សមាជិកសភាគណបក្សប្រឆាំងថៃ អារ ដៃខ្លួនឯងនៅក្នុងសភាដើម្បីតវ៉ាប្រឆាំងនឹងការបង្ក្រាបលើក្រុមអ្នកគាំទ្រលទ្ធិប្រជាធិបតេយ្យ – Kampuchea Thmey Daily
Connect with us
ធនាគារ ហត្ថា

ព័ត៌មានអន្ដរជាតិ

សមាជិកសភាគណបក្សប្រឆាំងថៃ អារ ដៃខ្លួនឯងនៅក្នុងសភាដើម្បីតវ៉ាប្រឆាំងនឹងការបង្ក្រាបលើក្រុមអ្នកគាំទ្រលទ្ធិប្រជាធិបតេយ្យ

Published

on

កាលពីថ្ងៃអង្គារ ទី២៧ ខែតុលា សមាជិកសភានៃគណបក្សភឿថៃលោក Visan Techatirawat បានអារដៃខ្លួនឯងដោយកាំបិតនៅឯសភា នៅក្នុងអ្វីដែលគាត់បាននិយាយថាជាការតវ៉ាប្រឆាំងនឹងចំណាត់ការរបស់រដ្ឋាភិបាលលើសកម្មជនគាំទ្រលទ្ធិប្រជាធិបតេយ្យវ័យក្មេង ។

លោក Visan បានអារដៃឆ្វេងរបស់លោកចំនួន ៣ ដងដោយកាំបិតចិតផ្លែឈើក្នុងអំឡុងពេលថ្ងៃទី ២ នៃការជជែកដេញដោលពិសេសអំពីវិបត្តិនយោបាយ ។ ក្រោយមកគាត់បានពន្យល់ថា គាត់មិនចង់ឲ្យនិស្សិតត្រូវបង្ហូរឈាមនោះទេ ។

លោកបានបន្ថែមថា លោកធ្លាប់ជាសមាជិកសភាតាំងពីឆ្នាំ ១៩៨៦ ប៉ុន្តែនៅតែមិនទាន់រកវិធីដោះស្រាយបញ្ហានយោបាយបាននៅឡើយទេ ហើយលោកក៏មិនចង់ឃើញភាពចលាចលប្រែទៅជាបង្ហូរឈាមដែរ ។

ទន្ទឹមនោះសមាជិកសភាដទៃទៀតបានបង្ហាញពីការតក់ស្លុត និងស្រងាកចិត្ត នៅពេលដែលលោក Visan បានអារដៃខ្លួនឯងនៅក្នុងសភាបែបនេះ ។ ក្រោយមកលោក Chuan Leekpai ប្រធានសភាបានហៅបុគ្គលិកពេទ្យឲ្យជួយលោក Visan មុនពេលលោកត្រូវបានបញ្ជូនទៅមន្ទីរពេទ្យដើម្បីព្យាបាល ។

ក្រោយមកគាត់បានសុំទោសសមាជិកសភាចំពោះការភ្ញាក់ផ្អើលដែលបណ្តាលមកពីសកម្មភាពរបស់គាត់ ។ លោកបានពន្យល់ថា លោកបានធ្វើបែបនេះដើម្បីប្រឆាំងនឹងការបង្ក្រាបរបស់រដ្ឋាភិបាលលើបាតុកម្មអហិង្សានៅទីក្រុងបាងកកនៅថ្ងៃទី ១៧ ខែតុលា នៅពេលដែលប៉ូលិសបានប្រើកាណុងបាញ់ទឹកដែលពោរពេញទៅដោយសារធាតុគីមីទៅលើក្រុមអ្នកតវ៉ា ។

លោកបាននិយាយថា លោកនាយករដ្ឋមន្ត្រី ប្រាយុទ្ធ គួរតែស្តាប់ការទាមទាររបស់ក្រុមអ្នកតវ៉ាជាជាងប្រើកម្លាំងប្រឆាំងនឹងពួកគេ ។ លោកបានបន្ថែមថា គាត់បានខ្ចីកាំបិតពីអ្នកបម្រើនៅឯសភា ហើយមិនបានប្រាប់ក្រុមគ្រួសាររបស់គាត់អំពីផែនការអារដៃខ្លួនឯងនេះនោះទេ ។

គួររម្លឹកផងដែរ អស់រយៈពេល ៤ ខែកន្លងមកនេះការធ្វើបាតុកម្មគាំទ្រលទ្ធិប្រជាធិបតេយ្យនៅទីក្រុងបាងកក និងបណ្តាខេត្តនានាបានអំពាវនាវឲ្យលោកនាយករដ្ឋមន្រ្តី ប្រាយុទ្ធ ចាន់អូចា លាលែងពីតំណែង ផ្លាស់ប្តូររដ្ឋធម្មនុញ្ញ និងការធ្វើកំណែទម្រង់របបរាជាធិបតេយ្យ ៕

ប្រែសម្រួលដោយ ៖ ជីវ័ន្ត

ប្រភព ៖ The Nation Thailand

ចុចអាន ៖ ក្រុមបាតុករថៃដង្ហែញ្ញត្តិទៅកាន់ស្ថានទូតអាល្លឺម៉ង់ដើម្បីស្នើឲ្យស៊ើបអង្កេតលើព្រះមហាក្សត្រ

ចុចអាន ៖ ប៉ូលិសចាប់ខ្លួនបុរសម្នាក់ពីបទលួចខោអាវទ្រនាប់របស់ស្រីៗ

Advertisement

ចុច Like Facebook កម្ពុជាថ្មី

Advertisement

ព័ត៌មានពេញនិយម