ព័ត៌មានជាតិ

បុរសម្នាក់ ស៊ីដាច់លុយ២ម៉ឺនដុល្លារជាង ត្រូវម្ចាស់ក្រុមហ៊ុនប្តឹងឃាត់ខ្លួន បញ្ជូនទៅតុលាការ

បានផុស

៥ years មុន

នៅ

ថ្ងៃព្រហស្បតិ៍ ១៨ មីនា ២០២១

ដោយ

បុរសម្នាក់ស៊ីដាច់លុយក្រុមហ៊ុន ចំនួន២១,៩១០ដុល្លារ ត្រូវម្ចាស់ក្រុមហ៊ុនឈ្មោះ ពិត ភីគីម ហៅ ពិត ស្រួច ភេទប្រុស អាយុ៤០ឆ្នាំ រស់នៅភូមិដីឡូតិ៍ សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យប្តឹងអាវុធហត្ថចុះឃាត់ខ្លួនបញ្ជូនទៅតុលាការ កាលពីថ្ងៃទីពីល្ងាច ១៧ ខែមីនា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកកវរសេនីយ៍ឯក ម៉ែន ភិរម្យ មេបញ្ជាការរងទទួលការងារស្រាវជ្រាវ និងបង្ក្រាបបទល្មើស នៃបញ្ជាការដ្ឋានកងរាជអាវុធហត្ថខេត្តបន្ទាយមានជ័យ បានឲ្យដឹងថា យោងតាមពាក្យបណ្ដឹងរបស់ជនរងគ្រោះថា កាលពីថ្ងៃទី២៣ ខែកុម្ភៈ ឆ្នាំ២០២១ ជនសង្ស័យម្នាក់ឈ្មោះ និត វឌ្ឍនា ភេទប្រុស អាយុ៣៧ឆ្នាំ នៅចំណុចក្រុមហ៊ុនទិញ លក់ដីឡូតិ៍ ស្ថិតក្នុងភូមិដីឡូតិ៍ សង្កាត់ទឹកថ្លា ក្រុងសិរីសោភ័ណ បានដកយកប្រាក់ ពីក្រុមហ៊ុនចំនួន២១,៩១០ដុល្លារយកទៅបាត់ ក្រោយពីបានទទួលពាក្យបណ្តឹងរួចមកយោងការអនុញ្ញាតឲ្យបើកការស៊ើបអង្កតបឋមលេខ៣៩៣ ចុះថ្ងៃទី៩ ខែមីនា ឆ្នាំ២០២១ របស់លោក ស៊ិន វិសុទ្ធ ព្រះរាជអាជ្ញារង សាលាដំបូងខេត្តបន្ទាយមានជ័យ បន្ទាប់ពីទទួលបានបទបញ្ជាពីលោកឧត្តមសេនីយ៍ត្រី បោន ប៊ិន មេបញ្ជាការអាវុធហត្ថខេត្តបន្ទាយមានជ័យ លោកបានដឹកនាំកម្លាំងការិយាល័យព្រហ្មទណ្ឌ ធ្វើការចុះឃាត់ខ្លួនជនសង្ស័យនៅចំណុចក្រុមហ៊ុនទិញ លក់ដីឡូតិ៍ ស្ថិតក្នុងភូមិដីឡូតិ៍ សង្កាត់ទឹកថ្លា ក្រុងសិរីសោភ័ណ កាលពីវេលាម៉ោង១២ និង៣០នាទី ថ្ងៃទី១ ខែមីនា ឆ្នាំ២០២១ យកមកសួរនាំ ។

លោកថា ក្រោយឃាត់ខ្លួន សាកសួរ ជនសង្ស័យបានសារភាពថា ខ្លួនគេពិតជាបានដកយកប្រាក់ ពីក្រុមហ៊ុនចំនួន២១,៩១០ដុល្លារ ពិតប្រាកដមែន។ យោងតាមចម្លើយសារភាព និងពាក្យបណ្ដឹងរបស់ជនរងគ្រោះ ជនសង្ស័យត្រូវបាន កម្លាំងជំនាញ កសាងសំណុំរឿងបញ្ជូនទៅតុលាការដើម្បីចាត់ការតាមនីតិវិធីច្បាប់ ៕

អត្ថបទ៖ វ៉ាន់ ណាង

សូមចុចអាន៖ សមត្ថកិច្ចឃាត់ខ្លួនបុរសម្នាក់ក្រោយបង្ហោះព័ត៌មានមិនពិតពាក់ព័ន្ធជំងឺកូវីដ១៩