ព័ត៌មានជាតិ

ខែតុលា សមត្ថកិច្ចជំនាញឃាត់រថយន្តដឹកលើសទម្ងន់ជាង ៤ម៉ឺនគ្រឿង

បានផុស

៤ years មុន

នៅ

ថ្ងៃអង្គារ ៣ វិច្ឆិកា ២០២០

ដោយ

ក្នុងខែតុលានេះ សមត្ថកិច្ចជំនាញបានចុះឃាត់រថយន្តដឹកលើសទម្ងន់ ជាង៤ម៉ឺនគ្រឿង ដោយយោងតាមការប្រជុំបូកសរុបការងារ កាលពីថ្ងៃទី២ ខែវិច្ឆិកា ឆ្នាំ២០២០នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សេង ឈួន រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មាធិការសម្របសម្រួលអចិន្ត្រៃយ៍ បានអនុញ្ញាតឲ្យធ្វើការផ្សព្វផ្សាយលើសេចក្តីជូនដំណឹងលេខ ០៤៩ សជណ សក.គតលទ ចុះថ្ងៃទី២៨ ខែតុលា ឆ្នាំ២០២០ ស្តីអំពី ការពង្រឹងវិធានការយ៉ាងតឹងរឹងបន្ថែម ចំពោះយានយន្តដឹកជញ្ជូនធុនធ្ងន់ដែលបើកបរលើបណ្តាញផ្លូវថ្នល់ ដែលនឹងត្រូវអនុវត្តចាប់ពីថ្ងៃទី១៦ ខែវិច្ឆិកា ឆ្នាំ២០២០ តទៅ ក្នុងក្ដីប្រជុំបូកសរុបលទ្ធផលការងារដែលសម្រេចបានក្នុងខែតុលា ឆ្នាំ២០២០។

លោករដ្ឋលេខាធិការ បានណែនាំដល់មន្ត្រីតាមស្ថានីយឲ្យពង្រឹងការអនុវត្តការងារឲ្យបានកាន់តែប្រសើរ និងមានប្រសិទ្ធភាព ប្រកាន់ភ្ជាប់នូវក្រមសីលធម៌ការងារ និងសហការល្អជាមួយដៃគូពាក់ព័ន្ធ។

យោងតាមរបាយការណ៍នៃការអនុវត្តការងារក្នុងខែតុលា ឆ្នាំ២០២០ មានរថយន្តត្រួតពិនិត្យសរុបចំនួន ១៣៩ ៥៧៦ គ្រឿង មានរថយន្តលើសទម្ងន់កម្រិតកំណត់ចំនួន ៤០ ២១១ គ្រឿង ស្មើនឹង ២៨.៨១% ដែលក្នុងនោះ៖

– រថយន្តផ្ទុកលើសទម្ងន់ក្រោម ៥% ចំនួន ៤០ ០១២គ្រឿង ប្រហែល ២៨.៦៧%

– រថយន្តផ្ទុកលើសទម្ងន់ពី ៥% – ១០% ចំនួន ៧គ្រឿង ប្រហែល ០.០១%

– រថយន្តផ្ទុកលើសទម្ងន់ពី ១០% – ២០% ចំនួន ១០៥គ្រឿង ប្រហែល ០.០៨%

– រថយន្តផ្ទុកលើសទម្ងន់លើសពី ២០% ចំនួន ៨៧គ្រឿង ប្រហែល ០.០៦%

ការពិន័យរថយន្តដឹកលើសទម្ងន់សរុបមានចំនួន ១៩៩គ្រឿង ដែលមានទឹកប្រាក់ពិន័យចំនួន ៤៨៦ ៨៤៩ ៥០០រៀល។ ចំនួនរថយន្តដែលចាប់បានមានការថយចុះចំនួន ៣៦គ្រឿង បើប្រៀបធៀបទៅនឹងតួលេខខែកញ្ញា ឆ្នាំ២០២០ ដែលមានចំនួន ២៣៥គ្រឿង។

ជាមួយគ្នានេះ ក្រសួងសាធារណការ និង ដឹកជញ្ជូន សូមអំពាវនាវបងប្អូនម្ចាស់អាជីវកម្ម ម្ចាស់យានយន្តដឹកជញ្ជូនធន់ធ្ងន់ត្រូវអនុវត្ត និងពង្រឹងការអនុវត្តដឹកជញ្ជូនឲ្យបានត្រឹមត្រូវ តាមបទប្បញ្ញត្តិដូចចែងក្នុងមាត្រា៦០ នៃច្បាប់ផ្លូវថ្នល់ និងក្នុងករណីយានយន្តដឹកលើសកម្រិតកំណត់ ២០% ត្រូវធ្វើការដកប័ណ្ណបើកបរ និងព្យួរទុកចំនួន ២ឆ្នាំ ឃាត់យានយន្តទុកចំនួន ១ឆ្នាំ និងបញ្ឈប់អាជីវកម្មមួយឆ្នាំប្រសិនបើនៅតែបន្តបទល្មើស៕

អត្ថបទ៖ រ៉ាវុទ្ធ

សូមចុចអាន៖ អាជ្ញាធរ ដាក់កម្លាំងលាងសំអាតទាំងកណ្តាលយប់ បន្ទាប់ពីមានប្រេងរំអិលកំពប់លើស្ពាន

Related Topics:

Up Next

ព័ត៌មានបឋម ហេដ្ឋារចនាសម្ព័ន្ធខូចខាតប្រមាណ ៦៧០គីឡូម៉ែត្រ

Don't Miss

អាជ្ញាធរ ដាក់កម្លាំងលាងសំអាតទាំងកណ្តាលយប់ បន្ទាប់ពីមានប្រេងរំអិលកំពប់លើស្ពាន