ជីវិតកម្សាន្ដ

ជ្រះថ្លាណាស់ ! ខេមរៈ សិរីមន្ត ចូលរួមធ្វើទានប្រគេនភួយជាង២ពាន់ដល់ព្រះសង្ឃបីវត្ត

បានផុស

៣ years មុន

នៅ

ថ្ងៃព្រហស្បតិ៍ ១២ វិច្ឆិកា ២០២០

ដោយ

ភ្នំពេញ ៖ តារាចម្រៀងលំដាប់ជួរមុខលោក ខេមរៈ សិរីមន្ត បើទោះបីជាមានការមមាញឹកជាមួយអាជីពសិល្បៈ និង ការងាររកស៊ីផ្ទាល់ខ្លួនយ៉ាងណាក្តី ក៏តារាប្រុសរូបនេះនៅតែឆ្លៀតឱកាសពេលទំនេរ ដើម្បីចូលរួមសកម្មភាពមនុស្សធម៌ជួយសង្គម និង ការធ្វើបុណ្យទានដល់ព្រះសង្ឃជាដើម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សកម្មភាពនេះ កំពុងទទួលបានការសរសើរពីសំណាក់មហាជននិងអ្នកគាំទ្រគ្រប់គ្នា។ ជាក់ស្តែងកាលពីថ្ងៃទី១១ ខែវិច្ឆិកា ឆ្នាំ២០២០ ម្សិលមិញតារាចម្រៀងលោកខេមរៈ សិរីមន្តនិងភរិយាបានរួមដំណើរជាមួយសប្បុរសជនធ្វើការនាំយកភួយប្រមាណជាង២ពាន់ភួយ ដើម្បីយកទៅប្រគេងជូនដល់ព្រះសង្ឃចំនួន៣វត្តផ្សេងគ្នានៅខេត្តកំពង់ស្ពឺនារដូវរងាឆ្នាំនេះ។ ដំណើរពេញមួយថ្ងៃរបស់លោក ខេមរៈ សិរីមន្ត និងភរិយានេះបានធ្វើឡើងតាមរយៈលោក ប៊ុត ចាន់ថា និងភរិយា។

លោក ខេមរៈ សិរីមន្ត បានថ្លែងបញ្ជាក់ឲ្យដឹងថា កាលពីម្សិលមិញលោកបានធ្វើដំណើរពេញមួយថ្ងៃក្នុងការចូលរួមធ្វើបុណ្យនិងយកភួយទៅប្រគេនជូនដល់ព្រះសង្ឃចំនួន៣វត្តផ្សេងគ្នានៅកំពង់ស្ពឺ។លោកថា ខ្ញុំពិតជារីករាយ និងជ្រះថ្លាណាស់ម្សិលមិញពេញមួយថ្ងៃខ្ញុំបានចូលរួមធ្វើបុណ្យជាមួយបងប្រុស ប៊ុត ចាន់ថា និងបងស្រីជំទាវភរិយារបស់គាត់។

តារាចម្រៀងលោក ខេមរៈ សិរីមន្ត បានបន្ថែមទៀតថា ខែរងារគាត់បានយកភួយសរុបជាង២០០០ភួយទៅប្រគល់ជូនគណៈអភិបាលខេត្តកំពង់ស្ពឺនិងប្រគេនព្រះសង្ឃបីវត្តផ្សេងៗគ្នា។ ខ្ញុំក៏បានចូលរួមថវិកាបន្តិចបន្តូចតាមសទ្ធាជាមួយគាត់ផងដែរ សូមជូនពរបងប្រុស និងបងស្រី និងក្រុមគ្រួសារមានសុខភាពល្អជោគជ័យគ្រប់ភារកិច្ចការងារ។

តាមការកត់សម្គាល់នេះ ពុំមែនទើបជាលើកទីមួយសម្រាប់តារាចម្រៀងប្រុសរបស់ផលិតកម្មហង្សមាសលោក ខេមរៈ សិរីមន្ត នោះទេដែលបានបង្ហាញពីសកម្មភាពចូលរួមចំណែកការងារសង្គមខណៈកន្លងមកតារាចម្រៀងប្រុសរូបនេះតែងតែធ្វើសកម្មភាពនេះជាបន្តបន្ទាប់រហូតទទួលបានការគាំទ្រនិងលើកសរសើរពីមហាជនគ្រប់មជ្ឈដ្ឋានផងនោះ៕
ដោយ ៖ ចាន់រ៉ា