ព័ត៌មានអន្ដរជាតិ

កូវីដ-១៩សម្លាប់ប្រជាជនពិភពលោកឈានដល់៣លាននាក់

បានផុស

៤ years មុន

នៅ

ថ្ងៃអាទិត្យ ១៨ មេសា ២០២១

ដោយ

តួលេខស្លាប់ដោយកូវីដ-១៩ជាសកលបានឈានដល់៣លាននាក់ហើយ។ នេះបើយោងតាមសាកលវិទ្យាល័យ Johns Hopkins University បានចេញផ្សាយនៅថ្ងៃសៅរ៍ ទី១៧ ខែមេសា ម្សិលមិញ។

ស្របពេលកូវីដ-១៩កំពុងវាយប្រហារខ្លាំងជាសកល ប្រទេសទូទាំងពិភពលោកបានកំពុងចាក់វ៉ាក់សាំងដើម្បីទប់ស្តាត់ និងលុបបំបាត់ជំងឺដ៏កាចសាហាវនេះ ប៉ុន្តែនៅមិនទាន់ធូរស្រាលឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចាប់តាំងពីផ្ទុះឡើងនៃការឆ្លងនៅភាគកណ្តាលប្រទេសចិនកាលពីខែធ្នូ ឆ្នាំ២០១៩មក កូវីដ-១៩បានឆ្លងមនុស្សទូទាំងពិភពលោកជាង១៣៩លាននាក់ហើយ ខណៈមនុស្សរាប់ពាន់លាននាក់បានកំពុងស្ថិតនៅក្នុងបំរាមបិទខ្ទប់។

តួលេខស្លាប់កើនឡើងលឿនបំផុតគឺត្រឹម៣ខែចុងក្រោយនេះដែលបានសម្លាប់មនុស្សជាង១លាននាក់គិតចាប់តាំងពីពាក់កណ្តាលខែមករា។

ជាមធ្យមមនុស្ស១២០០០នាក់បានស្លាប់ជាសកលជារៀងរាល់ថ្ងៃកាលពីសប្តាហ៍មុនដែលជំរុញឲ្យតួលេខអ្នកស្លាប់កើនដល់៣លាននាក់កាលពីព្រឹកថ្ងៃសៅរ៍។

បើប្រៀបធៀបជនរងគ្រោះស្លាប់៣លាននាក់នេះគឺច្រើនជាងចំនួនប្រជាជនរបស់ប្រទេសចាម៉ៃកា ឬអាមេនី ហើយច្រើនជាង៣ដងនៃសង្គ្រាមអ៉ីរ៉ង់-អ៉ីរ៉ាក់ពីឆ្នាំ១៩៨០-១៩៨៨។

រហូតដល់ពេលនេះករណីឆ្លងមិនទាន់មានសញ្ញានៃការធ្លាក់ចុះទាបឡើយដែលជាមធ្យមឆ្លងទូទាំងពិភពលោក ៨២៩ ៥៩៦នាក់កាលពីថ្ងៃសុក្រដែលជាចំនួនខ្ពស់បំផុតមិនធ្លាប់មាន។

ទីក្រុងញូវដែលី ប្រទេសឥណ្ឌា ទើបតែចាក់ដាក់បំរាមបិទខ្ទប់នៅចុងសប្តាហ៍នេះ ខណៈប្រទេសមួយនេះបានក្លាយជាប្រទេសរងគ្រោះធ្ងន់ធ្ងរលំដាប់លេខ២ក្នុងពិភពលោកដែលមានករណីឆ្លងថ្មី២៣៤០០០នាក់ និងអ្នកស្លាប់១៣៤១នាក់ នៅថ្ងៃសៅរ៍។

ប្រទេសឥណ្ឌាឥឡូវនេះមានករណីឆ្លងប្រចាំថ្ងៃ៣ដងនៃសហរដ្ឋអាមេរិកដែលទទួលរងធ្ងន់ធ្ងរជាងគេបំផុតលំដាប់លេខ១ក្នុងលោក។ ប្រទេសឥណ្ឌាបានកំពុងប្រឈមនឹងកង្វះគ្រែ បរិក្ខាពេទ្យ និងសូម្បីទីបញ្ចុះសពក៏ចង្អៀតដែរ។

ចំណែក ប្រទេសប្រេស៊ីលដែលធ្ងន់ធ្ងរលំដាប់លេខ២មានសេចក្តីរាយការណ៍ថា តួលេខអ្នកស្លាប់ជិត៣៧០ពាន់នាក់៕

ប្រែសម្រួល៖ វីរបុត្រ
ប្រភព៖ Yahoo

Related Topics:កូវីដ-១៩