ព័ត៍មានទាន់​ហេតុការណ៏
Search

ពេជ្រ សីហា និង​អាំង សំអាត ជួប​ថៃ​ក្នុង​កម្មវិធី​ប្រដាល់​Black Cat

អ្នក​ប្រដាល់​ជើង​ខ្លាំង​កម្ពុជា​ពីរ​រូប នឹង​ត្រូវ​ជួប​ប្រកួត​ជាមួយ​អ្នក​ប្រដាល់​មកពី​ប្រទេស​ថៃ​នា​យប់​ថ្ងៃអាទិត្យ​ ទី​០៣ ខែ​ឧសភា ឆ្នាំ​២០១៥​នេះ ក្នុង​កម្មវិធី​ប្រដាល់​Black Cat នៅ​លើ​សង្វៀន​SEA-TV ។ អ្នក​ប្រដាល់​ពីរ​រូប​របស់​កម្ពុ​ជា​នោះ គឺ​ពេជ្រ សីហា សមាគម​កីឡាប្រដាល់​ក្រសួងការពារជាតិ និង អាំង សំអាត ក្លិប​តា​ព្រហ្ម​មានជ័យ​។​
ពេជ្រ សីហា ជើង​ខ្លាំង​របស់​កម្ពុជា​ដែល​មាន​បទពិសោធន៍​ជោគជាំ​ជាមួយ​ប្រដាល់​នោះ នឹង​ជួប​ជាមួយ​អ្នក​ប្រដាល់​ថៃ​ឈ្មោះ​ភិត​ចា​ឡិ​ក ដោយ​ប្រកួត​ក្នុង​ទម្ងន់​៦៧​គីឡូក្រាម​។​
ភិត​ចា​ឡិ​ក​នេះ ពុំដែល​មក​ប្រកួត​នៅ​ភ្នំពេញ​ទេ​។ អ្នក​ប្រដាល់​ថៃ​រូប​នេះ មានបទពិសោធន៍​លើ​សង្វៀន​១១០​ដង គឺ​ឈ្នះ​៨៩​ដង ចាញ់​១៧​ដង និង​ស្មើ​០៤​ដង​។ ​បើ​ប្រៀប​ជាមួយ​សីហា គឺ​លើស​សីហា​១១​ដង ដោយ​សីហា​មាន​ប្រវត្តិ​ប្រកួត​តែ​៩៩​ដង​ប៉ុណ្ណោះ គឺ​ឈ្នះ​៧៧​ដង ចាញ់​១៧​ដង ស្មើ ០៥​ដង​។​
ពេជ្រ សីហា គេ​ប្រកួត​ជាមួយ​ថៃ​ជោគជាំ​ហើយ គ្រាន់តែ​ជួប​ប្រកួត​ក្នុងស្រុក​ចំនួន​១៩​នាក់​ទៅ​ហើយ ដោយ​វាយ​ឈ្នះ​ថៃ​១២​នាក់ ចាញ់​៤​នាក់ និង​ស្មើ​៣​។ សីហា ខ្លាំង​កណ្ដាប់ដៃ​និង​ទាត់ តែបើ​ជួប​អាសន្ន​ឬ​ប៉ះ​ដៃគូ​ខ្លាំង គេ​ក៏​អាច​វាយ​ប្ដូរ​កែង​បាន​ដែរ​។ គេ​ជួប​ថៃ​លើក​ចុង​ក្រោយ គឺ​Tilek Pithak Meung Kan ដោយ​វាយ​ឈ្នះ​ដោយ​ពិន្ទុ​។
រវាង​ពេជ្រ សីហា និង ភិត​ចា​ឡិ​ក នេះ មិនអាច​ទាយ​មុន​បានទេ ថា​អ្នកណា​ឈ្នះ​អ្នកណា​ចាញ់​នោះ ព្រោះថា​អ្នក​ប្រដាល់​ថៃ​ក្រោយនេះ មើលទៅ​មិនធម្មតា​ឡើយ មើល​តែ​កំណត់ត្រា​ប្រកួត​របស់​គេ ក៏​ញាក់សាច់​ដែរ​។ ដូច្នេះ ចាំ​មើល​តើ​សីហា​ឈ្នះ ឬក៏​ភិត​ចា​ឡិ​ក​ជា​អ្នកឈ្នះ​នោះ​? ​
អាំង សំអាត អ្នក​ប្រដាល់​ក្លិប​តា​ព្រហ្ម​មានជ័យ ត្រូវ​ជួប​ជាមួយ​អ្នក​ប្រដាល់​ថៃ​ឈ្មោះ ​ខេ​ម ដោយ​ប្រកួត​ក្នុង​ទម្ងន់​៥៤​គ​.​ក្រ​។ អ្នក​ប្រដាល់​ថៃ​រូប​នេះ ក៏​ពុំ​ធ្លាប់​ដែល​មក ប្រកួត​នៅ​ស្រុក​ខ្មែរ​នោះ​ដែរ​។ ​នេះ​បើ​តាម​លោក​ញាណ សុធី ឲ្យ​ដឹង​។​
ខេ​ម អ្នក​ប្រដាល់​ថៃ​រូប​នេះ​មាន​កម្ពស់​ប្រហាក់ប្រហែល​នឹង​សំអាត​ដែរ តែ​ប្រវត្តិ​ប្រកួត​របស់​គេ គឺ​តិច​ជាង​សំអាត​ប្រមាណ​២៦​ដង​ឯណោះ​។ ខេ​ម ប្រកួត​បាន​ចំនួន​៤៥​ដង ដោយ​ឈ្នះ​៤១​ដង ចាញ់​៣​ដង និង​ស្មើ​១​ដង ខណៈ​ដែល​អាំង សំអាត​អ្នក​ប្រដាល់​កម្ពុជា យើង​ប្រកួត​បាន​ចំនួន​៧១​ដង ឈ្នះ​៥៩​ដង ចាញ់​១២​ដង មិនដែល​ស្មើ​។​
អាំង សំអាត ធ្លាប់​ប្រកួត​ជាមួយ​ថៃ​៥​នាក់​ហើយ​កន្លងមក ដោយ​វាយ​ឈ្នះ​ថៃ​ដោយ​ពិន្ទុ​៣​ដង​និង​ស្មើ​២​ដង​។ ការប្រកួត​ជាមួយ​ថៃ​លើក​ចុង​ក្រោយ​នេះ សំអាត​វាយ​ស្មើ Phit Thong Chhai​។
ជា​អ្នក​ប្រដាល់​ដែល​មាន​កណ្ដាប់ដៃ​លឿន រហ័ស និង​ខ្លាំង​នោះ សំអាត​វាយ​មិន​ញញើត​អ្នក​ប្រដាល់​ថៃ​នោះ​ឡើយ​។​ ចាំ​មើល តើ​អាំង​សំអាត អាច​យកឈ្នះ​ខេ​ម​បាន​ឬ​អត់​?​
ចំពោះ​ការប្រកួត​រវាង​អ្នក​ប្រដាល់​ខ្មែរ​គ្នាឯង​វិញ ឡៅ ផា​នាថ អ្នក​ប្រដាល់​ក្លិប​សុភា​នូ​មានជ័យ ត្រូវ​គេ​ផ្គូផ្គង​ឲ្យ​ជួប​ប្រកួត​ជាមួយ​វ៉ាន់ ចាន់​វ៉េ​ត អ្នក​ប្រដាល់​ក្លិប​គី​សែ​មាន​រិ​ទ្ធ​អាជ្ញាធរ​អាវុធ​គីមី ដោយ​ប្រកួត​ក្នុង​ទម្ងន់​៦៥​គីឡូក្រាម​។​
ឡៅ ផា​នាថ បើ​តាម​ការ​កត់សម្គាល់​ការប្រកួត​របស់​គេ​កន្លងមក​ការ​ជួប​ប្រកួត​ជាមួយ​វ៉ាន់ ចាន់​វ៉េ​ត​នេះ គឺ​ប្រហែលជា​បាន​ត្រឹម​ម៉ា​ជួប​តែ​ប៉ុណ្ណោះ រឿង​ឈ្នះ​ចាន់​វ៉េ​ត ប្រហែល ជា​មិនអាច​ទៅរួច​នោះ​ទេ ព្រោះ​ចាន់​វ៉េ​ត​ល្អ ​និង​ខ្លាំង​ជាង​។​
វ៉ាន់ ចាន់​វ៉េ​ត ប្រកួត​លើក​ចុង​ក្រោយ​នេះ វាយ​ស្មើ​ពិន្ទុ​ជាមួយ​វៀត ប៊ុន​ឌឿ​ន អ្នក​ប្រដាល់​សមាគម​កីឡាប្រដាល់​ក្រសួងការពារជាតិ​។ ចំណែក​ការប្រកួត​លើក​ចុង​ក្រោយ​របស់​ឡៅ ផា​នាថ​វិញ គឺ​វាយ​ឈ្នះ​ប្រាក់​ចាន់​ស៊ីន អ្នក​ប្រដាល់​ក្លិប​មិត្ត​ប៉ូលិស​ដោយ​ពិន្ទុ​។​
អ្នក​ប្រដាល់ ប្រាក់ ស៊ី​ណាត ក្លិប​តា​ឯក​ដំបង​ដែក​មាន​រិ​ទ្ធ​ខេត្តព្រៃវែង នឹង​ឡើង​ប្រកួត​សងសឹក​សុខ ទូ អ្នក​ប្រដាល់​ក្លិប​ឃ្លាំងមឿង​កីឡា​ខេត្តពោធិ៍សាត់​។ កាលពី​ជួបគ្នា​លើក​មុន​(១៩​មេសា​២០១៥) ស៊ី​ណាត​ប្រកួត​ចាញ់​សុខ​ទូ​ដោយ​ពិន្ទុ ទាំង​មិន​អស់ចិត្ត​។​ ចាំ​មើល ប្រាក់ ស៊ី​ណាត អាច​សងសឹក​សុខ ទូ បានសម្រេច​ឬ​អត់​៕​វិ​សិទ្ធ



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើរ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016​ 877 684