ព័ត៌មានជាតិ

លោកស្រី កុយ ពិសី និងនាយឧត្តម សេនីយ៍ ខ្វាន់ ស៊ាម ចុះត្រួតពិនិត្យសំណង់បង្គោលផ្លូវខ្សែក្រវាត់ព្រំដែនកម្ពុជា-វៀតណាម

បានផុស

៣ years មុន

នៅ

ថ្ងៃសៅរ៍ ២៨ វិច្ឆិកា ២០២០

ដោយ

នាយឧត្តមសេនីយ៍ ខ្វាន់ ស៊ាម អគ្គមេបញ្ជាការរង មេបញ្ជាការ បញ្ជាការដ្ឋានវិស្វកម្ម អគ្គបញ្ជាការ និងលោកស្រី កុយ ពិសី អនុប្រធានលេខាធិការដ្ឋានអចិន្ត្រៃយ៍ នៃអាជ្ញាធរជាតិទទួល បន្ទុកកិច្ចការព្រំដែន កាលពីសៀលថ្ងៃព្រហស្បតិ៍ ទី២៦ ខែវិច្ឆិកា អមដំណើរដោយមេបញ្ជាការរង បញ្ជាការដ្ឋានវិស្វកម្ម និងនាយទាហានជំនាញជាច្រើនរូបទៀត បានអញ្ជើញចុះត្រួតពិនិត្យសំណង់បង្គោលខណ្ឌសីមាព្រំដែន និង ការដ្ឋានស្ថាបនាផ្លូវខ្សែក្រវាត់ព្រំដែនកម្ពុជា-វៀតណាម ដែលស្ថាបនាដោយកងកម្លាំងវិស្វកម្ម អគ្គបញ្ជាការ នៃកងយោធពលខេមរភូមិន្ទ នៅភូមិសាស្ត្រស្រុកកែវសីមា ខេត្តមណ្ឌលគិរី និងស្រុកស្នួល ខេត្តក្រចេះ ដែលរួមមាន ផ្លូវតភ្ជាប់ ពីផ្លូវជាតិលេខ៨ ទៅចំណុច អូរហ៊ុច, ផ្លូវពីបង្គោលលេខ៣៧ ទៅចំណុចព្រំប្រទល់ខេត្តក្រចេះ និងផ្លូវពីបង្គោលលេខ ៦១/១៣ ទៅដល់បង្គោលលេខ ៦១/៣៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចុះពិនិត្យចំណុច ខាងលើនេះ បានធ្វើឡើងបន្ទាប់ពីគណៈប្រតិភូ បានចុះត្រួតពិនិត្យសំណង់បង្គោលខណ្ឌសីមាព្រំដែន និងការដ្ឋានស្ថាបនាផ្លូវខ្សែក្រវាត់ព្រំដែនកម្ពុជា-វៀតណាម ដែលស្ថាបនាដោយកងកម្លាំងវិស្វកម្ម អគ្គបញ្ជាការ នៃកងយោធពលខេមរភូមិន្ទ លើភូមិសាស្ត្រស្រុកពេជ្រាដា ខេត្តមណ្ឌលគិរី នៅចំណុចផ្លូវពីចំណុចចំការកៅស៊ូ ទៅដល់បង្គោលលេខ ៤៨/១៩ .២០ និងផ្លូវទៅដល់បង្គោលលេខ៤៨/៩ និងផ្លូវទៅដល់បង្គោលលេខ ៤៩/៥ ។

សូមបញ្ជាក់ថា កាលពីថ្ងៃទី២៤ ខែវិច្ឆិកា ឆ្នាំ២០២០ នាយឧត្តមសេនីយ៍ ខ្វាន់ ស៊ាម និងលោកស្រី កុយ ពិសី ក៏បានចុះត្រួតពិនិត្យសំណង់បង្គោលខណ្ឌសីមាព្រំដែន និងការដ្ឋានស្ថាបនាផ្លូវខ្សែក្រវាត់ព្រំដែនកម្ពុជា-ឡាវ លើទឹកដីស្រុកសៀមប៉ាង ខេត្តស្ទឹងត្រែង ដែលស្ថាបនាដោយកងកម្លាំងវិស្វកម្ម អគ្គបញ្ជាការ នៃកងយោធពលខេមរភូមិន្ទផងដែរ៕
ដោយ ៖ កោះកែវ