ព័ត៍មានទាន់​ហេតុការណ៏
Search
5698

លោកជំទាវ ម៉ែន សំអន ៖ សាសនា​ណា​ក៏​ដូច​សាសនា​ណា​ដែរ​ ពិតជា​មិនអាច​កាត់ផ្ដាច់​ពី​សង្គម​បានទេ​

ភ្នំពេញ ៖ សាសនា​ណា ក៏​ដូច​សាសនា​ណា​ដែរ​គឺ ពិតជា​មិនអាច​កាត់ផ្ដាច់​ពី​សង្គម​បានទេ សាសនា ជា​ការ​គ្រប់គ្រង​អារម្មណ៍ និង​ជំនឿ រីឯ​សង្គម គឺ​ការគ្រប់គ្រង​ជីវិត​រស់នៅ ហេតុនេះ​ត្រឹមតែ​ធម៌អាថ៌​សាសនា ទោះបី​ល្អឥតខ្ចោះ​យ៉ាងណា​ក៏​ដោយ ក៏​នៅតែ​មិនទាន់​គ្រប់គ្រាន់​ទេ ប្រសិន​បើ​មនុ​ស្ស​ដែល​ដឹកនាំ​សង្គម​នោះ​មិនបាន​ប្រកប ដោយ​លក្ខណៈ​សម្បត្តិ គ្រប់គ្រាន់​ទេ​នោះ​។ អត្ត​ន័យ​នេះ​បើ​តាម​ការ​បញ្ជាក់​ឲ្យ​ដឹង​ពី​លោក​ជំទាវ​ម៉ែន សំអន ឧបនាយករដ្ឋមន្ដ្រី រដ្ឋមន្ដ្រីក្រសួង​ទំនាក់ទំនង ជាមួយ​រដ្ឋសភា ព្រឹទ្ធសភា និង​អធិការកិច្ច​ក្នុង​ពេល តំណាង​ដ៏​ខ្ពង់ខ្ពស់ សម្ដេច​អគ្គមហាសេនាបតី​ជោ​ហ៊ុន សែន ក្នុង​ឱកាស​បិទ​ពិធី​សូត្រ​គម្ពីរ​អាល់​គួរ​អាន នា​ល្ងាច​ថ្ងៃទី​២៦ ខែមេសា ឆ្នាំ​២០១៥ នៅ​ព្រះវិហារ​បឹងកក់ សង្កាត់​ស្រះចក ខណ្ឌដូនពេញ រាជធានី​ភ្នំពេញ​។

លោកជំទាវ​ម៉ែន សំអន បានបញ្ជាក់​យ៉ាងច្បាស់​ថា សាសនា បានរួម​ចំណែក​យ៉ាងសំខាន់ ក្នុង​កិច្ច អភិវឌ្ឍន៍​សេដ្ឋកិច្ច សង្គម ដោយ​សាសនា បានរួម​ចំណែក ក្នុង​ការកសាង​សង្គមជាតិ​ប្រកប ដោយ​សីលធម៌ និង​ចរិយា​ធម៌​ល្អ ។ ការដឹកនាំ​សាសនា​ទាំង​នៅ​ផ្នែក​ពុទ្ធចក្រ​ក៏ដោយ ទាំង​នៅ​ផ្នែក​អាណាចក្រ​ក៏ដោយ និង​នៅ​ផ្នែក​ហា​ម៉ាត់​ឥស្លាម​ក៏​ដោយ គឺ​សុទ្ធតែ​បុគ្គល​នោះ​គោរ​ព្ធ​ប្រតិ​ប​ត្ដិ​តែ​អំពើ​ល្អ​ដូចគ្នា តែ​ត្រង់​ថា​ បុគ្គល​នោះ​គោរព​តាម​គម្ពីរ ធម៌អាថ៌​ក្បួនច្បាប់​លិខិត​បទដ្ឋាន​ផ្សេងៗ ទោះបី​ល្អឥតខ្ចោះ​យ៉ាងណាក៏ដោយ ក៏​នៅតែ​មិនទាន់​គ្រាប់​គ្រាន់​ដែរ សម្រាប់​ទទួល​បាន​ជោគជ័យ​នៅក្នុង​សហគមន៍។ ការពិត គឺ​វា​ទាមទារ​ឲ្យ​មាន​មនុស្ស​ជា​ថ្នាក់ដឹកនាំ​ប្រកបដោយ​គុណធម៌ ចរិយា​ធម៌​ល្អ​ទើប​វា​ប្រសើរ។ ជាក់ស្តែង សាសនា ឥស្លាម​យើង​នាំគ្នា ប្រារព្ធ​ពិធី​សូត្រ​គម្ពីរ​អាល់​គួរ​អាន​នោះ​មិន​ទាន់​គ្រាប់​គ្រាន់​នៅឡើយ​ទេ ពោលគឺ​យើង​ទាមទារ​ឲ្យ​មាន​ព្យា​ការី​មហាម៉ាត់ ដែលជា​អ្នកបកប្រែ​តាមរយៈ​ការ​បង្ហាញ ជា​សកម្មភាព ជាក់ស្តែង ដែល​ធ្វើ​ឲ្យ​មនុស្ស​ជំនាន់ នោះ​មើលឃើញ ពី​ការ​ទទួល​យក​បាន ឲ្យ​ក្លាយទៅជា​សាវ័ក​ជា​ឃោសនិក​ផ្សព្វផ្សាយ មាន​អ្នក​ជឿ​គោរព​តាម និង​ក្លាយជា​ឃោសនិក បន្តបន្ទាប់ ធ្វើ​ឲ្យ​សាសនា​នេះ​គង់វង្ស និង​រីក​សុះសាយ​មកទល់​សព្វថ្ងៃ មាននៅ​គ្រប់​ទីកន្លែង នៅលើ​ពិភព លោក​។​

លោកជំទាវ​ឧបនាយករដ្ឋមន្ត្រី​បាន​បន្ដថា ប្រធានបទ ដែល​បាន​ដាក់ចេញ នៅក្នុង​ពិធី​សូត្រ​គម្ពី​អាល់​គួរ​អាន​លើក​ទិ​២៤ ស្តីទី​ឥស្លាម ជា​សារ​សន្តិភាព និង​សុខដុមរមនា នៅ​ឆ្នាំនេះ​ពិតជា​បាន​បង្ហាញ​ពី​គុណធម៌ របស់​គម្ពីរ​សាសនា​ឥស្លាម ដែល​នឹង​ត្រូវ​ស្តែង​ចេញ​ជា​សកម្មភាព​ជាក់ស្តែង និង​រស់​រវើក​នៅក្នុង​សហគមន៍​ឥស្លាម សង្គមជាតិ និង​អ្នកគាំទ្រ​។​ ជាមួយគ្នា​នោះដែរ​លោក​សុះ កំ​រ៉ី ប្រធាន​គណៈកម្មការ​សូត្រ​គម្ពីរ​អាល់​គួរ​អាន បាន​បញ្ជាក់ថា​៖ ពិធី​សូត្រ​គម្ពីរ​អាល់​គួរ​អាន​ថ្នាក់ជាតិ​លើក​ទី​២៤​នេះ ពុំមែន​ទើបតែ​កើតមាន​នៅពេលនេះ​ទេ ពោលគឺ​កើតមាន​កាលពី​សម័យ​ព្រះរាជា​ណាចក្រ​កម្ពុ​ជាទី​១​មក​ម្ល៉េះ​។ លោក​បន្ត​ថា ដោយ​យោល​ទៅតាម​ស្ថានភាព​នៃ​តំបន់​ជាច្រើន​នៅលើ​ពិភពលោក ដែល​កំពុងតែ​កើតមាន​ស្ថានភាព​កាន់តែ​អាក្រក់​ទៅៗ ដែល​ហៀ​ប​និង​មិនអាច​ផ្សះផ្សារ​បាន​នោះ គណៈកម្មការ​រៀបចំ​សូត្រ​គម្ពីរ​អាល់​គួរ​អាន ថ្នាក់​ជាតិ​ទូទាំង​ប្រទេស​លើក​ទី​២៤ មកពី​ខេត្ដ រាជធានី​បានរៀបចំ​ឲ្យ​មានការ​ជួបជុំគ្នា​រវាង​ថ្នាក់ដឹកនាំ​នៃ​ឥស្លាម​និង​សហគមន៍ ក្រោម​ប្រធានបទ សាសនា​ឥស្លាម ជា​សារ​សន្តិភាព និង​សុខដុមរមនា។​

​ អត្ថន័យ​នេះ​ក្នុង​គោលបំណង​ផ្សព្វផ្សាយ​របស់​សាសនា​ឥស្លាម ដែលមាន​សារៈសំខាន់​បំផុត​នេះ ដើម្បី​ឲ្យ​សាសនិក​ឥស្លាម​នៅ​ទូទាំង​ប្រទេស និង​នៅ​លើ​ពិភពលោក​ទាំងមូល ចេះ​យោគយល់​គ្នា​អា​ធ្យា​ស្រ័យ​គ្នា​ចេះ​រួបរួមសាមគ្គី​គ្នា​ទៅវិញទៅមក​ពិសេស​ដើម្បី​ញ៉ាំង​ឲ្យ​មនុស្សជាតិ​បាន​បន្ត​កិច្ច​សហប្រតិបត្តិការ​ជាមួយគ្នា​ទៅវិញទៅមក ឆ្ពោះ​ទៅកាន់​ការពង្រឹង និង​ពង្រីក សន្តិភាព និង​ភាព​សុខដុមរមនា​ទៅ​ថ្ងៃ​អ​នា​គត់​ពិសេស​បងប្អូន​ប្រជាពលរដ្ឋ​ខ្មែរឥស្លាម​ដែល​កំពុង​រស់​នៅក្នុង​ព្រះរាជាណាចក្រ​កម្ពុជា​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684