ព័ត៍មានទាន់​ហេតុការណ៏
Search
kpt

ទស្សនៈ នយោបាយ មាន​អ្នក​ខាត និង​មាន​អ្នក​អ្នក​ចំណេញ

 

ល្បែង​ខាង នយោបាយ​គេ​បាន​ចែក​មនុស្ស ជា​ពីរ​ប្រភេទ គឺ​អ្នកធ្វើនយោបាយ និង​អ្នកគាំទ្រ​នយោបាយ​។ គេ​តែង​បាន​ដឹង​ថា ភាគច្រើន នៃ​អ្នកនយោបាយ​ដែល​គេ​សំគាល់​ទៅលើ​មេៗ នោះ​គឺជា​អ្នក​បាន​ចំណេញ ពី​នយោបាយ​។ ដោយឡែក​ចំពោះ​អ្នកគាំទ្រ ខាង​នយោបាយ​នោះ តែង​មិនសូវ​បាន​ចំណេញ នឹង​គេ​ទេ​ដោយ​គ្រាន់តែ​ហែហម និង​ចូលរួម​អបអរ ជាមួយ​គេ​ហើយក៏​មាន​លេចឮ​ថា មានការ​ខាតបង់​ផលប្រយោជន៍ និង​ទ្រព្យសម្បតិ្ត​ផង​។ គឺ​ជំពូក​មនុស្ស​ទី​២ នេះ​ហើយ​ជា​អ្នក​ខាត ខាង​នយោបាយ​ផ្ទាល់ខ្លួន​ទៅវិញ​។ មានន័យថា អ្នកគាំទ្រ​ខាង​នយោបាយ​នោះ​ហើយ ដែល​ភាគច្រើន ជា​អ្នក​ខាត គឺ​ការ​ខាត​នេះ​មិនអាច​ទៅ​ស្តី​បន្ទោស​អ្នកណា​នោះ​ក្រៅពី​ខ្លួន​យើង ផ្ទាល់​នោះ​ទេ​។ ជាពិសេស​ក៏​គេ​និយាយ​ថា ជា​អ្នក​ចាញ់​ការបោកប្រាស់​តាមរយៈ​ការឃោសនា​របស់​គេ​ពិតប្រាកដ។

ភាគច្រើន​នៃ​អ្នកគាំទ្រ​ខាង នយោបាយ​ថ្មី តែង​គិត​តាម​វត្ថុបំណង របស់​គណបក្ស​ថា កាលណា​បាន​ជាប់ឆ្នោត​ក្នុង​លំដាប់​ឈានមុខ​គេ​នោះ ក្រុម​យើង​នឹង​មាន​បុណ្យ​សក្តិ មានអំណាច​អាច ឡើង​កាន់​តំណែង​ជា​មន្ត្រីរាជការ​ផ្នែក​នេះ ឬ​ផ្នែក​នោះ​សម​តាម​បំណងប្រាថ្នា​របស់​ខ្លួន។ ជាពិសេស​ក៏​មាន​ខ្សែ​បណ្តាញ​ឃោសនា​តាមរយៈ ការ​ខ្សឹបខ្សៀវ​ក្នុង​ការ​ជំរុញ​ថាមពល ផ្លូវចិត្ត​ឲ្យ​កាន់​តែ​មាន​សន្ទុះ​គាំទ្រ​យ៉ាង​ខ្លាំង។ ភាគច្រើន​ចំពោះ​អ្នក​ដែល​មិន​មាន​មុខរបរ​ខ្ជាប់ខ្ជួន ឬ​អ្នក​ដែល​គ្មាន​ការងារ​ធ្វើ​នោះ​ហើយ​ដែល​មាន​ត្រចៀកស្រាល ឆាប់​ជឿ​ការឃោសនា​អកុសល​របស់​គេ​ក្នុង​ការ​បំពេញ​តាម​តម្រូវការ និង​បំណង​របស់​ខ្លួន​ដើម្បី​ផលប្រយោជន៍​នោះ​ហើយ​ដែល​ហៅថា ជឿ​ផ្កាប់​មុខ ស្លុង​ស្លឹកត្រចៀក​ខ្លប​តែម្តង​។ ម្ល៉ោះហើយ​ពួកគេ​តែង​គាំទ្រ​នយោបាយ​នោះ​ទាំង​ភ្លេច​គិត ឬ​ទាំង​ងងឹត​ងងុល​ទៅតាម​អ្វីដែល​ហៅថា ជា​ឧបករណ៍​របស់​នយោបាយ និង​ក៏​ធ្វើខ្លួន​ជា​ស្ពាន​ចម្លង​នៃ​នយោបាយ​នោះ​ទាំង​ច្រងេងច្រងាង ព្រៃផ្សៃ​ក៏មានដែរ។

ចំពោះ​អ្នក​ដែល​ខាត​នោះ គឺ​ខាត​ទាំង​កម្លាំង​កាយ​ចិត្ត ខាត​ទាំង​ពេលវេលា​ធ្វើការ ខាតបង់​ទាំង​កិត្តិយស ខាត​ទ្រព្យសម្បត្តិ​ទៀត​ផង ក្នុងការ​ចូលរួម​នៃ​គណបក្ស​នយោបាយ​ដែល​ពាក់​ស្លាក​ថា ប្រឆាំង​នោះ​។ ជាក់ស្តែង​កន្លងមក​នេះ​គេ​តែង​បាន​ដឹង​ថា ដើម្បី​បម្រើ​នយោបាយ ឬ​ដើម្បី​ដង្ហែ​តាម​នយោបាយ នោះ​ក៏មាន​ខ្សែ​បណ្តាញ​ដើរ​ប្រមូល​ផលប្រយោជន៍​ពី​អ្នកគាំទ្រ​នោះដែរ​តាមរយៈ ការ​លក់​កៅអី ការសន្យា​និង​ធានា​លើ​មុខតំណែង និង​តួនាទី​តាមរយៈ​ការ​និយាយ​គ្នា​ដោយ​ស្ងាត់ស្ងៀម​។ គេ​ថា អ្នកណា​ហ៊ាន​ចំណាយ​ច្រើន​អ្នកនោះ​នឹង​បាន ការងារ​ធំ​។ សំឡេង​នៃ​កិច្ចកល​នេះ គេ​បានឮ​រហូតដល់​បរទេស និង​ពី​បរទេស​ក៏​មាន​ទំនាក់ទំនង នឹង​ការ​ទិញដូរ​កៅអី​សភា​ឬ​កៅអី​រដ្ឋមន្ត្រី ដែល​គេ​និយាយ​តាម​បែប​ការគួរសម​ថា ជួយ​ឧបត្ថម្ភ គណបក្សព្រោះ​បើ​ប្រើ​ពាក្យ​ថា ទិញ​នោះ​វា​ដូចជា​មិនល្អ​ស្តាប់។

ជា​ការ​ពិត​មេៗ ប្រមូល​លុយ​ទាំងអស់​ទុក​ប្រើប្រាស់​ក្នុង​ការងារ​ចាត់ចែង​នៃ​នយោបាយ​មែន គឺ​មេៗ តែង​មាន​សិទ្ធិ​គ្រប់យ៉ាង​។ ទោះជា​គណបក្ស​មិនបាន​ជាប់ឆ្នោត​ដោយ មិនបាន​ដល់​ទិសដៅ​ក៏ដោយ ក៏​ផលប្រយោជន៍​ទាំងអស់​នោះ​នៅ​លើ​មេៗ ដែល​ជា​អ្នក​បាន​ចំណេញ​យ៉ាង​កប់​ក្តោង​ដែរ​។ ដោយឡែក​សម្រាប់​អ្នក​ដែល​ខាត​ព្រោះ​រឿង​នយោបាយ​វិញ​នោះ ក៏មាន​ច្រើន​ដែរ​ដែល​មកដល់ពេលនេះ ទៅហើយ​គេ​នៅតែ​សម្ងំ បាត់​មាត់​បាត់​ក រក​និយាយ​មិន​ចេញ នោះ​ទេ​។ តើ​លើក​ក្រោយ​គេ​សុខចិត្ត ឲ្យ​ខាត​ដូចនេះ​ទៀត​ដែរ ឬទេ​?

កុំ​ឆោត​ពេក ! តំណែង​មន្ត្រីរាជការ​ត្រូវ​នៅ​លើ​និស្សិត បញ្ញវន្ត​ដែល​ជា​អ្នករៀន​សូត្រ​ចេះ ដឹង​បាន​ប្រឡង​ជាប់​ឯណោះ វិញ​ទេ ពោល​គឺ សម័យនេះ គេ​ត្រូវការ​ធនធានមនុស្ស​ប្រកបដោយ​គុណភាព​គ្រប់គ្រាន់​ទេតើ​!……​។ បាន​សេចក្តី​ថា មិនមែន​បុណ្យ​សក្តិ និង​តួនាទី​ការងារ កើតឡើង​តាម​ការ​កុហក​បោកប្រាស់​នៃ​ការឃោសនា​តាម​ផ្ទាំង​នយោបាយ​ខ្សឹបខ្សៀវ​នោះ​ឡើយ៕



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684