អេស្ប៉ាញ ជាប្រទេសដំបូងបង្អស់នៅអឺរ៉ុប ចាប់ផ្ដើមចាក់វ៉ាក់សាំងតែមួយដូស Johnson & Johnson

អេស្ប៉ាញ បានក្លាយជាប្រទេសដំបូងបង្អស់នៅទ្វីបអឺរ៉ុប ដែលបានចាប់ផ្តើមចាក់វ៉ាក់សាំងចាក់តែមួយដូសរបស់ក្រុមហ៊ុន Johnson & Johnson កាលពីថ្ងៃព្រហស្បតិ៍ ។

វ៉ាក់សាំងនេះបានស្ថិតនៅក្នុងកន្លែងស្តុកទុកអស់រយៈពេលជាងមួយសប្តាហ៍មកហើយ បន្ទាប់ពីស្ថាប័នត្រួតពិនិត្យរបស់សហរដ្ឋអាមេរិក បានណែនាំឲ្យបញ្ឈប់ការចាក់ ដើម្បីសិក្សាអំពីករណីកំណកឈាមដ៏កម្រ ។

ទន្ទឹមនោះ ទីភ្នាក់ងារឱសថអឺរ៉ុប (EMA) បានផ្តល់ភ្លើងខៀវសម្រាប់ការប្រើប្រាស់វ៉ាក់សាំងនេះកាលពីថ្ងៃអង្គារ ខណៈក្រុមអ្នកជំនាញបានទទួលស្គាល់ថា វាអាចមានទំនាក់ទំនងរវាងករណីកំណកឈាម និងការចាក់វ៉ាក់សាំង Johnson & Johnson គឺជារឿងកម្រកើតឡើងបំផុត ប៉ុន្តែបានទទូចថា អត្ថប្រយោជន៍របស់វ៉ាក់សាំងនេះគឺមានច្រើនជាងហានិភ័យ ។

ប្រទេសអេស្ប៉ាញបានចាប់ផ្តើមចាក់វ៉ាក់សាំងដល់អ្នកដែលមានអាយុពី ៧០-៧៩ ឆ្នាំ ទោះបីជាវ៉ាក់សាំងមិនត្រូវបានអនុម័តសម្រាប់តែក្រុមនោះក៏ដោយ ខណៈមន្រ្តីអេស្ប៉ាញ បានអនុម័តតែវ៉ាក់សាំង AstraZeneca ប៉ុណ្ណោះសម្រាប់អ្នកដែលមានអាយុ ៦០ ឆ្នាំ ។

ស្របពេលជាមួយគ្នានេះ បណ្តាប្រទេសអ៊ឺរ៉ុបផ្សេងទៀតរួមមាន ប្រទេសអាល្លឺម៉ង់ បារាំង ហុល្លង់ និងក្រិក ក៏គ្រោងនឹងចាប់ផ្តើមចាក់វ៉ាក់សាំង Johnson & Johnson នៅប៉ុន្មានថ្ងៃខាងមុខនេះផងដែរ ។

អេស្ប៉ាញ បានទទួលវ៉ាក់សាំង Johnson & Johnson ចំនួន ១៤៦,០០០ ដូស ហើយបានបញ្ជាទិញ ១៧.៦ លានដូសរហូតដល់ត្រីមាសទី ៣ នៃឆ្នាំ ២០២១ ។

គួរបញ្ជាក់ថា គិតត្រឹមពេលនេះប្រទេសអេស្ប៉ាញ មានករណីឆ្លងជំងឺកូវីដ ១៩ សរុប ៣,៤៥៦,៨៨៦ ករណី និងមានអ្នកស្លាប់ចំនួន ៧៧,៤៩៦ នាក់ ហើយមានអ្នកជាសះស្បើយ ៣,១៥៦,៩៥៥ នាក់ ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ វ៉ាក់សាំងចាក់តែមួយដូស Johnson & Johnson មានគុណប្រយោជន៍លើសហានិភ័យប៉ះពាល់

ចុចអាន ៖ ប្រទេសមួយនៅអឺរ៉ុបត្រៀមចាក់វ៉ាក់សាំងតែមួយដូស Johnson & Johnson ដល់ប្រជាជនអាយុ ៧០ ទៅ ៧៩ ឆ្នាំ