វេជ្ជបណ្ឌិតជប៉ុនជឿជាក់ថា ថ្នាំ Remdesivir មានប្រសិទ្ធិភាពព្យាបាលអ្នកជំងឺកូវីដ

វេជ្ជបណ្ឌិតជនជាតិជប៉ុនជំនាញខាងផ្លូវដង្ហើមនិយាយថា គាត់ជឿថា ថ្នាំព្យាបាលប្រឆាំងវីរុស Remdesivir មានប្រសិទ្ធភាពសម្រាប់អ្នកជំងឺកូវីដ ១៩ ធ្ងន់ធ្ងរ ។

លោក Izumo Takehiro នៅមជ្ឈមណ្ឌលវេជ្ជសាស្រ្តកាកបាទក្រហមជប៉ុនក្នុងទីក្រុងតូក្យូនិយាយថា លោកបានប្រើថ្នាំ Remdesivir លើការព្យាបាលអ្នកជំងឺកូវីដ ១៩ ធ្ងន់ធ្ងរប្រហែល ៤០ នាក់ចាប់តាំងពីរដ្ឋាភិបាលជប៉ុនបានផ្តល់ការយល់ព្រមឲ្យប្រើថ្នាំនេះ ។

លោក Izumo បាននិយាយថា លោកជឿជាក់ថា ថ្នាំនេះជួយបង្កើនអត្រារស់រានមានជីវិតរបស់អ្នកជំងឺ និងជួយឲ្យអ្នកជំងឺដកដង្ហើមដោយមិនចាំបាច់ប្រើបំពង់ជំនួយខ្យល់ដកដង្ហើម ។

គាត់ក៏និយាយដែរថា អង្គការសុខភាពពិភពលោក (WHO) ប្រហែលជាបដិសេធមិនណែនាំថ្នាំមួយនេះនោះទេ ពីព្រោះវាថ្លៃណាស់ដែលត្រូវចំណាយប្រហែល ២,៤០០ ដុល្លារសម្រាប់អ្នកជំងឺម្នាក់ ។ លោកនិយាយថា ប៉ុន្តែគាត់ជឿជាក់ថា ជីវិតគឺមានតម្លៃជាងលុយ ។

លោកបន្ថែមថា មន្ទីរពេទ្យរបស់លោកនឹងបន្តប្រើប្រាស់ថ្នាំនេះទៀតរហូតដល់មានការព្យាបាលជាក់លាក់មួយទៀត ៕

ប្រែសម្រួលដោយ ៖ ជីវ័ន្ត

ប្រភព ៖ NHK