ប៉េរូតែងតាំងប្រធានាធិបតីទីបី ក្នុងរយៈពេលមួយសប្តាហ៍

សភាប្រទេសប៉េរូបានជ្រើសរើសប្រធានាធិបតីបណ្តោះអាសន្នថ្មីដែលជាប្រធានាធិបតីទី ៣ របស់ប្រទេសក្នុងរយៈពេលមួយសប្ដាហ៍នេះ ។

សមាជិកសភាលោក Francisco Sagasti ត្រូវបានជ្រើសរើសឲ្យកាន់កាប់អំណាចនៅពេលមានភាពចលាចលផ្នែកនយោបាយសម្រាប់ប្រទេសប៉េរូ ។ ភាពច្របូកច្របល់បានចាប់ផ្តើមនៅពេលដែលសភាបណ្តេញប្រធានាធិបតីដ៏មានប្រជាប្រិយភាពលោក Martin Vizcarra ជុំវិញការចោទប្រកាន់ពីបទអំពើពុករលួយកាលពីថ្ងៃចន្ទសប្តាហ៍មុន ។

ក្រោយមកលោក Manuel Merino ដែលដឹកនាំសភាមិនផ្លូវការរបស់ប៉េរូបានចូលកាន់តំណែងជាប្រធានាធិបតីបណ្តោះអាសន្ននៅថ្ងៃបន្ទាប់ ។ ប៉ុន្តែប្រជាជនប៉េរូបានធ្វើបាតុកម្មយ៉ាងច្រើនដដែរដើម្បីធ្វើការតវ៉ាប្រឆាំងនឹងកង្វះតម្លាភាពក្នុងការចោទប្រកាន់លើលោក Vizcarra ។ លោក Merino បានលាឈប់ពីតំណែងកាលពីថ្ងៃអាទិត្យ បន្ទាប់ពីបានកាន់តំណែងបានតែ ៥ ថ្ងៃប៉ុណ្ណោះ ។

លោក Sagasti ត្រូវបានជ្រើសរើសនៅក្នុងការបោះឆ្នោតដោយសភាកាលពីថ្ងៃចន្ទ ។ គាត់ត្រូវបានគេនិយាយថាជាចំណាប់ខ្មាំងម្នាក់ដែលត្រូវបានចាប់ អំឡុងការឡោមព័ទ្ធទីស្នាក់ការផ្លូវការរបស់ឯកអគ្គរដ្ឋទូតជប៉ុនប្រចាំនៅរដ្ឋធានីលីម៉ា នាឆ្នាំ ១៩៩៦ ។

លោក Sagasti ជាសមាជិករបស់គណបក្សតែមួយជាមួយប្រធានាធិបតី Vizcarra ដែលត្រូវបានបណ្តេញចេញ ។ ប៉ុន្តែគណបក្សនេះមានសម្លេងភាគតិចប៉ុណ្ណោះនៅក្នុងសភាដែលមានតែ ៩ អាសនៈក្នុងចំណោម ១៣០ អាសនៈនៅក្នុងសភា ។

គួរបញ្ជាក់ថា ប្រទេសប៉េរូគ្រោងនឹងធ្វើការបោះឆ្នោតជ្រើសរើសប្រធានាធិបតីនៅខែមេសា ឆ្នាំ ២០២១ ខាងមុខនេះ ខណៈបេក្ខជនម្នាក់ដែលគេរំពឹងថានឹងជាប់ឆ្នោតគឺលោកស្រី Keiko Fujimori ជាកូនស្រីច្បងរបស់អតីតប្រធានាធិបតី Alberto Fujimori ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កាន់តំណែងមិនដល់មួយសប្តាហ៍ផង ប្រធានាធិបតីប៉េរូចុះចេញវិញ

ចុចអាន ៖ ប៉ូលិសប៉េរូប្រើឧស្ម័នបង្ហូរទឹកភ្នែកដើម្បីបង្ក្រាបក្រុមបាតុករ ក្រោយមានការតវ៉ាជាបន្តបន្ទាប់