ព័ត៌មានអន្ដរជាតិ

ខ្លាចអស់ប្រាក់ ១២៦០ដុល្លារ ពលរដ្ឋនេប៉ាល់ឃុំខ្លួននៅផ្ទះព្យាបាលកូវីដ នាំឲ្យករណីឆ្លងកាន់តែផ្ទុះខ្លាំង

បានផុស

៤ years មុន

នៅ

ថ្ងៃពុធ ១១ វិច្ឆិកា ២០២០

ដោយ

នេប៉ាល់ ប្រកាសផ្តល់ការធ្វើតេស្ត និងព្យាបាលកូវីដ ១៩ ដោយមិនគិតប្រាក់ ក្រោយតួលេខឆ្លងទូទាំងប្រទេសកាន់តែផ្ទុះខ្លាំង ដោយចំនួនសរុបលើស ២សែននាក់។

ការប្រកាសនេះ ធ្វើឡើងដោយជំនួយការនាយករដ្ឋមន្ត្រីប្រទេសនេប៉ាល់ ក្រោយតុលាការកំពូល បានសម្រេចសាលដីកា បញ្ជាឲ្យរដ្ឋាភិបាលត្រូវផ្តល់ការធ្វើតេស្ត និងព្យាបាលមិនគិតប្រាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការសម្រេចរបស់តុលាការ គឺដោយសាររដ្ឋាភិបាលកម្មុយនីស្តប្រទេសនេប៉ាល់ ធ្លាប់បានស្នើពលរដ្ឋអាចនឹងទទួលខុសត្រូវលើការចំណាយប្រាក់សម្រាប់ព្យាបាលកូវីដ ១៩ ខណៈការធ្វើតេស្តមកគិតប្រាក់គឺមានកម្រិត ដោយផ្តោតទៅលើតែពលរដ្ឋគ្មានលទ្ធភាពចំណាយប៉ុណ្ណោះ។

លោក Surya Thapa ជំនួយការនាយករដ្ឋមន្ត្រី K.P. Sharma Oli បានប្រកាសកាលពីថ្ងៃអង្គារ៍ថា គ្រប់មន្ទីរពេទ្យរដ្ឋ នឹងផ្តល់ការធ្វើតេស្ត ព្យាបាលជំងឺកូវីដ ១៩ ដោយមិនគិតប្រាក់នោះឡើយ។ លោកថា ការចំណាយប្រាក់សម្រាប់ព្យាបាល លុះត្រាតែអ្នកជំងឺកូវីដ ១៩ មានបំណងចង់ព្យាបាលនៅតាមមន្ទីរពេទ្យឯកជនប៉ុណ្ណោះ។

មុននេះ នៅពេលរដ្ឋាភិបាលប្រកាសការចំណាយប្រាក់សម្រាប់ធ្វើតេស្ត និងព្យាបាលកូវីដ ១៩ ពលរដ្ឋនេប៉ាល់ជាច្រើន បានសម្រេចចិត្តឃុំ និងព្យាបាលខ្លួនឯងនៅក្នុងផ្ទះ ដើម្បីកាត់បន្ថយការចំណាយសម្រាប់ព្យាបាលប្រមាណ ១៥ម៉ឺនរ៉ូពី ស្មើជាង ១២៦០ ដុល្លារអាមេរិក។

ក្រៅពីប្រទេសឥណ្ឌា នេប៉ាល់ ជាប្រជាជាតិអាស៊ីខាងត្បូងមួយ មានករណីឆ្លងកូវីដ ១៩ ច្រើនជាងគេបង្អស់បើធៀបបណ្តាប្រទេសជិតខាងខ្លួន ខណៈការផ្ទុះរាតត្បាត ត្រូវគេមើលឃើញថា ដោយសារកម្សោយរបស់រដ្ឋាភិបាលក្នុងការគ្រប់គ្រងស្ថានការណ៍ ពិសេសការធ្វើតេស្ត គឺមានកម្រិតនៅឡើយ ក្នុងមួយថ្ងៃ ប្រទេសនេះ អាចធ្វើតេស្តពលរដ្ឋសង្ស័យផ្ទុកកូវីដត្រឹមប្រមាណ ១៥០០០នាក់ប៉ុណ្ណោះ៕

ប្រែសម្រួល៖ សុភា
ប្រភព៖ Reuters

Related Topics:ប្រទេសនេប៉ាល់