ព័ត៌មានជាតិ

CPP សម្រេចផ្ទេរសិទ្ធិឲ្យប្រធានគណៈកម្មាធិការបក្សខេត្តកំពត ដើម្បីសម្រេចលើការចូលរួមបោះឆ្នោតជ្រើសរើសក្រុមប្រឹក្សាក្រុងបូកគោ

បានផុស

៤ years មុន

នៅ

ថ្ងៃអង្គារ ៤ ឧសភា ២០២១

ដោយ

គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា សម្តេចអគ្គមហាសេនាបតីតេជោ ហ៊ុន សែន ប្រធានគណបក្សប្រជាជនកម្ពុជា បានសម្រេចផ្ទេរសិទ្ធិឲ្យប្រធានគណៈកម្មាធិការបក្សខេត្តកំពត ដើម្បីហត្ថលេខា ឬសម្រេចលើការងារផ្សេងៗ ដើម្បីចូលរួមបោះឆ្នោតជ្រើសរើសក្រុមប្រឹក្សាក្រុងបូកគោ ខេត្តកំពត នេះបើយោងតាមលិខិត ដែលទទួលបាននៅថ្ងៃទី០៤ ខែឧសភា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីជូនដំណឹងរបស់លោក ស៊ិក ប៊ុនហុក ចុះថ្ងៃទី០៣ ខែឧសភា ឆ្នាំ២០២១ បានបញ្ជាក់យ៉ាងនេះថា “គណបក្សប្រជាជនកម្ពុជា បានផ្ញើលិខិតមក គ.ជ.ប រួចហើយ ស្តីពីការផ្ទេរសិទ្ធិរបស់ប្រធានគណបកប្រជាជនកម្ពុជា ជូនប្រធានគណៈកម្មាធិការគណបកប្រជាជនកម្ពុជាខេត្តកំពត ឱ្យធ្វើជាតំណាងគណបក្សប្រជាជនកម្ពុជា ក្នុងការចុះហត្ថលេខាលើ ពាក្យសុំចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ” និង “ពាក្យសុំចុះឈោះ្ម ភ្នាក់ងារគណបក្សនយោបាយ ដើម្បីសង្កេតមើលការបោះឆ្នោត និងការរាប់សន្លឹកឆ្នោត” (តាមទម្រង់បែបបទ ដែលបានកំណត់ដោយ គ.ជ.ប) សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សា ក្រុងបូកគោ នៃខេត្តកំពត ឆ្នាំ២០២១”។

សូមបញ្ជាក់ថា ការសម្រេចរបស់គ.ជ.ប ក្នុងការផ្ទេរសិទ្ធិខាងលើនេះ ធ្វើឡើងដោយយោងតាមច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត (គ.ជ.ប) និងច្បាប់ស្តីពីការបោះឆ្នោតជ្រើសរើសក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ និងច្បាប់ស្ដីពីវិសោធនកម្មនៃច្បាប់នេះ និងលិខិតរបស់គណបក្សប្រជាជនកម្ពុជា ចុះថ្ងៃទី២៧ ខែមេសា ឆ្នាំ២០២១។

សម្រាប់ការបោះឆ្នោតលើកទី១ ដើម្បីជ្រើសរើសក្រុមប្រឹក្សាក្រុងបូកគោ នៃខេត្តកំពត នឹងប្រព្រឹត្តទៅនៅថ្ងៃអាទិត្យ ទី២៥ ខែកក្កដា ឆ្នាំ២០២១ ខាងមុខ ហើយគ្រប់គណបក្សនយោបាយ ដែលបានចុះបញ្ជីត្រឹមត្រូវស្របតាមច្បាប់ស្តីពីគណបក្សនយោបាយនៅក្រសួងមហាផ្ទៃ មានសិទ្ធិចុះបញ្ជីគណបក្សនយោបាយឈរឈ្មោះបោះឆ្នោត និងបញ្ជីបេក្ខជនឈរឈ្មោះ បោះឆ្នោតនេះ៕

ដោយ ៖ កោះកែវ