ព័ត៍មានទាន់​ហេតុការណ៏
Search

U-19 កម្ពុជា កំពុងស្ថិត​ដំណើរ​ផ្លូវ​ទៅកាន់​ការប្រកួត​ជុំ​ផ្ដាច់ព្រ័ត្រ ពាន​យុវជន​អាស៊ី​អាយុ​ក្រោម​១៩​ឆ្នាំ​

​ក្រុមបាល់ទាត់​ជម្រើសជាតិ​កម្ពុជា អាយុ​ក្រោម​១៩​ឆ្នាំ កាលពី​ថ្ងៃអាទិត្យ ទី​១០ ខែវិច្ឆិកា ឆ្នាំ​២០១៩ បាន​យកឈ្នះ U-19 ប្រ៊ុយណេ ដោយ​លទ្ធផល ៣​ទល់នឹង​០ ក្នុង​វគ្គ​ជម្រុះ​ពាន​យុវជន​អាស៊ី​អាយុ​ក្រោម ១៩​ឆ្នាំ (AFC U19 Championship 2020) ដែល​កម្ពុជា ធ្វើជា​ម្ចាស់ផ្ទះ​។

ជ័យជម្នះ​នោះ បាន​ធ្វើ​ឲ្យ​ក្រុមបាល់ទាត់​ជម្រើសជាតិ​កម្ពុជា​អាយុ​ក្រោម ១៩​ឆ្នាំ ទីបំផុត​ឈរ​នៅ​លេខ​រៀង​ទី​៥ ជា​ក្រុម​លេខ​២​ល្អ ជា​បណ្ដោះអាសន្ន នឹង​អាច​ឡើងទៅ​ជុំ​ផ្ដាច់ព្រ័ត្រ​នៃ​ពានរង្វាន់​ជើងឯក​យុវជន​អាស៊ី​អាយុ​ក្រោម ១៩​ឆ្នាំ ( AFC U19 Championship 2020 ) ប៉ុន្តែ​ត្រូវ​អង្គុយ​រង់ចាំ ការប្រកួត​ពូ​ល A បញ្ចប់​សព្វគ្រប់​សិន​។

អាច​ឈរ​នៅ​លេខ​៥ ជា​បណ្ដោះអាសន្ន ដែលជា​ចំណាត់ថ្នាក់​ចុងក្រោយ​គេ​អាចមាន​ឱកាស​ឡើងទៅ​ជុំ​បន្ត​គឺ​បន្ទាប់ពី កម្ពុជា រក​បាន ៦​ពិន្ទុ ក្នុងចំណោម ៣​ប្រកួត​ដែល​ត្រូវ​យក​មក​គណនា​ពិន្ទុ ជាមួយនឹង​គ្រាប់​បាល់ ៣​គ្រាប់​ក្នុង​ដៃ ស្រប​ពេលដែល​ក្រុម​លេខ​២ ល្អ ចំនួន ៤​ផ្សេងទៀត​ដូចជា ឡាវ​, វៀតណាម​, អ៊ូ​ប៊ី​គី​ស្ថាន ( ម្ចាស់ផ្ទះ​ជុំ​ផ្ដាច់ព្រ័ត្រ នៅ​ឆ្នាំ ២០២០ ) និង យេ​ម៉េ​ន បាន​ធានា​កៅអី ១០០​ភាគរយ​ហើយ​ទោះបីជា​លទ្ធផល​ពី​ពូ​ល A បែបណាក៏ដោយ​។

តារាង​ចំណាត់ថ្នាក់​ប្រៀបធៀប​ក្រុម​លេខ​២​ល្អ មាន​ដូចតទៅ លេខ​១ ឡាវ មាន ៧​ពិន្ទុ និង​គ្រាប់​បាល់​ចំណេញ ៧​គ្រាប់​, លេខ​២ វៀតណាម មាន ៧​ពិន្ទុ​ដូចគ្នា និង​គ្រាប់​បាល់​ចំណេញ ៦​គ្រាប់​, លេខ​៣ អ៊ូ​ប៊ី​គី​ស្ថាន មាន ៧​ពិន្ទុ និង​គ្រាប់​បាល់​ចំណេញ ៤​គ្រាប់​, លេខ​៤ យេ​ម៉េ​ន មាន ៧​ពិន្ទុ និង​គ្រាប់​បាល់​ចំណេញ ៤​គ្រាប់​, លេខ​៥ កម្ពុជា មាន ៦​ពិន្ទុ និង​គ្រាប់​បាល់​ចំនេញ ៣​គ្រាប់ ដោយឡែក​ក្រុម​លេខ​២​ល្អ ផ្សេងទៀត​ដូចជា ចិន (៦​ពិន្ទុ គ្រាប់​បាល់​ចំណេញ ១​គ្រាប់​), កូរ៉េខាងជើង (៥​ពិន្ទុ​), ហ្ស៊​កដា​នី (៥​ពិន្ទុ​), លី​បង់ (៤​ពិន្ទុ​) និង​កៀ​ស៊ី​ស្ថាន (៤​ពិន្ទុ​) មិន​មានឱកាស​គ្រប់គ្រាន់​ដើម្បី​ឈរលើ​កម្ពុជា ឡើយ​។

សូម​បញ្ជាក់​ថា ដោយសារ ២​ពូ​ល មាន ៥​ក្រុម ដូច្នេះ​ពិន្ទុ​ដែល​បានមកពី​ការប្រកួត​ជាមួយ​ក្រុម​បាត​តារាង (​លេខ​៥) មិនត្រូវ​បាន​យកមក​រាប់​បញ្ចូល​ឡើយ ជាក់ស្ដែង កម្ពុជា ដែល​រកបាន ៣​ពិន្ទុ​ជាមួយ​ក្រុម​បា​តារាង កោះ​ម៉ា​រី​ណា​ខាងជើង មិនត្រូវ​បាន​រា​ប់ប​ញ្ចូ​ល​ឡើយ​។

ចំពោះ​កម្ពុជា គឺ​នៅ​មិនទាន់​ធានា​កៅអី ១០០​ភាគរយ​នៅឡើយ​ទេ ពោលគឺ​នៅ​រង់ចាំ​តែ​លទ្ធផល​ពី​ពូល A ប៉ុណ្ណោះ​ ទើប​អាច​សម្រេច​ថា​ បែប​ណា​បាន ខណៈ​ពូ​ល A នេះ​គ្រោង​នឹង​ធ្វើ​ការប្រកួត​នៅ​ចន្លោះ​ថ្ងៃទី​២២ ដល់​ថ្ងៃ​ទី​៣០ ខែវិច្ឆិកា ឆ្នាំ​២០១៩ ដោយមាន​ក្រុម​ចំនួន​៥ រួមមាន អ៊ីរ៉ាក់​, អូ​ម៉​ង់​, ប៉ា​ឡេ​ស្ទី​ន​, គុយវែត និង​ប៉ា​គី​ស្ថាន ដែលជា​ក្រុម​មាន ៥​ពូ​ល​ដូច កម្ពុជា​។

ដូច្នេះ​នៅ​ថ្ងៃ​ទី​៣០ ខែវិច្ឆិកា ឆ្នាំ​២០១៩ ទើប​អាច​ដឹង​ថា ​កម្ពុជា អាច​មាន​ឱកាស​ឡើង​ទៅ​ជុំ​ផ្ដាច់ព្រ័ត្រ ជា​លើកដំបូង​ចាប់​តាំង​ពី​ចូលរួម​ពានរង្វាន់​នេះ​បាន ពោលគឺ​ក្រោយ​បញ្ចប់​ការប្រកួត​ទាំងស្រុង​ពី​ពូលA៕
ម៉េង ហួរ



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 012 454 575 និង 012 499 114