ផ្ទុះករណី​ឆ្លង​ដំបូង​នៅ​ខេត្ត​មណ្ឌលគិរី​ ជូន​ស្វាមី​មកព្យាបាលជំងឺ​ ៥ ថ្ងៃក្រោយ​ តេស្ត​​មាន​​កូវីដ ១៩

ស្រ្តី​វ័យ ៥១ ឆ្នាំ នៅខេត្តមណ្ឌលគិរី​​ម្នាក់ ​​​បាន​តេស្តមាន​​វិជ្ជមាន​កូវីដ១៩ ជា​ករណី​ដំបូង​នៅ​ខេត្តមណ្ឌលគិរី ។ ជនរងគ្រោះ​មានឈ្មោះ គិន សម្ភ័ស មាន​លំនៅ​នៅភូមិ​អូរស្ពាន សង្កាត់​ស្ពានមានជ័យ ក្រុង​សែនមនោរម្យ ខេត្តមណ្ឌលគិរី។

តាមប្រវត្ត​មុនពេល​រកឃើញឆ្លងកូវីដ ១៩ ​ស្រ្តី​រងគ្រោះ​ធ្លាប់​បាន​មក​ភ្នំពេញ ដោយ​ជូនស្វាមី​មក​មើលជំងឺ​នៅ​មន្ទីរពេទ្យព្រះកុសុមៈ (ពេទ្យលោកសង្ឃ)។ ការធ្វើដ​ំណើរ​មក​នោះ​ មានអ្នក​រួមដំណើរចំនួន​ ០៥ នាក់។​

នៅថ្ងៃ ១៧ ខែ​មេសា ឆ្នាំ ២០២១ ​បន្ទាប់ពី​សម្រាកព្យាបាល​បាន​ប៉ុន្មានថ្ងៃ ប្តីស្រ្តី​រងគ្រោះ​ត្រូវ​បានរថយន្ត​ពេទ្យ​បញ្ជូនមក​ខេត្តមណ្ឌលគិរីវិញ។

នៅថ្ងៃ ២០ ខែ​មេសា ឆ្នាំ​២០២១ ក្រុមការងារ​ឆ្លើយតប​បន្ទាន់ បាន​ចុះ​មក​យក​សំណាកស្រ្តីឈ្មោះ​គិន សម្ភ័ស និង​ងិន សុភាព។ នៅថ្ងៃ ២២ ខែ​មេសា ២០២១ លទ្ធផល​វិភាគ​បង្ហាញ​ថា​ស្រ្តី​ឈ្មោះ​ គិន សម្ភ័ស មានវិជ្ជមានកូវីដ ១៩ និង​ត្រូវ​ក្រុម​គ្រូពេទ្យ​បញ្ជូនទៅព្យាបាល​មន្ទីរពេទ្យ​បង្អែកខេត្ត៕