តេស្ត​ពលដ្ឋ​​៥២​នាក់ នៅ​តំបន់​ក្រហម​ទាំងយប់ រកឃើញ​ ២៦ នាក់​ឆ្លងកូវីដ ១៩

ភ្នំពេញ៖ គ្រូពេទ្យស្ម័គ្រចិត្តសម្តេចតេជោ បានចុះទៅយកសំណាកដល់អ្នករស់នៅក្នុងតំបន់ក្រហមទាំងកណ្តាលយប់ដែលក្នុងនោះក្នុងចំណោមមនុស្ស៥២នាក់រកឃើញអ្នកវិជ្ជមានរហូតដល់២៦នាក់ទៅហើយ។

តាមសេចក្តីរាយការណ៍ពីលោក សេង វ៉ាន់ថា ចៅរងទី១សង្កាត់ស្ទឹងមានជ័យទី២បានឲ្យកម្ពុជាថ្មីដឹងថា កាលពីវេលាម៉ោង១០និង៤៥នាទីយប់ថ្ងៃទី២៣ខែមេសា ក្រុមគ្រូពេទ្យស្មក្រ័ចិត្តសម្តេចតេជោ បានចុះទៅយកសំណាករបស់ប្រជាពលរដ្ឋដែលរស់នៅជាប់របងវត្តនន្នមុនី ដែលមានទីតាំងក្នុងសង្កាត់ស្ទឹងមានជ័យទី២ខណ្ឌមានជ័យរាជធានីភ្នំពេញដែលជាតំបន់ក្រហម ដោយសារតែអ្នកទាំងនោះមានអាការះមិនស្រួល។

លោកចៅរងបន្តថា អ្វីដែលគួរឲ្យរន្ធត់នោះគឺមនុស្សចំនួន៥២នាក់គឺរកឃើញអ្នកមានវិជ្ជមានរហូតដល់២៦នាក់ក្នុងនោះមានក្មេងអាយុក្រោម១០ឆ្នាំមានចំនួន៨នាក់។ អ្នកផ្ទុកមេរោគកូវីដ១៩មានស្រី មានប្រុសផងដែរ។

លោកសេង វ៉ាន់ថា បានបញ្ជាក់ថានៅក្នុងមូលដ្ឋានសង្កាត់ស្ទឹងមានជ័យ២នេះគឺសាលារាជធានីភ្នំពេញបានកំណត់ជាតំបន់ក្រហម។ក្នុងនោះមានសង្កាត់ស្ទឹងមាន១ ស្ទឹងមានជ័យ២និងស្ទឹងមានជ័យទី៣ក្នុងខណ្ឌមានជ័យរាជធានីភ្នំពេញ៕

អត្ថបទ៖ នរា