ពលរដ្ឋរងគ្រោះដោយទឹកជំនន់១៥០គ្រួសារ នៅ​ខេត្ត​បន្ទាយមានជ័យ​ទទួល​អំណោយ

​ជន​ក្រីក្រ ចាស់ជរា និងប្រជាពលរដ្ឋរង គ្រោះដោយទឹកជំនន់មានចំនួន១៥០គ្រួសារ មកពីក្នុងក្រុង​សិរីសោភ័ណ បាន​ទទួល​អំណោយ​ពី​ព្រឹទ្ធសភា រដ្ឋសភា និង​សប្បុរសជន ​​នៅព្រឹក ថ្ងៃ ទី១៥ ខែវិច្ឆិកា ឆ្នាំ ២០២០ នៅ​សាលាក្រុងសិរីសោភ័ណ។

​លោក អ៊ី ឡុង សមាជិក​សភា មណ្ឌលខេត្តបន្ទាយមានជ័យ បានមាន​ប្រសាសន៍ ផ្ដាំផ្ញើ​ការ​សាកសួរ​សុខ​ទុក្ខ​ពីសំណាក់សម្ដេចតេជោ ហ៊ុន សែន ប្រមុខ​រាជ​រដ្ឋាភិបាល ដែលតែងតែ​បារម្ភ និង គិតគូរ​ពី​សុខទុក្ខ របស់​ប្រជាពលរដ្ឋ​រងគ្រោះ ដោយ​សារ​ទឹកជំនន់។

លោក​​ថា ​អាជ្ញាធរ​តែងតែយកចិត្តទុកដាក់​​ដល់​ប្រជាពលរដ្ឋ​​ ដែលរងគ្រោះដោយ​សារទឹកជំនន់ ឲ្យរួច​ផុត​ពី​ការ​លំបាក​។ ម៉្យាងទៀត ទីណាដែលជួបទុក្ខលំបាក ទីនោះនឹងមានក្រុមការងាររបស់ខេត្ត ឲ្យចុះទៅជួប​ប្រ​ជាពរដ្ឋដោយផ្ទាល់ និង ឲ្យ​អាជ្ញាធរ ដែនដី ​​ចូលរួម ជួយសង្គ្រោះ ​ដោយមិនទុកឲ្យ​ប្រជាពលរដ្ឋណាម្នាក់ អត់​អាហារស្លាប់ ដោយពុំបានដឹងឮពីអាជ្ញាធរនោះឡើយ។

លោក អ៊ី ឡុង បានលើកឡើងថា រាជរដ្ឋាភិបាលកម្ពុជា បានខិតខំយ៉ាង​ប្ដូរផ្ដាច់ ដើម្បី​អនុវត្ត​យុទ្ធសាស្ត្រ​កំណែ​ទម្រង់​ស៊ីជម្រៅ និង​អភិវឌ្ឍន៍​លើគ្រប់វិស័យ ជាពិសេសវិស័យកសិកម្មដែលកំពុងតែ​ដើរតួរ​នាទីយ៉ាង​សំខាន់ ក្នុងការ​ជម្រុញ​ការអភិវឌ្ឍសង្គម និង​សេដ្ឋកិច្ច​ជាតិ រក្សានៅសន្តិសុខស្បៀង អាហារជូនប្រជាជន​កម្ពុជា នឹង កាត់បន្ថយភាពក្រីក្រ របស់ប្រជាពលរដ្ឋ នៅក្នុងសមរភូមិ​ប្រយុទ្ធ​ប្រឆាំង នឹង​ជំងឺ​កូវីដ-១៩ រួម​ទាំង​ដោះស្រាយបញ្ហាប្រឈមពីគ្រោះទឹកជំនន់ ផង​ដែរ ​៕

អត្ថបទ ៖ វ៉ាន់ ណាង