មណ្ឌលចត្ដាឡីស័កធំមួយនៅជាយក្រុងភ្នំពេញ​កំពុង​សាងសង់​ សម្រាប់ដាក់ពលរដ្ឋខ្មែរមកពីក្រៅប្រទេស

​ក្រសួងសុខាភិបាល សហការជាមួយសាលារាជធានីភ្នំពេញ បានសាងសង់មណ្ឌលចត្ដាឡីស័កថ្មីស្រឡាងដ៍ធំមួយដែលមានផ្ទៃដីប្រហែល១ហិកតា ស្ថិតនៅភូមិផ្សារលិច សង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញសម្រាប់ដាក់ពលរដ្ឋខ្មែរវិលត្រឡប់មកពីក្រៅប្រទេសធ្វើចត្តាឡីស័ក១៤ថ្ងៃ។

លោក ស្រីវេជ្ជបណ្ឌិត យក់សម្បត្ដិ រដ្ឋលេខាធិការក្រសួងសុខាភិបាល បានឱ្យដឹងថា មណ្ឌលចត្ដាឡីស័កនេះមាន៤អគារ អាចដាក់បានមនុស្សចំនួន៤៦០នាក់ ដោយចំណាយថវិកាប្រមាណ៧៩ម៉ឺនដុល្លារ ជាថវិការបស់រាជរដ្ឋាភិបាលកម្ពុជា។

លោកស្រីបានបន្តថា ការបង្កើតមណ្ឌលថ្មីនេះ គឺដើម្បីបង្កលក្ខណៈងាយស្រួលក្នុងការគ្រប់គ្រងអ្នកធ្វើចត្តាឡីស័កបានល្អដោយ សារនៅមណ្ឌលនេះ មានគ្រូពេទ្យប្រចាំការនិងបំពាក់សម្ភារមួយចំនួន ព្រមទាំងមានសន្តិសុខយាមកាមរឹងមាំលោកស្រីបានលើកឡើងបន្ថែមថា«មណ្ឌលចត្ដាឡីស័កនេះ សម្រាប់ដាក់អ្នកដំណើរជាពលរដ្ឋខ្មែរ មកពីក្រៅប្រទេសប៉ុណ្ណោះ។ចំណែកជនបរទេស ត្រូវធ្វើនៅតាមសណ្ឋាគារដដែល ខណៈបច្ចុប្បន្នក្រសួងមានមណ្ឌលចតា្ដឡីស័កចំនួន៣ទីតាំង គឺនៅកងទ័ពអាកាស, វិទ្យាល័យ ហ៊ុន សែន បុរី១០០ខ្នង និង អនុវិទ្យាល័យហ៊ុនសែនពោធិ៍ចិនតុង»។

លោកស្រីបានបញ្ជាក់ថា ទៅថ្ងៃអនគាតក្រសួងនឹងមានផែនការពង្រីកអគារចំនួន២ទៀត ដើម្បីដាក់អ្នកចត្ដាឡីស័កឱ្យបាន៨០០នាក់។

លោកស្រីបានឱ្យដឹងទៀតថា មណ្ឌលចត្ដាឡីស័កថ្មីនេះ បានសាងសង់កាលពីខែកញ្ញា ហើយគ្រោងដាក់ឱ្យប្រើប្រាស់នៅចុងខែធ្នូ ឆ្នាំ២០២០ខាងនេះ។

​ក្រៅពីមណ្ឌលចត្តាឡីស័ក ក្រសួងមានទីតាំងព្យាបាលជំងឺកូវីដ១៩ ចំនួន៣ គឺនៅមន្ទីពេទ្យមិត្ដភាព ខ្មែរ-សូវៀតដែលមានបន្ទប់ VIP និងសង្គ្រោះបន្ទាន់, មណ្ឌលសុខភាពចក្រអង្រែ, និងនៅមជ្ឈមណ្ឌលកំចាត់មេរោគរបេង និងហង់សិនដែលមានអគារសង្គ្រោះបន្ទាន់ផងដែរ៕

អត្ថបទ៖ សំអឿន