លោកជំទាវ ឱ វណ្ណឌីន​ បញ្ជាក់​បន្ថែម​ករណី​ ឪពុកសិស្ស​​​រៀន​នៅ​​សាលាឯកជនមួយ​តេស្តវិជ្ជមាន កូវីដ-១៩

លោកជំទាវ​​​ ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួង​សុខាភិបា​ល​តាម​រយៈបណ្តាញសង្គម​ Telegram បាន​បញ្ជាក់​បន្ថែម​ទៅ​​លើ​ករណី ឪពុកសិស្ស​ ២នាក់​រៀ​ន​នៅ​សាលាឯកជនមួយ​ម្តុំ​ទួួលទំពូង​ រាជធានី​ភ្នំពេញ​បាន​ធ្វើ​តេស្តរក​ឃើញ​​​វិជ្ជមាន​កូវីដ-១៩។ ឪពុកសិស្សរូបនោះ​បានតេស្ត​ឃើញ​​វិជ្ជមាន​កូវីដ-១៩​ នៅ​ថ្ងៃទី​៨ ខែ​វិច្ឆិកា ​បន្ទាប់​ពីបាន​ជួបជាមួយ​នឹងរដ្ឋមន្រ្តីការបរទេសហុងគ្រី កាល​ពីថ្ងៃទី​៣ ខែវិច្ឆិកា ឆ្នាំ២០២០​។

លោក​ជំទាវ​បានសរសេរ​ថា “សាលាបានបញ្ជាក់រួចហេីយ​ គឺតេស្តកូនគាត់​ និងអ្នកពាក់ព័ន្ធមួយចំនួននោះ​អស់ហេីយ​ តែលទ្ធផលអវិជ្ជមានទេ។ រីឯសាលា​ ក្រសួងអប់រំក៏បានបិទរួចហេីយដែរតាំងពីថ្ងៃទី៩​ មកម្ល៉េះ។ ដូចសាលាបានជូនព័ត៌មាន​ហេីយ​ វិធានការសាលាបាននិងកំពុងធ្វេី​ រួមទាំងការតាមដានសុខភាពអ្នកដែលពាក់ព័ន្ធដែរ។ សូមសាធារណ​ជនមេត្តាជ្រាប​ និងរក្សាភាពហ្នឹងនរផងចុះ។ ប្រសិនបេីមានការវិវត្តអ្វីនោះ​ ក្រសួងនឹងជូនព័ត៌មានដល់សាធារណជន។ សូមអរគុណ”។

យោងតាម​លោកស្រី យក់ សម្បត្តិ រដ្ឋលេខាធិការក្រសួង​សុខាភិបាល​ឱ្យដឹង​ថា​ អ្នក​ពាក់ព័ន្ធព្រឹត្តិការណ៍ «៣ វិច្ឆិកា» គិតចាប់ពីថ្ងៃទី០៤-១១ ខែវិច្ឆិកា ឆ្នាំ២០២០ មានអ្នកធ្វើតេស្ត ២,៤៩៧នាក់។ ក្នុងនោះអ្នកធ្វើតេស្តលើកទី១ ចំនួន ១,៦៨០នាក់ និងលើកទី២ ចំនួន ៨១៧នាក់។ សរុបអ្នកធ្វើតេស្ត ២,៤៩៧នាក់នេះ មានវិជ្ជមានតែ ៤នាក់ប៉ុណ្ណោះ។ ក្រៅពីនោះលទ្ធផលអវិជ្ជមានទាំងអស់៕