ព័ត៍មានទាន់​ហេតុការណ៏
Search
T-04-18-15-g-full

ប្រទេស​ហ្គី​ណេ រកឃើញ​ការឆ្លង Ebola ថ្មី​៩​ករណី នៅក្បែរ​ព្រំដែន​ជាប់​ជាមួយ​សៀ​រ៉ា​ឡេ​អូន​

អាជ្ញាធរ​ប្រទេស​ហ្គី​ណេ បាន​អះអាងថា មាន​ករណី​ឆ្លង Ebola ថ្មី​ចំនួន​៩​ករណី​នៅ​តំបន់ Forecariah ភាគ​និរតី​ក្បែរ​ព្រំដែន​ជាប់​ជាមួយ​ប្រទេស​សៀ​រ៉ា​ឡេ​អូន ជា​តំបន់​ដែល​រង​ការចម្លង​យ៉ាង​ធ្ងន់​បំផុត​កាលពី​រយៈពេល​មួយឆ្នាំ​កន្លងមក​។ មន្ដ្រីជាន់ខ្ពស់​មួយរូប​ផ្នែក​សុខាភិបាល​បាន​និយាយ​ដូច្នេះ​កាលពី​ថ្ងៃ​ព្រហស្បតិ៍​។​

អាជ្ញាធរ​បាន​បើក​យុទ្ធនាការ​មួយរយៈ​ពេល​៤​ថ្ងៃ​ដើម្បី​ឆែកឆេរ​ពី​ផ្ទះមួយ​ទៅផ្ទះ​មួយ​នៅ​តំបន់​Forecariah នេះ​កាលពី​ថ្ងៃទី​១២ ខែ​មេ​សា ដើម្បី​រក​ឲ្យ​ឃើញ និង​ស​បញ្ជាក់ថា សហគមន៍​ចូលរួម​នៅក្នុង​ការផ្ដល់​របាយការណ៍​ករណី​សង្ស័យ ពី Ebola នោះ ហើយ​នេះ​ក៏​ជា​ចំណែក​មួយ​នៃ​ការដាក់​ឲ្យ​ស្ថិតនៅ​ដាច់ដោយឡែក​រយៈពេល​៤៥​ថ្ងៃ​ផងដែរ​ចំពោះ​អ្នក​ជាប់​សង្ស័យ​នៅ​តំបន់​អាហ្វ្រិក​ខាងលិច​នោះ​។​

​ ​ជំងឺ​រាតត្បាត Ebola បានកើត​មានមក​នៅ​តំបន់​ព្រៃ​ជ្រៅ​ស្ថិតនៅ​ភាគ​អាគ្នេយ៍​នៃ​ប្រទេស​ហ្គី​ណេ កាលពី​ខែធ្នូ ឆ្នាំ​២០១៣ ដែល​ត្រូវបាន​គេ​ជឿជាក់ថា បានសម្លាប់​មនុស្ស​អស់​ដល់​ទៅ​ជាង​១០,៦០០​នាក់ រួមទាំង​ចម្លង​មនុស្ស​ប្រមាណ​២៥,៧៩១​នាក់ នៅ​ប្រទេស​ហ្គី​ណេ សៀ​រ៉ា​ឡេ​អូន និង​នៅ​លី​បេ​រី​យ៉ា នេះ​បើ​យោងតាម​ការ​ឲ្យ​ដឹង​ពី​អង្គការ​សុខភាព​ពិភពលោក WHO​។​

​ ​នៅក្នុង​របាយការណ៍​ប្រចាំ​សប្ដាហ៍​ចុងក្រោយបង្អស់​កាលពី​ថ្ងៃ​ពុធ WHO បាន​និយាយថា មាន​ចំនួន​សរុប​៣៧​ករណី​ថ្មី​ដែល​ត្រូវបាន​អះអាងថា ឆ្លង​វីរុស​មរណៈ Ebola ត្រូវបាន​រាយការណ៍​ក្នុង​សប្ដាហ៍​គិត​មកដល់​ថ្ងៃទី​០២ ខែមេសា គឺ​កើនឡើង​៣០​ករណី បើ​ប្រៀបធៀប​ទៅនឹង​សប្ដាហ៍​មុន​។ សរុប​មាន​២៨​ករណី​នៅ​ហ្គី​ណេ ៩​ករណី​នៅ​សៀ​រ៉ា​ឡេ​អូន និង​សូន្យ​ករណី​នៅ​លី​បេ​រី​យ៉ា​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684