ស្ត្រីកើតកូវីដ​នៅប៉ោយប៉ែត សម្រាលកូនបានជោគជ័យ

ស្ត្រីម្នាក់មានវិជ្ជមានជំងឺកូវីដ១៩ នៅក្រុងប៉ោយប៉ែត បានឆ្លងទន្លេបានជោគជ័យ ដោយសារក្រុមគ្រូពេទ្យ​ឆ្មបជួយ​សម្រាលដោយយកចិត្តទុកដាក់នៅវេលា​ម៉ោង ៣ រសៀល ថ្ងៃទី​៣០ ខែមេសា ឆ្នាំ​២០២១ក្នុងមន្ទីរពេទ្យបង្អែក​ប៉ោយប៉ែត ក្រុង​ប៉ោយប៉ែត​ ខេត្ត​បន្ទាយមានជ័យ។

ក្រុមគ្រូពេទ្យជំនាញបានឱ្យដឹងថា ទារកមានទំងន់៣,២ គីឡូ បានកើតដោយជោគជ័យនៅវេលាម៉ោង ៣ រសៀលនេះ ដោយមិនបាច់វះកាត់ ហើយក៏មិនស្ថិតក្នុងស្ថានភាពគ្រោះថ្នាក់ ហានិភ័យនោះទេ។

​លោក​វេជ្ជបណ្ឌិត ឱក ទីណា ប្រធាន​ម​ន្ទីររ​ពេទ្យ​បង្អែក ក្រុង​ប៉ោយប៉ែត បាន​ប្រាប់ អ្នកយកព័ត៍មានឲ្យដឹងថាស្ត្រីសម្រាលកូនដោយជោគជ័យដែលជា​អ្នក​ជំងឺកូ​វីដ​១៩ នោះ​មានឈ្មោះ លឹម អន អាយុ​២៤​ឆ្នាំ ទីលំនៅ​ភូមិ​ក្បាលស្ពាន​១ សងសង្កាតប៉ោយប៉ែតក្រុង​ប៉ោយប៉ែត ខេត្តបន្ទាយមានជ័យ។​

លោក​ ឡេ ច័ន្ទ​សង្វាត ប្រធានមន្ទីរសុខាភិបាលខេត្តបន្ទាយមានជ័យបានឲ្យដឹងថាក្នុងនាម​លោកជា​ថ្នាក់ដឹកនាំ និង គ្រួសារ​​អ្នកជំងឺ ក៏​ដូច​ប្រជាពលរដ្ឋ សូម​សំដែង​នូវ ការគោរព​កោតសរសើរ​ចំពោះ​ការ តាំងចិត្ត ភាព​អង់អាច​ក្លាហានរបស់ក្រុមគ្រូពេទ្យជួរមុខលះបង់ទាំងផ្លូវកាយផ្លូវចិត្ត ក្នុងការ​បម្រើសេវា​សុខភាព និង​សង្គ្រោះ ជូន​ប្រជាពលរដ្ឋរបស់​យើងក្នុងសម័យកើតកូវីដ១៩នេះ៕

អត្ថបទ៖វ៉ាន់ ណាង