ព័ត៌មានជាតិ

វាគ្មិនល្បីៗជាង៣០រូបមកពីជុំវិញពិភពលោកចែករំលែកបទពិសោធន៍ស្តីពីសុខភាពនិងសុវត្ថិភាពនៅកន្លែងធ្វើការ

បានផុស

៣ years មុន

នៅ

ថ្ងៃពុធ ១៨ វិច្ឆិកា ២០២០

ដោយ

ភ្នំពេញ ៖ វាគ្មិនល្បីៗជាង៣០រូប មកពីជុំវិញពិភពលោករួមទាំងកម្ពុជាផង បានចូលរួមសនិ្នសីទលើកទី៦ ស្តីពីសុខភាព និងសុវត្ថិភាពនៅកន្លែងធ្វើការ នៃប្រទេសសិង្ហបុរីដើម្បីពិភាក្សានិងចែករំលែកបទពិសោធន៍គ្នាទៅវិញទៅមកទាក់ទិននឹងបញ្ហាសុខភាពនិងសុវត្ថិភាពរបស់កម្មករនិយោជិតនៅកន្លែងធ្វើការ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកហេង សួរ រដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ ក្នុងនាមជាទីប្រឹក្សានៃមជ្ឈមណ្ឌលថ្នាក់តំបន់ដើម្បីអនាគតនៃការងារដែលបានចូលរួមសនិ្នសីទតាមរយៈប្រព័ន្ធវីដេអូបានឲ្យដឹងថា សន្និសីទនេះ ក៏ជជែកគ្នាផងដែរ បញ្ហាពាក់ព័ន្ធនឹងការពឹងផ្អែកគ្នាទៅវិញទៅមកនៃធុរកិច្ច និងកម្មករនិយោជិតរបស់ខ្លួន និងថាតើអ្នកគ្រប់គ្រងធុរកិច្ចអាចបង្កើតវប្បធម៌ធុរកិច្ចប្រកបដោយចីរភាព, ផលប៉ះពាល់នៃប្រព័ន្ធឌីជីថល, សុខភាពផ្លូវចិត្ត, ការផ្លាស់ប្តូរនៅកន្លែងធ្វើការ និងអនាគតនៃការងារ ក្នុងបរិបទផលប៉ះពាល់នៃជំងឺកូវីដ-១៩ មកលើការងារ សុខភាព និងសុវត្ថិភាពនៃកម្មករនិយោជិត។

លោកបានបន្តថា «ប្រធានបទពិភាក្សាក្នុងសន្និសីទនេះ គឺជាបទពិសោធន៍ និងជាចំណេះដឹងដែលមានគុណតម្លៃបន្ថែសម្រាប់ការអភិវឌ្ឍន៍វិស័យការងារ ជាពិសេសផ្នែកសុវត្ថិភាព និងសុខភាព ការងារនៅកម្ពុជា នៅក្នុងនិងក្រោយវិបត្តិជំងឺកូវីដ-១៩ នេះ»។

គួរបញ្ជាក់ថា សន្និសីទលើកទី៦ ស្តីពីសុខភាព និងសុវត្ថិភាពនៅកន្លែងធ្វើការ នៃប្រទេសសិង្ហបុរី រៀបចំឡើងដោយក្រុមប្រឹក្សាសុខភាពនិងសុវត្ថិភាពនៅកន្លែងធ្វើការ នៃប្រទេសសិង្ហបុរី ក្រសួងហត្ថពលកម្ម និងដៃគូត្រីភាគីផ្សេងទៀត មានរយៈពេលពីរថ្ងៃ ចាប់ពីថ្ងៃទី១៧ ដល់ថ្ងៃទី ១៨ ខែវិច្ឆិកា ឆ្នាំ២០២០៕
ដោយ ៖ សំអឿន