ព័ត៍មានទាន់​ហេតុការណ៏
Search
Nita-16-A-57-Full

អាមេរិក ​និង​រុស្ស៊ី​ឈាន​ដល់​កិច្ចព្រមព្រៀង​លើ​វិធានការ​រឹងមាំ​ដើម្បី​ជួយសង្គ្រោះ​បទ​ឈប់​បាញ់​ស៊ី​រី​

រដ្ឋមន្ត្រីការបរទេស​អាមេរិក​លោក John Kerry និង​សម​ភាគី​រុស្ស៊ី​គឺ​លោក Sergei Lavrov បាន​និយាយ​កាលពី​ថ្ងៃ​សុក្រ​ថា​ពួកគេ​បាន​យល់ព្រម​លើ “​វិធានការ​រឹងមាំ​” ដើម្បី​ស្រោចស្រង់​បទ​ឈប់​បាញ់​ដែល​រង​បរាជ័យ​មួយ​និង​កម្ចាត់​ក្រុម​ជី​ហាដ​និយម​នៅ​ក្នុង​ប្រទេស​ស៊ី​រី។

អ្នកការទូត​កំពូល​ទាំងពីរ​បាន​បញ្ចប់​កិច្ចចរចា​រយៈពេល​១២​ម៉ោង​ដោយ​និយាយថា ពួកគេ​បាន​ព្រមព្រៀងគ្នា​លើ​មធ្យោបាយ​ឆ្ពោះ​ទៅមុខ​ប៉ុន្តែ​លោក Kerry បាន​សង្កត់ធ្ងន់ថា សេចក្តីលម្អិត​នៃ​កិច្ចព្រមព្រៀង​នេះ​នឹង​មិន​ត្រូវ​បាន​ផ្សព្វផ្សាយ​ជា​សាធារណៈ​ទេ​ដើម្បី​អនុញ្ញាត​ការបង្កើត​សន្តិភាព​ត្រូវ​បន្ត។

ថ្លែង​នៅ​ក្បែរ​លោក Lavrov លោក Kerry បាន​ប្រាប់​ក្រុម​អ្នកកាសែត​ថា ប្រសិនបើ​វិធានការ​ ត្រូវ​បាន​អនុវត្ត​ក្នុង​ជំនឿ​ដ៏​ល្អ​នោះ ពួកគេ​នឹង​អាច​ជួយ​ស្តារ​បទ​ឈប់​បាញ់​ឡើងវិញ បន្ធូរបន្ថយ​អំពើហិង្សា​និង​បង្កើត​ពេល​សម្រាប់​កិច្ចចរចា​និង​ការ​ផ្លាស់ប្តូរ​នយោបាយ​ដ៏​គួរ​ឲ្យ​ជឿ​ទុកចិត្ត​មួយ។

សហរដ្ឋអាមេរិក​បាន​អួត​អំពី​សំណើ​សម្រាប់​កិច្ច​សហប្រតិបត្តិការ​យោធា​កាន់តែ​ជិតស្និត​រវាង​សហ​រដ្ឋ​អាមេរិក​និង​រុស្ស៊ី​នៅ​ក្នុង​ប្រទេស​ស៊ី​រី​ប្រឆាំងនឹង​ពួក​យុទ្ធជន​អាល់​កៃ​ដា​និង​រដ្ឋ​ឥស្លាម ប៉ុន្តែ​រុស្ស៊ី​ហាក់​ដូចជា​នៅ​ស្ងៀម​ចំពោះ​គំនិត​នេះ។

ជាការ​ដោះដូរ ទីក្រុង​មូ​ស្គូ​នឹង​ត្រូវ​បាន​តម្រូវ​ឲ្យ​ដាក់​សម្ពាធ​លើ​សម្ព័ន្ធមិត្ត​សំខាន់​ស៊ី​រី​គឺ​លោក Bashar al-Assad ឲ្យ​បញ្ឈប់​ការវាយប្រហារ​លើ​ជន​ស៊ីវិល​និង​ក្រុម​ប្រឆាំង​និយម​កណ្តាល​។ នៅ​ព្រឹក​ថ្ងៃ​សុក្រ​លោក Kerry និង​លោក Lavrov បាន​ធ្វើ​ការ​គោរព​ដល់​ជនរងគ្រោះ​នៃ​ការវាយប្រហារ​ដោយ​រថយន្ត​ក្នុង​ទីក្រុង Nice ដែល​បាន​បណ្ដាល​ឲ្យ​មនុស្ស​យ៉ាងហោចណាស់​៨៤​នាក់ ស្លាប់​។​អ្នក​ទាំងពីរ​បាន​ដាក់​ផ្កា​នៅមុខ​ស្ថានទូត​បារាំង​ក្នុង​ទីក្រុង​មូ​ស្គូ​ និង​បាន​ចុះហត្ថលេខា​លើ​សៀវភៅ​រំលែក​ទុក្ខ​មួយ​។

អ្នក​ទាំងពីរ​ក៏បាន​ចាប់ផ្ដើម​កិច្ចចរចា​របស់​ខ្លួន​ផង​ដែរ​កាលពី​ព្រឹក​ថ្ងៃ​សុក្រ​ដោយ​ធ្វើ​ពិធី​ស្មឹង​ស្មា​ធ​មួយ​នាទី​សម្រាប់​ជនរងគ្រោះ​នៃ​អ្វីដែល​លោក​ប្រធានាធិបតី​អាមេរិក Barack Obama រៀបរាប់ថា​ជាការ​វាយប្រហារ “​សោកនាដកម្ម​និង​រន្ធត់​” ខណៈ​លោក Kerry បាន​សង្កត់ធ្ងន់​ពី​សារៈសំខាន់​នៃ​ការរួបរួម​ប្រឆាំង​ទល់នឹង​ភាព​ជ្រុលនិយម​នេះ​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684