ព័ត៍មានទាន់​ហេតុការណ៏
Search
kpt

ទស្សនៈ​សងគុណ ម្ចាស់​ឆ្នោត

 

សកម្មភាព ប្រកបដោយ​សីលធម៌​ក្នុង​ការ​ទាក់ទង​រវាង​មនុស្ស និង​មនុស្ស​នោះ គឺ​ការ​ជួយ​គ្នា​ទៅវិញទៅមក​។ មាន​ពេល​ខ្លះ យើង​ត្រូវ​ជួយ​គេ និង​មាន​ពេល​ខ្លះ​គេ​ជួយ​យើង ទៅតាម​តម្រូវការ​ចាំបាច់​នៃ ជីវភាព​រស់នៅ​។ ជាក់ស្តែង​ចំពោះ​ការបោះឆ្នោត​គាំទ្រ​ទៅលើ​គណបក្ស​នយោបាយ​នោះ​ក៏​មាន​លក្ខណៈ​ស្រប​ទៅ​តាម​តម្រូវការ​ទៅវិញទៅមក​ដែរ​។ ដូចនេះ​ក្រោយពី​បាន​បោះឆ្នោត​រួច​ក៏​ម្ចាស់ឆ្នោត​នៅ​រង់​ចាំ​មើល​ស្នាដៃ​របស់​គណបក្ស​នីមួយៗ ថា​តើ គណបក្ស​នយោបាយ​នោះ​មាន​ទង្វើ​អ្វីខ្លះ​ជា​ផលប្រយោជន៍​ក្នុង​ការ​ជួយ​ជាតិ។

ចំពោះ​ទស្សនៈ របស់​មជ្ឈដ្ឋាន​អ្នកវិទ្យាសាស្ត្រ​នយោបាយ​តែង​យល់​ឃើញ​ថា ត្រើយនាយ របស់​រដ្ឋ គឺជា​សុភមង្គល​របស់​សមាជិក​ក្នុង​រដ្ឋ​។ មានន័យថា​គណបក្ស​នយោបាយ​នីមួយៗ បាន​បង្កើត​ផែនការ​ព្រមទាំង​បញ្ចេញ​នូវ​សកម្មភាព​យ៉ាងណា​ក្នុង​ការ​ជួយ​សង្គមជាតិ​ក៏ដូចជា​ជួយ​ប្រជាពលរដ្ឋ​ជា​ម្ចាស់​ឆ្នោត​ឲ្យ​មានការ​រស់នៅ​ប្រកបដោយ​សុខក្សេមក្សាន្ត និង​មានការ​រីកចម្រើន ព្រមទាំង​មាន​ជីវភាព​ធូរធារ​ហៅថា ជា​ការ​កាត់បន្ថយ​នូវ​ភាព​ក្រីក្រ​យ៉ាងនោះ​ដែរ។

ទន្ទឹម​នេះ​ដែរ​សាធារណមតិ​បាន​បញ្ជាក់​ថា ចំពោះ​គោលនយោបាយ​រប​ស់ គណបក្ស​នីមួយៗ នៅពេល​ឃោសនា​រក​សំឡេងឆ្នោត​នោះ​ឃើញថា ល្អ​ប្រពៃ​មែន ឬ​ហៅថា​ជា​ការ​តម្រូវ​តាម​ទឹកចិត្ត​ប្រជាពលរដ្ឋ​តែម្តង​។ ប៉ុន្តែ​ហេតុអ្វី​ក៏​ក្រោយ​ការបោះឆ្នោត​មកនេះ ធ្វើ​ឲ្យ​គោលនយោបាយ​នោះ​សម្ងំ​នៅតែ​ក្នុង​ក្រដាស ឬ​ឯកសារ​ទៅវិញ​? គេ​យល់ថា មេ​គណបក្ស​នយោបាយ​គួរតែ​លើកយក​គោលការណ៍​នៃ​ខ្លឹមសារ​នយោបាយ​មក​អនុវត្ត​តាម​តិច​តាម​ច្រើន និង​តាមរយៈ​ធនធាន ឬ​ជា​កម្លាំង​នៃ​សមត្ថភាព​របស់​ខ្លួន​រែក​ទូល​បាន​ប៉ុនណា ជា​ហូរហែ​បន្ត​ទៅ?

មជ្ឈដ្ឋាន​សាធារណៈ តែង​យល់ឃើញ​ថា ធ្វើ​នយោបាយ​លុះត្រាតែ​មានការ​សន្សំ​ពី​តូច​ទៅ​ធំ​ឬ​ពី​តិច​ទៅ​ច្រើន ក្នុង​ការ​ជួយ​ជាតិ ទើប​ជាតិ​មើលឃើញ​ជា​បន្ត​ទៅ​ដែរ​។ គេ​បាន​និយាយ​ថា ប្រជាពលរដ្ឋ​តូច ដែល​មាន​អាសនៈ តិច​នៅក្នុង​សភា​ក៏ដោយ​ក៏​ជា​ចំណែក​មួយ​ក្នុង​ការ​ចូលរួម​ពី​ឆន្ទៈ ប្រជាពលរដ្ឋ​ដែរ​។ គឺ​គួរតែ​គណបក្ស​នយោបាយ​នោះ​បញ្ចេញ​សកម្មភាព​តាម​មាន​តាម​បាន​ក្នុង​ការជួយ​ជាតិ ឬ​ជួយ​ប្រជាពលរដ្ឋ​ទៅ ទើប​មានន័យថា ជាការ​តបស្នង​សងគុណ ម្ចាស់ឆ្នោត​។ មកដល់​ចំណុច​នេះ​គេ​តែង​ធ្វើការ​កត់សំគាល់​ឃើញ​ថា គណបក្ស​តូចតាច​មិនទាន់​មាន​ទង្វើ​ណា​ជួយ​ជាតិ​ដើម្បី​ឲ្យ​ប្រជាពលរដ្ឋ​ចិញ្ចឹមចិត្ត​និង​ឆន្ទៈ​របស់​ខ្លួន​ដើម្បី​គាំទ្រ​លើក​ក្រោយ​ទៀត​ឡើយ​។ គឺ​កន្លងមក​នេះ គេ​ឃើញ​តែ​គណបក្ស​ជាប់ឆ្នោត​លំដាប់​នាំ​មុខ​គេ ឬ​មាន​ឈ្មោះថា ជា​គណបក្សកាន់អំណាច​នោះ​ទេ ដែល​មាន​ស្នាដៃ​កសាង​ជាតិ​យ៉ាង​លេចធ្លោ​លើសគេ​។ ប្រជាពលរដ្ឋ​តែង​បាន​ទទួល​ផលប្រយោជន៍ និង​ការ​រួមរស់​ជាមួយគ្នា ប្រកបដោយ​ការ​ដឹង​សុខទុក្ខ​ប្រជាពលរដ្ឋ​ពី​សំណាក់​នៃ​អ្នកនយោបាយ​កាន់អំណាច​យ៉ាង​ស្អិតល្មួត​បំផុត​។ ជាពិសេស​អំពើ​ល្អ​ទាំងនេះ កាន់តែ​រីកចម្រើន ដុះដាល​ក្នុង​ការ​សាង​វឌ្ឍនភាព​ដល់​សង្គម ដែល​ធ្វើ​ឲ្យ​ជីវភាព​ប្រជាពលរដ្ឋ​កាន់តែ​ប្រសើរ។

បើ​គេ​ធ្វើការ​ប្រៀបធៀប​ទៅតាម​ទង្វើ​ជាក់ស្តែង​នៃ​គណបក្ស នយោបាយ​ទាំង​តូច​ទាំង​ធំ​នោះគេ​បាន​ស្គាល់​ច្បាស់​អំពី​មុខមាត់ ឬ​អត្តចរិត​នៃ​អ្នកនយោបាយ​ទាំងអស់នោះ​ពិតប្រាកដ​ទៅហើយ​ថា​មាន​អ្នកនយោបាយ​ជួយ​ជាតិ និង​ក៏មាន​អ្នកនយោបាយ​តាម​បែប​ពាក្យចាស់​ថា “​មិន​ជួយ​ចូកចែវ បែរជា​យកជើងរាទឹក។ មាន​មតិ​ខ្លះទៀត​បាន​ឲ្យ​ដឹង​ថា ខ្វះ​អ្វី​លុយ​! គឺ​គណបក្ស​តូច​មែន​តែមាន​គេ​ឧបត្ថម្ភ លុយ​ពី​ក្រៅ​ឬ​ពី​ក្នុង​មិន​ស្ទើរ​ទេ ដែល​គេ​មានបំណង​ឲ្យ​គណបក្ស​នេះ ធ្វើ​ទុន​ក្នុង​ការ​បង្កើន​ប្រជាប្រិយភាព​ក្នុង​សង្គម​សម្រាប់​ធ្វើ​ឲ្យ​មាន​សំឡេង គាំទ្រ​នា​អាណ​តិ្ត​ក្រោយ​ទៀត​នោះ​។ ប៉ុន្តែ​បើ​មេ​នៃ​គណបក្ស​តូចតាច​នោះ​មិន​មាន​អ្វី​សងគុណ​ម្ចាស់​ឆ្នោត​ទេនោះ​ក៏​សន្មត​ថា លើក​ក្រោយ​កាន់តែ​ខើច​និង​ចុះថយ​ពិតប្រាកដ។

សរុប​មក​មានតែ​គណបក្ស​នយោបាយ​ណា​បាន​ធ្វើ​ឲ្យ​ប្រជាពលរដ្ឋ​មានការ​កក់ក្តៅ​និង​មាន​សង្ឃឹម​ជឿជាក់​គឺ ហ៊ាន​ថា ហ៊ាន​ធ្វើ​ក្នុង​ការ​ជួយ​ម្ចាស់​ឆ្នោត​នោះ ទេ​ទើប​ម្ចាស់​ឆ្នោត​នៅតែ​បន្ត​និង​បង្កើន​ការគាំទ្រ​គ្រប់ៗ អាណ​តិ្ត​ក្រោយៗ ទៀត​ដោយ​នៅតែ​ជាប់ឆ្នោត​នាំមុខគេ​ដដែល​៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684