អាជ្ញាធរបឹងកក់ ឈូសឆាយដី រៀបចំលំនៅដ្ឋានបណ្ដោះ​អាសន្ន ជូនពលរដ្ឋ

អាជ្ញាធរខណ្ឌទួលគោកបានធ្វើការឈូសឆាយដី ដើម្បីរៀបចំលំនៅដ្ឋានបណ្ដោះអាសន្នជូនបងប្អូនប្រជាពលរដ្ឋរស់នៅភូមិទី ១៤ សង្កាត់បឹងកក់ទី១ ខណៈដែលមន្ត្រីជំនាញរៀបចំស្ថាបនាកែលម្អអាងស្តុកទឹក និងអភិវឌ្ឍន៍ហេដ្ឋារចនាសម្ព័ន្ធ ផ្លូវ លូប្រឡាយតាមប្លង់គោលរបស់រដ្ឋបាលរាជធានីភ្នំពេញ នៅស្ថានីយបូមទឹកទួលគោកទី២។

មន្ត្រីរដ្ឋបាលខណ្ឌទួលគោកបានឱ្យដឹងថា នៅថ្ងៃទី២៦វិច្ឆិកានេះ លោកជា ពិសី អភិបាលខណ្ឌទួលគោកនិងសហការីបានចុះទៅពិនិត្យមើលទីតាំងការឈូសឆាយដីនៅភូមិទី ១៤ សង្កាត់បឹងកក់ទី១ ដោយក្រុមការងារបានអនុវត្ត ២ ថ្ងៃមកហើយ ដើម្បីរៀបចំជាលំនៅដ្ឋានបណ្ដោះអាសន្នជូនបងប្អូនប្រជាពលរដ្ឋ ខណៈដែលក្រុមការងារយកទីតាំងនោះធ្វើការរៀបចំស្ថាបនាកែលម្អអាងស្តុកទឹក អភិវឌ្ឍន៍ហេដ្ឋារចនាសម្ព័ន្ធផ្លូវលូប្រឡាយតាមប្លង់គោលរបស់រដ្ឋបាលរាជធានីភ្នំពេញ នៅស្ថានីយបូមទឹកទួលគោកទី២ ក្នុងសង្កាត់បឹងកក់ទី១ ខណ្ឌទួលគោក រាជធានីភ្នំពេញ៕

អត្ថបទៈ ស្រីរ័ត្ន