ចំនួនអ្នកស្លាប់ដោយសារព្យុះ Eta នៅប្រទេសហ្គាតេម៉ាឡាកើនជិតដល់ ១៥០ នាក់

ប្រធានាធិបតីប្រទេសហ្គាតេម៉ាឡាលោក Alejandro Giammattei បាននិយាយកាលពីថ្ងៃសុក្រថា ចំនួនអ្នកស្លាប់ដោយសារភ្លៀងធ្លាក់ខ្លាំងដែលបណ្តាលមកពីព្យុះត្រូពិក Eta អាចឈានដល់ ១៥០ នាក់ ។

នៅក្នុងសន្និសីទកាសែតលោក Giammattei បាននិយាយថា ក្រុមជួយសង្គ្រោះបានចូលភូមិ Queja ក្នុងតំបន់ Alta Verapaz កាលពីថ្ងៃសុក្រជាទីដែលកងទ័ពហ្គាតេម៉ាឡាបានរាយការណ៍ថា ផ្ទះប្រហែល ១៥០ ខ្នងត្រូវបានកប់ដោយការរអិលបាក់ដី ។

លោកប្រធានាធិបតីបាននិយាយថា “ដោយផ្អែកលើតួលេខក្រៅផ្លូវការ ក្នុងចំណោមអ្នកស្លាប់ និងបាត់ខ្លួនបង្ហាញយើងថាមានអ្នកស្លាប់ចំនួន ១៥០ នាក់ ខណៈយើងមិនទាន់មានការបញ្ជាក់ឲ្យបានពេញលេញណាមួយនៅឡើយទេ” ។

លោក Giammattei បានបន្ថែមទៀតថា ប្រជាជនជាង ៧៥,០០០ នាក់បានរងផលប៉ះពាល់ដោយផ្ទាល់ពីការបាក់ដី និងទឹកជំនន់ដោយសារព្យុះទីហ្វុង Eta នេះ ។

លោកប្រធានាធិបតីបាននិយាយថា ក្រុមមនុស្សជាច្រើននៅក្នុងតំបន់ដែលរងផលប៉ះពាល់បានបដិសេធមិនចាកចេញពីផ្ទះរបស់ពួកគេ ទោះបីមានទឹកជំនន់ធ្ងន់ធ្ងរក៏ដោយ ៕

ប្រែសម្រួលដោយ ៖ ជីវ័ន្ត

ប្រភព ៖ XINHUA