ព័ត៌មានជាតិ

ព័ត៌មានបន្ថែមពីករណី បញ្ចប់តួនាទីនាយរងរដ្ឋបាលក្រុងច្បារមន មកជាមន្ត្រីធម្មតា

បានផុស

៤ years មុន

នៅ

ថ្ងៃសុក្រ ២១ ឧសភា ២០២១

ដោយ

កំពង់ស្ពឺ ៖ លោក ឡាក់ ប៊ុនធីម នាយករង រដ្ឋបាលក្រុងច្បារមន ទទួលបន្ទុកប្រធានសណ្តាប់ធ្នាប់ផ្សារកំពង់ស្ពឺ ត្រូវបានអភិបាលក្រុងសម្រេចបញ្ចប់មុខតំណែងមកត្រឹមជាមន្ត្រីធម្មតាបន្ទាប់ប្រព្រឹត្តកំហុសទាត់កញ្ច្រែងព្រីងរបស់ក្មេងស្រីម្នាក់បណ្តាលឱ្យកំពប់លើដី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅរសៀល ថ្ងៃទី២១ ខែឧសភា ឆ្នាំ២០២១នេះ លោក ហុក ម៉ារ៉ាឌី អភិបាលក្រុងច្បារមន បានចេញដីកាបញ្ចប់មុខតំណែងលោក ឡាក់ ប៊ុនធីម ពីនាយករង រដ្ឋបាលក្រុងច្បារមនមកត្រឹមជាមន្ត្រីរដ្ឋសាលាក្រុងធម្មតា។

លោក វ៉ី សំណាង អភិបាលខេត្តកំពង់ស្ពឺ បានលើកឡើងថា ក្នុងនាមថ្នាក់ដឹកនាំខេត្ត មិនគាំទ្រចំពោះទង្វើរបស់មន្ត្រី ដែលយកតួនាទីភារកិច្ចទៅអនុវត្តខុសវិជ្ជាជីវៈ ខុសក្រមសីលធម៌ រហូតធ្វើឲ្យប្រជាពលរដ្ឋស្លូតត្រង់ស្រក់ទឹកភ្នែកនោះឡើយ។

ក្នុងន័យនេះ លោក វ៉ី សំណាង បាមអំពាវនាវយ៉ាងទទូចដល់ពុកម៉ែមាមីងបងប្អូនទាំងអស់ដែលប្រកបរបររកទទួលទាន សូមមេត្តាស្ដាប់តាមការណែនាំរបស់អាជ្ញាធរ ដើម្បីធ្វើយ៉ាងណាយើងអាចរក្សាបាននូវសណ្ដាប់ធ្នាប់សាធារណៈដែលបង្កឡើងដោយភាពអាណាធិបតេយ្យរបស់បងប្អូនយើងមួយចំនួនតូច។

សូមរម្លឹកថា នៅថ្ងៃទី១៩ ខែឧសភា ឆ្នាំ២០២១ កន្លងទៅនេះ លោក ឡាក់ ប៊ុនធីម មានតួនាទីជានាយករង រដ្ឋបាលក្រុងច្បារមន ទទួលបន្ទុករៀបចំសណ្តាប់ធ្នាប់ផ្សារកំពង់ស្ពឺ បានបង្ករការប៉ះពាល់ដល់ក្មេងស្រីម្នាក់ដែលលក់ព្រីង និងខ្នុរត្រង់ចំណុចជិតគល់ស្ពានថ្មចាស់បណ្តាលឲ្យរងការខួចខាត ។ ក្រោយពីកើតហេតុមានការរិះគន់យ៉ាងខ្លាំងតាមបណ្តាញទំនាក់ទំនងសង្គមនានារហូតថ្នាក់ដឹកនាំខេត្តកំពង់ស្ពឺបញ្ជាឱ្យចុះស្រាវជ្រាវជុំវិញរឿងនេះ។

លុះនៅថ្ងៃទី២០ ខែឧសភា ឆ្នាំ២០២១ លោក វ៉ី សំណាង អភិបាលខេត្តកំពង់ស្ពឺ បានឃើញមហាជនហ្វេសប៊ុកព្រោងព្រាតអំពីបញ្ហារឿងសន្តិសុខផ្សារកំពង់ស្ពឺ បានទាត់កញ្ច្រែងក្មួយស្រីលក់ព្រីង បណ្ដាលឱ្យកំពប់ទៅលើដីលោកក៏មានការសោកស្ដាយយ៉ាងខ្លាំង ចំពោះទង្វើអសីលធម៌បែបនេះ។

ក្នុងនាមក្រុមប្រឹក្សាខេត្ត គណៈអភិបាលខេត្ត និងខ្លួនលោកផ្ទាល់បានសូមអភ័យទោសចំពោះទង្វើដែលមិនគប្បីរបស់សន្តិសុខផ្សារកំពង់ស្ពឺ ដែលបានប្រព្រឹត្តបែបនេះ។

លោក វ៉ី សំណាង ក៏បានសំណូមពរយ៉ាងទទូចដល់បងប្អូនអាជីវករក៏ដូចជាប្រជាពលរដ្ឋទាំងអស់សូមមេត្តារក្សាឲ្យបាននូវសណ្ដាប់ធ្នាប់សាធារណៈដោយជៀសវាងគិតតែប្រយោជន៍ខ្លួន ភ្លេចអំពីផលប៉ះពាល់ដល់ប្រយោជន៍អ្នកដទៃ ដែលគាត់ត្រូវការប្រើប្រាស់ផ្លូវ។ បើទោះជាយ៉ាងណាក៏ដោយទង្វើអសីលធម៌របស់សន្តិសុខផ្សារកំពង់ស្ពឺបែបនេះគឺមិនអាចលើកលែងបានឡើយ។

សូមរម្លឹកថា លោក ឡាក់ ប៊ុនធីម នាយករង រដ្ឋបាលក្រុងច្បារមន ជាប្រធានសណ្តាប់ធ្នាប់ផ្សារកំពង់ស្ពឺ ធ្លាប់មានរឿងអាស្រូវច្រើន។ កាលពីអំឡុងឆ្នាំ២០១៩ លោក ឡាក់ ប៊ុនធីម ផឹកស្រាស្រវឹងបើករថយន្តបុកអ្នកលក់ជើងមាន់បង្កការភ្ញាក់ផ្អើលយ៉ាងខ្លាំង និងការប្រើប្រាស់ពាក្យសម្តីឈ្លើយហួសហេតុជាមួយក្រុមអាជីវករលក់ដូរផងដែរ៕

ដោយ ៖ ភួង រដ្ឋា