អគារ​រដ្ឋាភិបាល​អ៊ុយក្រែន រង​ការ​វាយប្រហារ​តាម​អាកាស​ពី​រុស្ស៊ី

រុស្ស៊ី បាន​បើក​ការវាយប្រហារតាមអាកាសដ៏ធំបំផុតរបស់ខ្លួនលើអ៊ុយក្រែន ដោយបានបាញ់បង្ហោះដ្រូន និងមីស៊ីល​ជាង ៨០០​គ្រាប់/គ្រឿង​​កាលពីថ្ងៃអាទិត្យ​ទី​៧​ខែ​កញ្ញា សម្លាប់មនុស្សយ៉ាងហោចណាស់ ៤​នាក់ និងបំផ្លាញ​ទីស្នាក់ការរដ្ឋាភិបាលអ៊ុយក្រែននៅកណ្តាលរដ្ឋធានី​កៀវ​ជាលើកដំបូង។

កងទ័ពអាកាសរបស់អ៊ុយក្រែន បាននិយាយថា រុស្ស៊ីបានបាញ់ដ្រូន​ និង​ដ្រូន​បញ្ឆោត​ចំនួន ៨១០​គ្រឿង រួមជាមួយនឹងមីស៊ីល ១៣​គ្រាប់។ អ៊ុយក្រែន​ត្រូវបានគេរាយការណ៍ថាបានបាញ់ទម្លាក់ដ្រូន​ចំនួន ៧៤៦​គ្រឿង និង​មីស៊ីល​ ៤​គ្រាប់ ខណៈ​​​ទីតាំងចំនួន៣៣​ រង​ការ​វាយប្រហារ​នៅទូទាំងប្រទេស។

នៅទីក្រុងកៀវ មនុស្ស២​នាក់ ក្នុង​នោះ​មាន​ម្តាយ និងកូនអាយុ ៣​ខែរបស់គាត់ ត្រូវបានសម្លាប់នៅពេលដែលដ្រូន​បានធ្លាក់ចូលទៅក្នុងអគារលំនៅដ្ឋាន។ យ៉ាង​ហោច​ណាស់ ២០​នាក់​ផ្សេង​ទៀត​បាន​រង​របួស។

ផ្សែងហុយហុយចេញពីដំបូលអគារខុទ្ទកាល័យអ៊ុយក្រែនបន្ទាប់ពីការវាយប្រហារ​នេះ។ នាយករដ្ឋមន្ត្រីលោកស្រី Yulia Svyrydenko បានបញ្ជាក់ពីការវាយប្រហារនេះ ដោយនិយាយថា ភ្លើងឆេះ​​ប្រមាណ ៨០០ម៉ែត្រការ៉េ ត្រូវបានពន្លត់នៅខាងក្នុងទីស្នាក់ការកណ្តាលរដ្ឋាភិបាល។

លោកស្រី Svyrydenko បាននិយាយនៅក្នុងសេចក្តីថ្លែងការណ៍ជាវីដេអូមួយពីខាងក្នុងអគារដែលរងការខូចខាតថា «ជាលើកដំបូងចាប់តាំងពីការចាប់ផ្តើមនៃការលុកលុយ​ពេញលេញ រុស្ស៊ីបានវាយប្រហារទីស្នាក់ការរដ្ឋាភិបាលរបស់យើងនៅកណ្តាលទីក្រុងកៀវ។ វាហាក់ដូចជារុស្ស៊ីមិនចង់​ស្វែងរកសន្តិភាព ហើយមិនទាន់ត្រៀមខ្លួនសម្រាប់ការចរចារ។ យើងអំពាវនាវ​ឲ្យ​ដៃគូរបស់យើងជួយការ​ពារ​ផ្ទៃ​មេឃរបស់យើង»។

ចំណែក​ឯ​ប្រធានាធិបតីអ៊ុយក្រែនលោក វ៉ូឡូឌីមៀរ ហ្សេលេនស្គី បានថ្កោលទោសការវាយប្រហារនេះថាជា «ឧក្រិដ្ឋកម្មដោយចេតនា» ហើយបានជំរុញ​ឲ្យ​មានការដាក់ទណ្ឌកម្មកាន់តែតឹងរ៉ឹង និងការគាំទ្រផ្នែកការពារដែនអាកាស។ លោក​ប្រាប់​ថា «ការសម្លាប់បែបនេះនៅពេលនេះ ពេលដែលការទូតពិតប្រាកដអាចចាប់ផ្តើមតាំងពីយូរយារណាស់មកហើយ គឺជាការអូសបន្លាយនៃសង្រ្គាម»។

នាយករដ្ឋមន្ត្រីអង់គ្លេសលោក Keir Starmer ក៏បានបរិហារការវាយប្រហារនេះផងដែរ ដោយហៅការវាយប្រហារនេះថា «កំសាក» និង​ជា​ព័ស្តុតាងដែលបង្ហាញ​ថា «លោក ពូទីន ជឿថា គាត់អាចធ្វើសកម្មភាពដោយនិទណ្ឌភាព»។

ក្រសួងការពារជាតិរុស្ស៊ី បានអះអាងថា ខ្លួនបានកំណត់គោលដៅទីតាំងដំឡើងដ្រូន មូលដ្ឋានទ័ពអាកាស និងមជ្ឈមណ្ឌលដឹកជញ្ជូន ដោយទទូចថាមិនមែន​ជា​កន្លែងជនស៊ីវិល ឬរដ្ឋាភិបាល​ឡើយ។ ទន្ទឹម​នោះ រុស្ស៊ី​ក៏បានរាយការណ៍ផងដែរអំពីការបាញ់ទម្លាក់ដ្រូន​របស់អ៊ុយក្រែនចំនួន ១០០​គ្រឿង​នៅទូទាំងប្រទេសរុស្ស៊ី តំបន់​គ្រីមៀរ និងសមុទ្រ Azov។

លើសពីនេះទៀត ទីក្រុងមូស្គូបានបញ្ជាក់​ថា កងកម្លាំងរបស់ខ្លួនបានដណ្តើមយកភូមិ Khoroshe ក្នុងតំបន់ Dnipropetrovsk របស់អ៊ុយក្រែន ទោះបីជាទីក្រុងកៀវ​មិនបានបញ្ជាក់ពីការអះអាងនេះក៏ដោយ។

ការវាយប្រហារកាលពីថ្ងៃអាទិត្យ គឺជាការវាយប្រហារទ្រង់ទ្រាយធំលើកទីពីរលើទីក្រុងកៀវ​ ក្នុងរយៈពេលពីរសប្តាហ៍ ដែលបានកើតឡើងនៅពេលដែលក្តីសង្ឃឹមសម្រាប់កិច្ចចរចាសន្តិភាពបានធ្លាក់ចុះ។ លោក ហ្សេលេនស្គី បានបង្ហាញពីការត្រៀមខ្លួនដើម្បីជួបជាមួយលោក ពូទីន សម្រាប់ការចរចា ប៉ុន្តែទទូចថា​ត្រូវការសម្ពាធខ្លាំងជាងនេះពីលោកខាងលិច។ រុស្ស៊ីអះអាងថា កិច្ចប្រជុំកំពូលណាមួយត្រូវតែធ្វើឡើងដោយ​ការពិភាក្សាថ្នាក់ក្រោមសិន ហើយបានច្រានចោលសំណើសម្រាប់កងទ័ពបរទេសដើម្បីផ្តល់ការធានាសន្តិសុខក្រោយសង្គ្រាមសម្រាប់អ៊ុយក្រែន៕

ដោយ៖ ឈាង