ទេសចរ ១៤ ម៉ឺននាក់​ ទៅ​លេង​សៀមរាប កន្លែង​កម្សាន្ត​ថ្មី​ៗ មាន​​ភ្ញៀវ​ទៅ​លេង​ច្រើន – Kampuchea Thmey Daily
Connect with us
ធនាគារ ហត្ថា

ព័ត៌មានជាតិ

ទេសចរ ១៤ ម៉ឺននាក់​ ទៅ​លេង​សៀមរាប កន្លែង​កម្សាន្ត​ថ្មី​ៗ មាន​​ភ្ញៀវ​ទៅ​លេង​ច្រើន

Published

on

សៀមរាប៖ ភ្ញៀវទេសចរណ៍ ដែលបានមកទស្សនា តាមតំបន់រមណីយដ្ឋាននានាក្នុងខេត្តសៀមរាប នាឱកាសថ្ងៃសម្រាកបុណ្យអុំទូកអកអំបុកសំពះព្រះខែ នាឆ្នាំ២០២០នេះមានចំនួនប្រមាណជា១៤ ម៉ឺននាក់។

បើតាមរបាយការណ៍របស់មន្ទីរទេសចរណ៍ខេត្តសៀមរាប បានឲ្យដឹងថា ថ្ងៃសម្រាកក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកឆ្នាំ២០២០នេះ ទោះបីខេត្តសៀមរាប មិនបានប្រារព្ធធ្វើពិធីបុណ្យអុំទូកក៏ពិតមែន តែខេត្តប្រវត្តិសាស្ត្រមួយនេះ សម្បូរទៅ ដោយសម្បត្តិវប្បធម៌ ប្រវត្តិសាស្ត្រ រមណីយដ្ឋានធម្មជាតិភ្នំគូលែន ក្យាលស្ពាន និង បឹងទន្លេសាប ព្រមទាំងមានបង្កើតបានជាច្រើនកន្លែង នៅរមណីយដ្ឋានសហគមន៍ តាមបណ្តាក្រុង ស្រុក រួមទាំងរមណីយដ្ឋានកែច្នៃ ភូមិវប្បធម៌ ដែលបានធ្វើការទាក់ទាញអារម្មណ៍ ភ្ញៀវទេសចរណ៍ជាតិ អន្តរជាតិចូលមកទស្សនាកម្សាន្ត ជាច្រើនផងដែរ។

របាយការណ៍បញ្ជាក់ថា នៅក្នុងថ្ងៃឈប់សម្រាក់ក្នុងព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុកឆ្នាំ២០ ២០នេះ ខេត្តសៀមរាបទទួលភ្ញៀវទេសចរ ដែលមកពីខេត្តក្រុងស្រុក មានចំនួនសរុប ១៤៧ ០៧១នាក់ ក្នុងនោះភ្ញៀវទេចរបរទេសចំនួន ១០៧១នាក់ ថយចុះ៩៣,៣៦% បើប្រៀបធៀបរយៈពេលដូចគ្នាឆ្នាំ២០១៩ មានចំនួន១៦ ១៣៨នាក់ ។ ចំពោះភ្ញៀវជាតិ មានប្រមាណ ចំនួន ១៤៦ ០០០នាក់។ ក្នុងនោះចូលទស្សនាអង្គរ ៧៤ ០០០នាក់ ព្រមទាំងនៅតាមតំបន់រមណីយដ្ឋាន និងសហគមន៍នានាក្នុងខេត្តសៀមរាប មានឧទ្យានជាតិភ្នំគូលែន សហគមន៍ព្រៃទឹកជប់ខ្នារពោធិ៍ សហគមន៍ទេសចរណ៍បាគងភូមិខ្ញុំ សហគមន៍ត្រាវកុដិ ,សហគមន៍បឹងឈូកបន្ទាយស្រី និង រមណីយដ្ឋានភូមិវប្បធម៌កម្ពុជាជាដើម។

ការរៀបចំឲ្យមានរមណីយដ្ឋានកម្សាន្តថ្មីៗ បង្កើតផលិតផលទេសចរណ៍ប្រកបដោយភាពច្នៃប្រឌិត ស្របតាមនិន្នាការ នៃការអភិវឌ្ឍវិស័យទេសចរណ៍ឲ្យមានគុណភាពទាំងសេវាកម្ម និងភាពទាក់ទាញ គឺជាផែនទីបង្ហាញផ្លូវដែលដាក់ចេញដោយក្រសួងទេសចរណ៍ និងគាំទ្រដោយអាជ្ញាធរខេត្តសៀមរាប ផងដែរជាការពិត ដោយសារតែវិបត្តិកូវីដ-១៩ ក្រៅពីប្រាសាទ បានធ្វើឲ្យមានការផ្លាស់ប្តូរចំណង់ចំណូលចិត្តរបស់អ្នកទេសចរ ឲ្យងាកមករកការកម្សាន្តតាមតំបន់ជនបទ សហគមន៍ទេសចរណ៍ តំបន់អេកូ- ទេសចរណ៍ និង តំបន់ធម្មជាតិនានា និងកីឡាជឹះកង់ទេសចរ ដែលនាំឲ្យវិស័យទេស ចរណ៍ជនបទ បានចូលរួមចំណែកទប់ ស្កាត់ការធ្វើចំណាកស្រុក តាមរយៈនៃការបង្កើតការងារ មុខរបរដាំដុះ ចិញ្ចឹម សត្វ អភិរក្សនិងលើកកម្ពស់វប្បធម៌ ទំនៀមទម្លាប់ប្រពៃណី ជាដើម៕

អត្ថបទ៖ កុសល

Advertisement

ចុច Like Facebook កម្ពុជាថ្មី

Advertisement

ព័ត៌មានពេញនិយម