ព័ត៍មានទាន់​ហេតុការណ៏
Search
M07-05-15-k

ស្គាល់​គ្នា​តាម​ហ្វេស​ប៊ុក​ ជួប​គ្នា​លើក​ទី១​​​ដាក់​ថ្នាំ​សណ្ដំ​ប្រមូល​យក​ទ្រព្យ​អស់​ ត្រូវ​ចាប់​ខ្លួន

ភ្នំពេញ​ ៖​ អតិថិ​ជន​ថ្មី​មួយ​ទៀត​របស់​បណ្តាញ​សង្គម​ហ្វេស​ប៊ុក​ ឬ​អាច​ហៅ​ថា ជា​អ្នក​ដែល​ប្រើ​ប្រាស់​សង្គម​ហ្វេក​ប៊ុក​សម្រាប់​ទាក់​ទង​គ្នា​ត្រូវ​បាន​ចាប់​​បញ្ជូន​ឡើង​តុលា​ការ​ នា​រសៀល​ថ្ងៃ​ទី​០៧ ខែ​ឧសភា ឆ្នាំ​២០១៥ ក្រោយ​ពី​ជន​សង្ស័យ​បាន​ប្រើ​ប្រាស់​ហ្វេស​ប៊ុក​អូស​ទាញ​យុវ​ជន​ម្នាក់​ទៀត​ ដែល​និយម​លេង​ហ្វេស​ប៊ុក​ដែល​យក​មក​ដាក់​ថ្នាំ​សណ្តំ​ឲ្យ​សន្លប់ រួច​លួច​យក​ម៉ូតូ​ស៊េរី​ទំនើប​១​គ្រឿង និង​ទូរស័ព្ទ​ទាន់​សម័យ​៣​គ្រឿង។

ជន​សង្ស័យ​ដែល​សមត្ថកិច្ច​នគរបាល​ព្រហ្មទណ្ឌ​កម្រិត​ស្រាល​បាន​ចាប់​ខ្លួននេះ​ ឈ្មោះ​កែវ លីដា ហៅ​កក្កដា ភេទ​ប្រុស អាយុ​២៥​ឆ្នាំ ជន​ជាតិ​ខ្មែរ រស់​នៅ​ផ្ទះ​គ្មាន​លេខ​ ផ្លូវ​២៦៥ សង្កាត់​ទឹក​ល្អក់​៣​ ខណ្ឌ​ទួល​គោក។

តាម​ពាក្យ​បណ្តឹង​របស់​ឈ្មោះ​ជា ពៅ ភេទ​ប្រុស អាយុ​៣៦​ឆ្នាំ មាន​ទី​លំនៅ​ផ្ទះ​លេខ​៨E1 ផ្លូវ​សុធារស​ សង្កាត់​ចតុមុខ​ ខណ្ឌ​ដូន​ពេញ​ជា​បុគ្គលិក​ក្រុមហ៊ុន​ភី​ហ្សា​ដូមីណូ​ បាន​អះអាង​ថា ខ្លួន​បាន​ស្គាល់​ឈ្មោះ​កែវ លីដា ហៅ​កក្កដា តាម​បណ្ដាញ​សង្គម​ហ្វេស​ប៊ុក​ ដោយ​ពុំ​បាន​ឃើញ​មុខ​គ្នា​ពី​មុន​មក​ទេ។ លុះ​ដល់​ថ្ងៃ​ទី​២៩ ខែ​មេសា ឆ្នាំ​២០១៥ វេលា​ម៉ោង​១៨​ខ្លួន​បាន​ជួប​ឈ្មោះ​កែវ លីដា​ តាម​ការ​ណាត់​ជួប​គ្នា​ទៅ​ញុំា​ស៊ុប​ជា​មួយ​គ្នា​នៅ​ក្បែរ​រោង​ភាព​យន្ត​គិរីរម្យ។ ពេល​បាន​ជួប​គ្នា​ហើយ ពួក​គេ​ក៏​បាន​ទាក់ទាក់​ និង​ហូប​ស៊ុប​ជា​មួយ​គ្នា​រហូត​ដល់​ម៉ោង​២១​យប់ ដោយ​ខ្លួន​គេ​ផ្ទាល់​បាន​ជិះ​ម៉ុតូ​ម៉ាក​ FTR ពាក់​ស្លាក​លេខ​ភ្នំពេញ 1AS-2826 ឌុប​គ្នា​ទៅ​ផ្សារ​ចាស់​ ហើយ​ទិញ​ទឹក​ក្រឡុក​២​កែវ​ជ័រ​ ដោយ​ឈ្មោះ​កែវ​ លីដា ជា​អ្នក​ចុះ​ទៅ​ទិញ​ ចំណែក​ខ្លួន​គេ​ជា​ ពៅ បាន​អង្គុយ​ចាំ​នៅ​ម៉ូតូ។ ក្រោយ​ពី​ទិញ​បាន​ហើយ​ក៏​ជិះ​ម៉ូតូ​ត្រឡប់​មក​ផ្ទះ​របស់​ខ្លួន​វិញ ដោយ​ផ្ញើ​ម៉ូតូ​ហើយ​ទុក​សំបុត្រ​ផ្ញើ​នៅ​ក្នុង​កាបូប​លុយ ហើយ​ពួកគេ​ក៏​បានឡើង​ទៅ​ផ្ទះ​របស់​គេ​ផ្ទាល់​លេខ​៣១ ផ្លូវ​លេខ​១៩ សង្កាត់​ចតុមុខ​ ខណ្ឌ​ដូនពេញ ដើម្បី​សម្រាក​ និង​បាន​ហូប​ទឹក​ក្រឡុក​ដែល​បាន​ទិញ​មក​អស់​ទៅ ហើយ​ចាប់​ពីពេល​នោះ​មកខ្លួន​គេ​ក៏​លែង​ដឹង​អ្វី​ទាំង​អស់។ រហូត​ដល់​ថ្ងៃ​ទី​៣០ ខែ​មេសា​ ឆ្នាំ​២០១៥ ក៏​បាន​ដឹង​ខ្លួន​វិញ​ ប៉ុន្តែ​កំពុង​ស្ថិត​នៅ​ក្នុង​ការ​សង្គ្រោះ​នៅ​ក្នុង​ពហុ​ព្យា​បាល​សុខា​បាត់​ទៅ​ហើយ។​ ចំណែក​ម៉ូតូ​​ម៉ាក FTR ទូរស័ព្ទ​ដៃ​ម៉ាក​ Samsung S4 ពណ៌ស ទូរស័ព្ទ​ម៉ាក​ iPhone 5s Gold និង​ទូរស័ព្ទ​ម៉ាក​ណូគា5250 ព្រម​ទាំង​កាបូប​ប្រាក់​ត្រូវ​បាត់​បង់​ទាំង​អស់​។ ពេល​នោះ​​ខ្លួន​និង​ក្រុម​គ្រួសារ​ក៏​បាន​ដាក់​ពាក្យ​ប្តឹង។ រហូត​មក​ដល់ថ្ងៃ​ទី​០៦ ខែ​ឧសភា ឆ្នាំ​២០១៥ ក៏​បាន​ប្រទះ​ឃើញ​ឈ្មោះ​កែវ លីដា កំពុង​ធ្វើ​ដំណើរ​ក៏​ចាប់​ខ្លួន​ប្រគល់​ឲ្យ​ប៉ូលិស​តែ​ម្តង។

ពាក់​ព័ន្ធ​នឹង​ករណី​ខាង​លើ​នេះ​​ ឈ្មោះ​កែវ លីដា បាន​សារ​ភាព​ថា ខ្លួន​ពិត​ជា​បាន​ដាក់​ថ្នាំ​សណ្តំ​ចូល​ទៅ​ក្នុង​ទឹកក្រឡុក​របស់​ឈ្មោះ​ជា ពៅ ហើយ​នៅ​ពេល​ដែល​ជា ពៅ​សន្លប់​ ខ្លួន​គេ​ក៏​បាន​ប្រមូល​យក​ទូរស័ព្ទ​របស់​ជន​រង​គ្រោះ​៣​គ្រឿង​ ម៉ូតូ​ម៉ាក FTR និង​កាបូប​ប្រាក់​ទៅ​ទាំង​អស់៕

 



ប្រសិនបើ លោក លោកស្រីចង់ចែករំលែកនូវព័ត៌មានទាន់ហេតុការណ៍ផ្សេងៗ សូមផ្ញើ អ៊ីម៉ែលមកកាន់អាសយដ្ឋានដូចដែលបានបង្ហាញខាងក្រោម។ សម្រាប់ការផ្សាយពាណិជ្ជកម្មលើគេហទំព័រនេះ សូមទំនាក់ទំនងតាមលេខទូរស័ព្ទៈ 016 877 684