ងៃទី០១ ខែធ្នូ ឆ្នាំ២០១៩ តាមបណ្ដោយផ្លូវលេខ៦ ស្ថិតក្នុងភូមិគោកលន់ ឃុំជប់វ៉ារី ស្រុកព្រះនេត្រព្រះ ខេត្តបន្ទាយមានជ័យ។
សមត្ថកិច្ចស្រុកព្រះនេត្រព្រះបានឲ្យដឹងថា អ្នកដំណើររងរបួសមាន ៖ ១-ឈ្មោះ BHAGWAT RAJARAMKUMTA GANESH ភេទប្រុស អាយុ៥៣ឆ្នាំ ជនជាតិឥណ្ឌា។ ២-ឈ្មោះ PHATANJALI UMAMAHESHWAR ភេទស្រី អាយុ២៦ឆ្នាំ ជនជាតិឥណ្ឌា។ ៣-ឈ្មោះ BAPAT SHYAM PRASAD ភេទប្រុស អាយុ២៦ឆ្នាំ ជនជាតិឥណ្ឌា។ ៤-ឈ្មោះ PRASHANTHA KAMALESHWARA ភេទប្រុស អាយុ៤៣ឆ្នាំ ជនជាតិឥណ្ឌា។
សមត្ថកិច្ចបានបញ្ជាក់ឲ្យដឹងទៀតថា នៅមុនពេលកើតហេតុ គេឃើញរថយន្ត១គ្រឿង ម៉ាក ម៉ាហ៊ីនត្រា ពណ៌ប្រផេះ ពាក់ស្លាកលេខ៣១NO១៧៤ បើកដោយ ឈ្មោះ SOPPINAKOUSHIKKEDALASARA ភេទប្រុស អាយុ២៨ឆ្នាំ ចេញពីប្រទេសថៃ ចូលមកស្រុកខ្មែរតាមច្រកអន្តរជាតិប៉ោយប៉ែត ពីលិចមកកើត។ លុះបើកមកដល់ចំណុចកើតហេតុ បានគេចនឹងរថយន្ត ដែលកំពុងឡើងជែងទិសផ្ទុយគ្នា ហើយចាំងភ្លើងហ្វ្រា ក៏បានរេចង្កូតទៅខាងឆ្វេងដៃ បណ្តាលឲ្យធ្លាក់ទៅខាងផ្លូវចូលស្នាមភ្លោះ បណ្តាលឲ្យក្រឡាប់ជាច្រើនត្រឡប់ ធ្វើឲ្យរងរបួសធ្ងន់/ស្រាល៤នាក់។
ក្រោយពីកើតហេតុហើយ អ្នករបួស ត្រូវបានគេដឹកបញ្ជូនទៅមន្ទីររ៉ូយ៉ាល់អង្គរសៀមរាប ដើម្បីសង្គ្រោះបន្ទាន់ ចំណែករថយន្ត ត្រូវបានមន្ត្រីនគរបាលចរាចរណ៍បញ្ជូនទៅរក្សាទុកនៅអធិការស្រុកព្រះនេត្រព្រះដើម្បីដោះស្រាយនៅពេលក្រោយ៕
អត្ថបទ ៖ គង្គា
