កូវីដ-១៩

ចុះយកសំណាក៥នាក់ និងបិទឱសថស្ថាន១កន្លែងបណ្ដោះអាសន្នក្រោយពាក់ព័ន្ធអ្នកវិជ្ជមានកូវីដ-១៩

បានផុស

៤ years មុន

នៅ

ថ្ងៃព្រហស្បតិ៍ ៦ ឧសភា ២០២១

ដោយ

អាជ្ញាធរនិងក្រុមគ្រូពេទ្យជំនាញបានចុះយកសំណាកមនុស្ស៥នាក់នៅក្នុងឱសថស្ថាន ពេជ្រ ចិន្តាក្នុងស្រុកភ្នំព្រឹកដែលពាក់ព័ន្ធនឹងបុរសអ្នកបើកបរដឹកថ្នាំពេទ្យម្នាក់ពីក្រុមហ៊ុន ដឹកដាក់ឲ្យម៉ូយមានវិជ្ជមានកូវីដ-១៩មកពីខេត្តសៀមរាប។

ការចុះយកសំណាកលើមនុស្សទាំង៥នាក់ខាងលើនេះ លោក សុង សុភ័ក្ដ្រ អភិបាលស្រុកភ្នំព្រឹក និងជាប្រធានគណៈកម្មាធិការទប់ស្កាត់ជំងឺកូវីដ-១៩ កាលពីថ្ងៃទី០៥ ខែឧសភា ឆ្នាំ២០២១នេះ បានចាត់ឲ្យក្រុមការងារ និងក្រុមគ្រូពេទ្យចុះយកសំណាកបុគ្គលិករួមទាំងសមាជិកអ្នកផ្ទះនៅក្នុងឱសថស្ថាន ពេជ្រ ចិន្តា ដែលស្ថិតនៅភូមិភ្នំតូច ឃុំពេជ្រចិន្តា ស្រុកភ្នំព្រឹក ខេត្តបាត់ដំបងសរុបទាំងអស់ចំនួន០៥នាក់ ហើយបានតម្រូវឲ្យធ្វើចត្តាឡីស័កបន្តនៅផ្ទះតាមវិធានការសុខាភិបាល ព្រមទាំងបានបិទទីតាំងឱសថស្ថានខាងលើនេះជាបណ្តោះអាសន្ន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុង សុភ័ក្ដ្រ បានលើកឡើងថា ការយកសំណាកបុគ្គលិកឱសថស្ថានពេជ្រចិន្តា ដោយសារមានជាប់ពាក់ព័ន្ធជាមួយនឹងបុរសជាអ្នកបើកបររថយន្តដឹកថ្នាំពេទ្យមកពីក្រុមហ៊ុនម្នាក់ ដែលបាននាំយកថ្នាំពេទ្យមកប្រគល់ឲ្យ ហើយអ្នកបើកបរនេះបានបើករថយន្តដាក់ថ្នាំឲ្យម៉ូយតាំងពីខេត្តសៀមរាប បន្ទាយមានជ័យ និងឆ្លងកាត់តាមតំបន់ព្រំដែនខេត្តបាត់ដំបងមួយចំនួនរហូតដល់ខេត្តប៉ៃលិនទើបក្រុមគ្រូពេទ្យពិនិត្យតេស្តសំណាកលទ្ធផលវិជ្ជមានជំងឺកូវីដ-១៩តែម្តង រួចនាំខ្លួនទៅមណ្ឌលព្យាបាលភ្លាមៗផងដែរ។

ក្នុងករណីខាងលើចំពោះអ្នកពាក់ព័ន្ធដោយផ្ទាល់និងប្រយោល រដ្ឋបាលស្រុកភ្នំព្រឹកសូមអំពាវនាវដល់បងប្អូនប្រជាពលរដ្ឋក្នុងមូលដ្ឋានទាំងអស់ ប្រសិនបើដឹងថាខ្លួនមានជាប់ពាក់ព័ន្ធជាមួយនឹងបុរសអ្នកដឹកថ្នាំពេទ្យនេះ សូមទៅពិនិត្យសុខភាពនិងផ្តល់វត្ថុសំណាករកមេរោគកូវីដ-១៩ជាបន្ទាន់ជៀសវាងឆ្លងរីករាលធ្ងន់ធ្ងរដល់សហគមន៍ផ្សេងៗ៕

អត្ថបទ ៖ សៅ សារិទ្ធ