មួយខែ​នេះ ឃាត់ខ្លួនមនុស្ស​ជិត ២០០០​នាក់ ​ល្មើស​បម្រាមគោចរនិងបម្រាម​បិទខ្ទប់

ភ្នំពេញ៖ នៅក្នុងរយៈពេល១ខែនេះ សមត្ថកិច្ចឃាត់ខ្លួនមនុស្សជិត ២០០០នាក់ ដែលបានល្មើសបម្រាមគោចររបស់រដ្ឋបាលរាជធានីភ្នំពេញ និងបម្រាមបិទខ្ទប់របស់រាជរដ្ឋាភិបាល។

លោកវរសេនីយ៍ឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញ បានឲ្យដឹងនៅព្រឹកថ្ងៃ​ទី​១៥​ឧសភា​នេះថា ចាប់ពីថ្ងៃទី១៥ខែមេសា រហូតមកដល់ព្រឹកថ្ងៃទី១៥ខែឧសភានេះ សមត្ថកិច្ចបានធ្វើការឃាត់ខ្លួនប្រជាពលរដ្ឋ ដែលបានល្មើសនឹងបម្រាមគោចរនិងបម្រាមបិទខ្ទប់របស់រាជរដ្ឋាភិបាលចំនួន១៨៧៨នាក់ ក្នុងនោះតុលាការឃុំខ្លួនចំនួន១១នាក់ កំពុងសាកសួរនៅតុលាការ​ចំនួន៣នាក់ ណែនាំអប់រំឲ្យវិលត្រឡប់ទៅលំនៅដ្ឋានវិញចំនួន ១២៣៨​នាក់ បញ្ជួនទៅធ្វើចត្តាឡីស័កចំនួន២៨៩នាក់ ធ្វើការពិន័យអន្តរកាលចំនួន៣៣៣នាក់ និងបញ្ជួនទៅព្យាបាលជំងឺកូវីដ ១៩ចំនួន៤នាក់។

អ្នកនាំពាក្យរូបនេះបានឱ្យដឹងថា ចំនួនមនុស្សដែលសមត្ថកិច្ចឃាត់ខ្លួននេះ ចែកជាពីរដំណាក់កាល។ ទី១ការបិទខ្ទប់របស់រាជរដ្ឋាភិបាលនៅរាជធានីភ្នំពេញ និងក្រុងតាខ្មៅខេត្តកណ្តាល ចាប់ពីថ្ងៃទី១៥ខែមេសារហូតដល់ថ្ងៃទី៥ឧសភានិងដំណាក់កាលទី២ ចាប់ពីថ្ងៃទី៦ខែឧសភារហូតដល់ថ្ងៃទី១៥ខែឧសភា ដែលសាលារាជធានីភ្នំពេញបានបន្តអនុវត្តបម្រាមគោចរចាប់ពីម៉ោង៨យប់រហូត ដល់ម៉ោង៣ទៀបភ្លឺ។

លោកបានបន្ថែមថា សមត្ថកិច្ចនៅតែបន្តអនុវត្តល្បាតតាមតំបន់ក្រហម តំបន់លឿងទុំ និងតំបន់លឿងជាប្រចាំ​ពិសេសអនុវត្ត​បម្រាមគោចរពេលយប់ ពីម៉ោង៨យប់ដល់ម៉ោង៣ទៀបភ្លឺ តាមបញ្ជាយ៉ាងម៉ឺងម៉ាត់របស់លោក ស ថេត ស្នងការរាជធានីភ្នំពេញ។ ក្នុងនោះមានការចល័តកងកម្លាំងសមត្ថកិច្ចរាល់យប់ នៅគ្រប់ខណ្ឌដែលដឹកនាំដោយស្នងការរង ដើម្បីត្រួតពិនិត្យការអនុវត្តបម្រាមគោលចរនេះ។

អ្នកនាំពាក្យស្នងការរាជធានី ក៏អំពាវនាវឱ្យប្រជាពលរដ្ឋចូលរួមអនុវត្តតាមការណែនាំរបស់រដ្ឋបាលរាជធានីភ្នំពេញ ឱ្យបានខ្ជាប់ខ្ជួនចៀសវាងការផាកពិន័យ ក្នុងពេលដែលសមត្ថកិច្ចចុះល្បាតគ្រប់កន្លែង៕

អត្ថបទ៖ សំអឿន