កីឡា

ក្លឹបព្រះខ័នរាជស្វាយរៀង បន្តកិច្ចសន្យារយៈពេល១ឆ្នាំទៀត ជាមួយកីឡាករជប៉ុន Daisuke Kobayashi

បានផុស

៥ years មុន

នៅ

ថ្ងៃព្រហស្បតិ៍ ២៩ តុលា ២០២០

ដោយ

ក្រោយបញ្ចប់រដូវកាលពានរង្វាន់លីគកំពូលកម្ពុជា Metfone Cambodian League ២០២០ កាលពីពេលថ្មីៗ នៅរសៀលថ្ងៃព្រហស្បតិ៍ ទី២៩ ខែតុលា ឆ្នាំ២០២០ នេះក្រុមបាល់ទាត់ព្រះខ័នរាជស្វាយរៀង បានប្រកាសសម្រេចបន្តកិច្ចសន្យារយៈពេល១រដូវកាលទៀតជាមួយកីឡាករជនជាតិជប៉ុន Daisuke Kobayashi។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Daisuke Kobayashi ស្ថិតក្នុងបញ្ជីកូតាកីឡាករអាស៊ីកីឡាករបរទេសនៅលីគកំពូលកម្ពុជា របស់ក្រុមព្រះខ័នរាជស្វាយរៀង ខណៈគណៈកម្មការប្រកួតបាល់ទាត់ជាតិកម្ពុជា (CNCC) បានកំណត់ថា ក្រុមជាសមាជិកលីគកំពូលកម្ពុជា អាចចុះឈ្មោះកីឡាករបរទេស ក្នុងក្រុមបានចំនួន៥នាក់ តែក្នុងនោះដាច់ខាត ត្រូវមានម្នាក់ជាប្រជាជាតិអាស៊ី។ នេះជាឆ្នាំទី៤ ហើយដែលកីឡាករវ័យ២៨ឆ្នាំរូបនេះ បានបង្ហាញខ្លួននៅលីគកំពូលកម្ពុជា ខណៈគេចូលរួមជាមួយព្រះខ័នរាជស្វាយរៀង តាំងពីឆ្នាំ២០១៨ មកម្ល៉េះ។

កីឡាករមកពីតំបន់Jōetsu នៃខេត្តNiigata ប្រទេសជប៉ុនរូបនេះធ្លាប់លេងឲ្យក្រុមសាកលវិទ្យាល័យHokuriku University នៅស្រុកកំណើត មុនចូលរួមជាមួយក្រុមArtista Asama ក្នុងលីគ Hokushinetsu Football League។ លេងក្នុងទម្រង់បម្រើការពារ Daisuke Kobayashi ធ្លាប់មានបទពិសោធន៍លេងនៅក្លឹបSurathani FC សមាជិកពានរង្វាន់លីគលំដាប់ទី៣របស់ថៃនៅឆ្នាំ២០១៧ ខណៈនៅរដូវកាល២០១៦រូបគេលេងនៅក្លឹប Nakhon Phanom FC សមាជិកពានរង្វាន់លីគលំដាប់ទី៤របស់ថៃ មុនមកដល់ប្រទេសកម្ពុជា។

ចំណាយពេលនៅរដូវកាលឆ្នាំ២០២០ ថ្មីៗនេះជាមួយក្រុមព្រះខ័នរាជស្វាយរៀង កីឡាករ Daisuke Kobayashi រកបានគ្រាប់បាល់ឲ្យក្រុមបាន៦គ្រាប់ម្នាក់ឯងផង។ ជាមួយនឹងការចុះបញ្ជីកីឡាករបរទេសក្នុងក្រុម លោក អោក សំណាង អ្នកចាត់ការទូទៅរបស់ក្រុមនៅខេត្តស្វាយរៀង មួយនេះធ្លាប់បញ្ជាក់ថា កីឡាករបរទេសប្រសិនបើកម្រិតលេងលើទីលាននៅក្រោមកីឡាករខ្មែរនោះក្លឹបមិនចុះកុងត្រានោះទេ ដាច់ខាត ត្រូវតែមានកម្រិតបច្ចេកទេសលើកីឡាករក្នុងស្រុក៕

អត្ថបទ៖ ម៉េង ហួរ

សូមចុចអាន៖ មនត្រស ផានសុវណ្ណអារុន ទទួលលទ្ធផលល្អនៃ Arena Swimming Champions 2020 Thailand