WHO ថា អ្នកជំងឺកូវីដចូលសម្រាកនៅមន្ទីរពេទ្យអាយុពី ២៥ ទៅ ៥៩ ឆ្នាំស្ថិតក្នុងអត្រាប្រកាសអាសន្ន

អគ្គនាយកអង្គការសុខភាពពិភពលោក (WHO) បាននិយាយកាលពីថ្ងៃចន្ទថា ករណីឆ្លងថ្មីនៃជំងឺកូវីដ ១៩ នៅតែបន្តកើនឡើងក្នុងសប្តាហ៍ទី ៨ ពោលច្រើនជាង ៥.២ លានករណីក្នុងរយៈពេលមួយសប្តាហ៍ ហើយកំពុងប្រកាសអាសន្ននៃអ្នកជំងឺចូលសម្រាកព្យាបាលនៅមន្ទីរពេទ្យ ក្នុងចំណោមមនុស្សដែលមានអាយុពី ២៥ ទៅ ៥៩ ឆ្នាំនៅទូទាំងពិភពលោក ។

នៅក្នុងសិក្ខាសាលាប្រចាំសប្តាហ៍ក្នុងទីក្រុងហ្សឺណែវលោក Tedros Ghebreyesus បាននិយាយថា “ក្នុងនោះការស្លាប់ក៏បានកើនឡើងផងដែរក្នុងរយៈពេល ៥ សប្តាហ៍ជាប់គ្នា ហើយឥឡូវនេះមានអ្នកស្លាប់ជាង ៣ លាននាក់ហើយត្រូវបានរាយការណ៍ទៅអង្គការសុខភាពពិភពលោក” ។

លោកបាននិយាយថា វាកាន់តែច្រើនឡើងៗហើយ ខណៈកាលពីមុនរយៈពេល ៩ ខែមានអ្នកស្លាប់ ១ លាននាក់ ៤ ខែ ២ លាននាក់ ហើយ ៣ ខែចុងក្រោយនេះឈានដល់ ៣ លាននាក់ ។

លោក Tedros បាននិយាយថា “ការឆ្លង និងការចូលសម្រាកនៅមន្ទីរពេទ្យក្នុងមនុស្សដែលមានអាយុពី ២៥ ទៅ ៥៩ ឆ្នាំកំពុងកើនឡើងក្នុងអត្រាប្រកាសអាសន្ន ហើយវាអាចបណ្តាលមកពីការវិវត្តនៃវ៉ារ្យង់ថ្មីដែលអាចចម្លងបានយ៉ាងរហ័ស និងការបង្កើនការចូលរួមជាសង្គមក្នុងចំណោមមនុស្សវ័យក្មេង” ។

ប្រធានអង្គការសុខភាពពិភពលោករូបនេះបានកត់សម្គាល់ថា បច្ចុប្បន្នជំងឺកូវីដ ១៩ បានសម្លាប់មនុស្សជាង ៣ លាននាក់ហើយ ខណៈសប្តាហ៍នេះនៅថ្ងៃទី ២២ ខែមេសា គឺជា “ទិវាផែនដី” ហើយវាជាការរំឭកថា សុខភាពមនុស្សពឹងផ្អែកទៅលើសុខភាពនៃភពផែនដីដែលទ្រទ្រង់យើង” ។

លោក Tedros បាននិយាយថា ការបំពុលបរិយាកាសបានសម្លាប់មនុស្សច្រើនជាងពីរដងនៃចំនួនដែលត្រូវបានសម្លាប់ដោយវីរុសនេះ ពោល មនុស្ស ៧ លាននាក់បានស្លាប់ក្នុងមួយឆ្នាំ ។

គួរបញ្ជាក់ថា គិតត្រឹមពេលនេះនៅលើពិភពលោកមានករណីឆ្លងជំងឺកូវីដ ១៩ សរុប ១៤២,៧២៤,០៥៣ ករណី និងមានអ្នកស្លាប់ចំនួន ៣,០៤៣,៥៩៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ មេ WHO ចេញមុខប្រកាសហើយថា ពិភពលោកអាចគ្រប់គ្រងកូវីដបានក្នុងរយៈពេលប៉ុន្មានខែខាងមុខ

ចុចអាន ៖ មេ WHO ថា ពេលនេះជំងឺកូវីដ ១៩ កំពុងឈានដល់កម្រិតខ្ពស់បំផុត ក្រោយមានករណីឆ្លងឡើងជិតទ្វេដង