លោកស្រី ឱ វណ្ណឌីន៖ ករណីឆ្លងជំងឺកូវីដ-១៩បច្ចុប្បន្ន កំពុងស្ថិតក្នុងស្ថានភាពគួរឱ្យ​ព្រួយបារម្ភខ្លាំងមែនទែន

រដ្ឋលេខាធិការក្រសួងសុខាភិបាល​ មានប្រសាសន៍ប្រាប់ កម្ពុជាថ្មី នៅរសៀលថ្ងៃទី២៨ ខែឧសភានេះថា ថ្វីដ្បិតតែបច្ចុប្បន្នរាជធានីភ្នំពេញត្រូវបានបញ្ចប់ការបិទខ្ទប់ ក៏ដូចជាការរួមតូចនៃតំបន់លឿងទុំ និងលែងមានតំបន់ក្រហមក៏ពិតមែន ប៉ុន្តែជារួមករណីឆ្លងថ្មីនៅតែរកឃើញជារៀងរាល់ថ្ងៃ និងមានចំនួនខ្ពស់។

លោកស្រី ឱ វណ្ណឌីន​ រដ្ឋលេខាធិការក្រសួងសុខាភិបាល​  ប្រធាន​គណ:កម្មការចំពោះកិច្ចចាក់វ៉ាក់សាំងកូវីដ-១៩​ និងជាអ្នកនាំពាក្យក្រសួងសុខាភិបាលនៃព្រះរាជាណាចក្រកម្ពុជា បញ្ជាក់ថា ករណីឆ្លងជំងឺកូវីដ-១៩ក្នុងខែឧសភានេះ មានកម្រិតខ្ពស់ជាងករណីឆ្លងសរុបនៅខែមេសា (ខែមុន) ទៅទៀត ហើយចំនួនឆ្លងមានការឡើងចុះៗ មិនមែនចុះរហូតនោះទេ។

លោកស្រី លើកឡើងថា ការចម្លងមេរោគកូវីដ១៩ នៅតែខ្លាំងក្លានៅឡើយ ​​​ដែលមិនទាន់មានសញ្ញាណាបង្ហាញថា វាមានការចុះថមថយនៅឡើយទេ។

លោកស្រី ឱ វណ្ណឌីន មានប្រសាសន៍ថា៖ “អ៊ីចឹងសម្រាប់ខ្ញុំផ្ទាល់ ស្ថានភាព គឺស្ថិតក្នុងស្ថានភាពគួរឱ្យព្រួយបារម្ភខ្លាំងមែនទែន និងសុំឱ្យប្រជាពលរដ្ឋបន្តនូវការយកចិត្តទុកដាក់ ការប្រុងប្រយ័ត្នខ្ពស់ អនុវត្ត៣កុំ ៣ការពារ”។

លោកស្រីបានសំណូមប្រជាពលរដ្ឋគិតគូរឱ្យបានដិតដល់ក្នុងការបង្ការខ្លួនកុំឱ្យឆ្លងមេរោគ និងការពារកុំចម្លងមេរោគចូលគ្រួសារ និងសហគមន៍ ជាក់ស្ដែងដូចករណីកម្មកររោងចក្រនៅខេត្តស្វាយរៀងកាលពីម្សិលមិញ គឺជាសកម្មភាពនេះមានហានិភ័យខ្ពស់។ លោកស្រីបញ្ជាក់ថា បើខ្លាច គឺត្រូវបង្ការ និងការពារខ្លួន ព្រមទាំងអនុវត្តតាមអនុសាសន៍សម្ដេចតេជោ គឺ ៣កុំ៣ការពារ។

គួរបញ្ជាក់ថា ក្រសួងសុខាភិបាល នៅថ្ងៃទី ២៨ ខែឧសភានេះ បានប្រកាសរកឃើញ ករណីវិជ្ជមានជំងឺកូវីដ១៩ ចំនួន ៥៩៩ នាក់ និងជាសះស្បើយ ៥០២ នាក់ និងស្លាប់ចំនួន ២ នាក់។

ករណីឆ្លងជំងឺកូវីដ១៩ នៅកម្ពុជា បានកើនឡើងដល់ ២៨ ២៣៧ និងជាសះស្បើយសរុប ២០ ៩០០ នាក់ ព្រមទាំងអ្នកស្លាប់សរុបកើនដល់ ១៩៦ នាក់៕

អត្ថបទ៖ ច័ន្ទ វីរៈ

សូមស្ដាប់ប្រសាសន៍របស់ លោកស្រី ឱ វណ្ណឌីន៖ ករណីឆ្លងជំងឺកូវីដ-១៩បច្ចុប្បន្ន កំពុងស្ថិតក្នុងស្ថានភាពគួរឱ្យ​ព្រួយបារម្ភខ្លាំងមែនទែន