សពអ្នកស្លាប់ដោយសារកូវីដកាន់តែច្រើន ត្រូវបានដឹកទាំងឡានៗ យកទៅទម្លាក់ពីលើស្ពានចូលទន្លេ​ គង្គា

សាកសពបន្ថែមទៀតហើយ ត្រូវបានគេឃើញអណ្តែតនៅក្រោមស្ពានមួយក្បែរព្រំប្រទល់រវាងរដ្ឋ Uttar Pradesh និង Bihar។ នេះជាសោកនាដកម្មមួយដែលកំពុងកើនឡើង ចំពេលមានវិបត្តិជំងឺកូវីដ-១៩។

ក្រុមមន្រ្តីនៅរដ្ឋ Bihar បាននិយាយថា សាកសពដែលអណ្តែតមកទើរលើច្រាំងទន្លេគង្គាក្នុងទីក្រុង Buxar កាលពីម្សិលមិញគឺមានចំនួន៧១នាក់ ហើយពួកគេបានស្តីបន្ទោសទៅរដ្ឋ Uttar Pradesh ចំពោះករណីនេះ។

រូបភាពនៃសាកសពដែលគេអះអាងថា បោះចោលពីលើស្ពានដោយអ្នកបើកឡានពេទ្យ ត្រូវបានគេចែកចាយពាសពេញបណ្តាញសង្គម ខណៈមនុស្សជាច្រើនបានបង្ហាញការភ្ញាក់ផ្អើលនិងអាណិតអាសូរចំពោះជនរងគ្រោះដោយសារជំងឺកូវីដ-១៩ និងក្រុមគ្រួសាររបស់ពួកគេ។

សមាជិកសភាគណបក្ស BJP របស់រដ្ឋ Bihar ឈ្មោះ Janardhan Singh Sigriwal បានចោទប្រកាន់ថា សាកសពជនរងគ្រោះកូវីដ កំពុងត្រូវបានក្រុមអ្នកបើកឡានពេទ្យ ដឹកទាំងឡានៗយកមកទម្លាក់ចូលក្នុងទឹកទន្លេពីលើស្ពាន Jaiprabha Setu ស្ថិតនៅក្នុងស្រុក Saran នៃខេត្ត Bihar ជិតព្រំប្រទល់រដ្ឋ Uttar Pradesh។

លោក Sigriwal និយាយថា លោកបានជំរុញឲ្យរដ្ឋបាលស្រុក Saran ត្រូវធានាថា អ្នកបើកឡានពេទ្យ មិនត្រូវបោះចោលសាកសពនៅទីនោះទៀតទេ។

គួរបញ្ជាក់ថា បើយោងតាមតួលេខដែលចេញផ្សាយដោយក្រសួងសុខាភិបាលកាលពីថ្ងៃអង្គារបានបង្ហាញថា ប្រទេសឥណ្ឌា បានកត់ត្រាការឆ្លងជំងឺកូវីដ-១៩ថ្មីចំនួន ៣២៩,៩៤២ករណី ដែលនាំឲ្យចំនួនសរុបកើនដល់ ២២,៩៩២,៥១៧ករណី។

ប្រទេសនេះក៏បានរាយការណ៍ពីការស្លាប់ចំនួន ៣.៨៧៦នាក់ផងដែរ កាលពីថ្ងៃអង្គារ ដោយនាំឲ្យចំនួនអ្នកស្លាប់សរុបកើនដល់ ២៤៩,៩៩២នាក់៕

ប្រែសម្រួលដោយ៖ Vann Vann

ប្រភព៖ NDTV

ចុចអាន៖ ព្រះអើយ! គ្មានឈើបូជា សាច់ញាតិជនរងគ្រោះដោយសារកូវីដ បោះសពចូលទន្លេគង្គា អណ្តែតត្រៀបត្រា