ព័ត៌មានជាតិ

មន្ត្រីចុះពិនិត្យ វាយតម្លៃផលប៉ះពាល់ ក្រោយទឹកជំនន់ នៅខេត្តបន្ទាយមានជ័យ

បានផុស

៣ years មុន

នៅ

ថ្ងៃព្រហស្បតិ៍ ២៩ តុលា ២០២០

ដោយ

ក្រុមមន្ត្រីពាក់ព័ន្ធក្នុងខេត្តបន្ទាយមានជ័យ បានចុះត្រួតពិនិត្យ វាយតម្លៃផលប៉ះពាល់ និងការខូចខាត ដោយទឹកជំនន់ លើផ្លូវជនបទ ដោយក្នុងនោះ ក៏បានចាប់ផ្ដើមជួសជុលផ្លូវជាបណ្ដើរៗដើម្បីជួយសម្រួលដល់ការធ្វើដំណើរផងដែរ។

លោក ភួង សោភា រដ្ឋលេខាធិការក្រសួងអភិវឌ្ឍន៍ជនបទ បានជំរុញឲ្យក្រុមការងារជួសជុលបន្ទាន់ដើម្បីតភ្ជាប់ សម្រួលចរាចរណ៍ឡើងវិញ ចំណុចភូមិស្វាយស និង ចំណុចដទៃទៀត នៃកំណាត់ផ្លូវជនបទតាផូ ដែលលាតសន្ធឹងក្នុងស្រុកស្វាយចេក និងស្រុកភ្នំស្រុក ។ ផ្លូវនេះមានប្រវែង៣០គីឡូម៉ែត្រ ហើយបានរងការខូចខាត ដោយទឹកជំនន់ កាលពីពាក់កណ្ដាលខែតុលា កន្លងមក និងលំបាកដល់ការអ្នកដំណើរ និងការដឹកជញ្ជូនឆ្លងកាត់ដោយអន្លើៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ភួង សោភា មានប្រសាសន៍ថា យោងការណែនាំរបស់លោកបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានឲ្យលោកដឹកនាំការងារឆ្លើយតបបន្ទាន់លើការសម្រួលចរាចរណ៍ឡើងវិញលើកំណាត់ផ្លូវជនបទ និងហេដ្ឋារចនាសម្ព័ន្ធជនបទដែលរងការខូចខាតដោយទឹកជំនន់ ។

លោក ជា យុទ្ធារុណ ប្រធានមន្ទីរអភិវឌ្ឍន៍ជនបទ ខេត្តបន្ទាយមានជ័យ ប្រាប់សារព័ត៌មានថា គ្រោះទឹកជំនន់ឆ្នាំ២០២០នេះ បង្កឲ្យហេដ្ឋារចនាសម្ព័ន្ធជនបទ នៅខេត្តបន្ទាយមានជ័យ ជាច្រើនបានទទួលរងផលប៉ះពាល់ និងខូចខាត ធ្វើឲ្យប្រជាពលរដ្ឋមិនអាចធ្វើដំណើរ និងដឹកជញ្ជូនបាន។

លោកប្រធានមន្ទីរ បានបន្តថា ទឹកជំនន់ ក្នុងខេត្តបន្ទាយមានជ័យ ពីដើមខែតុលា ឆ្នាំ២០២០ បានបង្កផលប៉ះពាល់ និងខូចខាតច្រើនវិស័យ ខណៈផ្លូវជនបទដែលខូចខាតធ្ងន់ធ្ងរជាងគេ មានដូចជា ផ្លូវបត់ត្រង់ ផ្លូវតាឡំ ផ្លូវចំណោម ផ្លូវសាយសាម៉ន នៅស្រុកមង្គលបូរី ផ្លូវស្រែល្អ នៅស្រុកថ្មពួក ផ្លូវភ្នៀតនៅក្រុងសិរីសោភ័ណ ផ្លូវតាផូ នៅស្រុកស្វាយចេក និងភ្នំស្រុកជាដើម ហើយផ្លូវទាំងនេះ ត្រូវជួសជុលបន្ទាន់ផងដែរ៕

អត្ថបទ ៖ វ៉ាន់ ណាង