ព័ត៌មានជាតិ

ប្រធានមន្ទីរ ព្រមាននាយកសាលា ត្រូវដកថយរឿងស៊ីភាគរយគ្រូយកលុយសិស្សខុសគោលការណ៍

បានផុស

៥ years មុន

នៅ

ថ្ងៃសុក្រ ៥ កុម្ភៈ ២០២១

ដោយ

លោក ហែម ស៊ីណារ៉េត ប្រធានមន្ទីរអប់រំ យុវជន និងកីឡារាជធានីភ្នំពេញ បានធ្វើការព្រមានបន្តចាត់វិធានការតាមរដ្ឋបាលចំពោះគ្រូ ដែលដើរប្រមូលលុយសិស្សក្នុងម៉ោងរដ្ឋខុសគោលការណ៍ ដើម្បីលើកកម្ពស់សេចក្តីថ្លៃថ្នូររបស់គ្រូបង្រៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ លោកក៏ព្រមាននាយកសាលាណាដែលពាក់ព័ន្ធ ត្រូវដកខ្លួនឲ្យឆ្ងាយពីការទទួលភាគរយ ក្នុងករណីគ្រូដែលបានផ្តល់ឲ្យគាត់ជាថវិកា ដែលប្រមូលបានក្រៅគោលការណ៍ណាមួយ ព្រោះថាប្រសិនបើកាលណានាយកសាលាមិនដកខ្លួនពីបញ្ហានឹងទេ រឿងហ្នឹងពិបាកដោះស្រាយ។

លោកបានបន្តទៀតថា មានសាលាមួយចំនួនបានអនុវត្តបានល្អ តែក៏មានសាលាមួយចំនួនទៀត នៅមិនទាន់អនុវត្តបាននៅឡើយ ដោយនៅតែបន្តលួចលាក់ធ្វើដដែលធ្វើឲ្យប៉ះពាល់ដល់កិត្តិយសនិងសេចក្តីថ្លៃថ្នូររបស់គ្រូទូទៅ។ មន្ទីរនៅតែមានវិធានការរដ្ឋបាល ក្នុងករណីរកឃើញគ្រូបង្រៀនណាម្នាក់ ប្រមូលលុយសិស្សក្រៅគោលការណ៍ ដែលផ្ទុយពីការណែនាំរបស់ក្រសួង។

«ខ្ញុំទទួលស្គាល់បញ្ហា ដែលគ្រូបឋមសិក្សាយកលុយសិស្សក្នុងម៉ោងរដ្ឋនិងរូបភាពផ្សេងៗ ចង់ក្លាយជាទម្លាប់បែងចែកគ្នាជាហូរហែ។ ប៉ុន្តែចាប់តាំងពីខ្ញុំបានចូលជាប្រធានមន្ទីរមក ខ្ញុំបានប្រជុំនិងណែនាំបានដាក់ចេញវិធានការមួយចំនួន ដើម្បីលុបបំបាត់បញ្ហាអសកម្មនេះកុំឲ្យមានបន្តទៀត»។

ជាក់ស្តែងគ្រូបឋមសិក្សាសន្ធរម៉ុក ត្រូវទទួលពិន័យរដ្ឋបាលដោយផ្លាស់ទៅបង្រៀននៅសាលាបឋមសិក្សាសែនសុខ។ លោកបានបន្ថែមទៀតថា«កន្លងមកយើងបានធ្វើច្រើនដែរ តែមិនបានធ្វើការផ្សព្វផ្សាយជាសាធារណៈទេ ដោយគ្រាន់តែហៅនាយកសាលានិងសាមីខ្លួនមកណែនាំប៉ុណ្ណោះ ដែលធ្វើឲ្យអ្នកធ្វើផ្សេងទៀតចេះតែបន្តធ្វើ»។ លោកបានលើកឡើងទៀតថា«ការងារនេះ ប្រសិនបើមិនមានការចូលរួមពីគ្រប់លំដាប់ថ្នាក់ទេ យើងមិនអាចបំបាត់សកម្មភាពការប្រមូលលុយសិស្សក្នុងម៉ោងសិក្សាបានទេ ពិសេសការចូលរួមពីគណៈគ្រប់គ្រងសាលាតែម្តង»។

លោកថា រាជរដ្ឋាភិបាលបានខិតខំដំឡើងប្រាក់ខែ ដើម្បីផ្គត់ផ្គង់ដល់ជីវភាពគ្រូបង្រៀនឲ្យបានសមរម្យតិចបំផុត១លាន២សែន ទៅ ១លាន៣សែន។ គ្រូកម្រិតឧត្តមជិត២លានហើយក្នុង១ខែ។ ដូច្នេះលោកគ្រូអ្នកគ្រូ គួរតែឈប់ប្រព្រឹត្តិសកម្មភាពណា ដែលប្រាសចាកពីគោលការណ៍ណែនាំរបស់ក្រសួង និងរួមគ្នាលើកកម្ពស់គុណតម្លៃគ្រូបង្រៀនទាំងអស់គ្នា៕

អត្ថបទ៖ សំអឿន

Related Topics:ក្រសួងអប់រំ យុវជន និងកីឡា