ព័ត៌មានជាតិ

សមត្ថកិច្ចនឹងប្រើរំពាត់វាយពលរដ្ឋណា ដែលផ្គើននឹងបម្រាមនៅតំបន់ក្រហម

បានផុស

៤ years មុន

នៅ

ថ្ងៃពុធ ២១ មេសា ២០២១

ដោយ

លោក វរសេនីយ៍ឯក សាន សុខសីហា អ្នកនាំពាក្យស្នងការដ្ឋានរាជធានីភ្នំពេញបានឲ្យដឹងនៅរសៀលថ្ងៃនេះថា ចាប់ពីពេលនេះទៅសមត្ថកិច្ចកិច្ចនឹងប្រើធម៌ក្តៅចំពោះបងប្អូនប្រជាពលរដ្ឋរស់នៅតំបន់ក្រហម ឬតំបន់ងាយរងគ្រោះណាដែលផ្គើនទៅនឹងបម្រាម និងច្បាប់របស់រាជរដ្ឋាភិបាលក្នុងកំឡុងបិទខ្ទប់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គួរបញ្ជាក់ថា នៅតាមបណ្តាញសង្គមហ្វេសប៊ុក នាពេលថ្មីៗនេះគេសង្កេតឃើញមានសមត្ថកិច្ចនៅតាមដងផ្លូវ បានធ្វើការដេញវាយប្រជាពលរដ្ឋដោយរំពាត់ ដែលមិនគោរពតាមបម្រាមរបស់រដ្ឋាភិបាល និងឃើញសមត្ថកិច្ចដាក់រំពាត់នៅតាមប៉ុស្តិ៍ត្រួតពិនិត្យ និងកាន់ជិះម៉ូតូតាមផ្លូវនានា ដើម្បីវាយពលរដ្ឋដែលចេញក្រៅផ្ទះដោយគ្មានលិខិតអនុញ្ញាតត្រឹមត្រូវពីអាជ្ញាធរ។

លោកវរសេនីយ៍ឯក សាន សុខសីហា បានបន្តថា «សំខាន់បំផុតប្រជាពលរដ្ឋរស់នៅតំបន់ក្រហមនិងងាយរងគ្រោះដែលមានការរាលដាលឆ្លងកូវីដ១៩ យើងត្រូវតែប្រើធម៌ក្តៅដើម្បីចូលរួមបង្ការទប់ស្កាត់ការឆ្លង ប្រសិនបើគាត់នៅតែមិនស្ដាប់ផ្គើននឹងបម្រាម និងច្បាប់របស់រដ្ឋាភិបាលទៀតយើងនឹងអនុវត្តតាមហ្នឹងហើយ»។

លោកបានបន្តទៀតថា វិធានការដែលត្រូវអនុវត្តនោះមានចំនួន៣ គឺទី១យើងនឹងគំញើញគាត់ជាលក្ខណៈដោយវាយនឹងរំពាត់ ដើម្បីឲ្យរាងចាល ទី២ចាប់គាត់ទៅពិន័យអន្តរកាល និងទី៣អាចបញ្ជូនសំណុំរឿងទៅតុលាការតែម្តង។

លោកវរសេនីយ៍ឯក សាន សុខសីហា បានបន្ថែមថា យ៉ាងណាក៏ដោយចំពោះតំបន់ដែលមិនរងនូវហានិភ័យខ្ពស់នៃការឆ្លងជំងឺកូវីដ១៩ទេ សមត្ថកិច្ចនិងអាជ្ញាធរមូលដ្ឋាននៅតាមគោលដៅនៅរាជធានីភ្នំពេញតែងតែយោគយល់ ដោយធ្វើការណែនាំការអប់រំពួកគាត់។ ប៉ុន្តែនៅតែអនុវត្តទៅតាមវិធានការរដ្ឋបាលរបស់រាជរដ្ឋាភិបាល ប្រសិនបើបុគ្គលនោះនៅតែផ្គើននឹងបម្រាមនិងច្បាប់ដែលបានដាក់ចេញ៕

អត្ថបទ ៖ សំអឿន