អាជីវកម្ម ៨ ប្រភេទ ទោះ​បី​នៅ​តំបន់លឿង​ក៏​មិនទាន់​ឲ្យ​បើក​ដំណើរការ​វិញ​ដែរ

រដ្ឋាភិបាលរាជធានី​ភ្នំពេញ បានចេញសេចក្ដីសម្រេចបិទបញ្ចប់បំរាមគោចរ និងការអនុញ្ញាតគោលការណ៍ពិសេស ចំពោះអាជីវកម្មដ្ឋានមួយចំនួនក្នុង «តំបន់លឿង» នៃភូមិសាស្ដ្ររាជធានីភ្នំពេញ គិតចាប់ពីម៉ោងសូន្យថ្ងៃទី២២ ខែឧសភា ឆ្នាំ២០២១នេះតទៅ អាច​ដំណើរការ​ជា​ធម្មតា​ឡើង​វិញ​បាន។

យ៉ាងណាមិញ នៅក្នុងសេចក្តីសម្រេចបានបញ្ជាក់យ៉ាងច្បាស់ថា អាជីវកម្ម​មួយ​ចំនួន​ក្រៅពី​ភោជនីយដ្ឋាន និងប្រភេទ​អាហារដ្ឋានគឺ​នៅ​បន្តហាមឃាត់ដដែល។

សេចក្ដីសម្រេចបានបញ្ជាក់​ថា មណ្ឌល​កម្សាន្ត (ខារ៉ាអូខេ រង្គសាល ឌីស្កូតែត) អាជីវកម្មម៉ាស្សា កាស៊ីណូ រោងភាពយន្ត រោងសម្តែងសិល្បៈ សារមន្ទីរ ក្លឹបហាត់ប្រាណ និងមជ្ឈមណ្ឌលកីឡា ព្រមទាំងអាជីវកម្ម-សេវាកម្មផ្សេងទៀត ដែលមិនទាន់មានគោលការណ៍អនុញ្ញាតឲ្យបើកដំណើរការឡើងវិញ នៅ​បន្ត​ហាមឃាត់ដដែល។

​«សកម្មភាពការងារ មុខរបរ និងអាជីវកម្មក្លឹបកម្សាន្តគ្រប់ប្រភេទ ជាអាទិ៍ ខារ៉ាអូខេ រង្គសាល ឌីស្កូតែក និងបៀហ្គាឌិន អាជីវកម្មម៉ាស្សា កាស៊ីណូ រោងភាពយន្ត រោងសម្តែងសិល្បៈ សារមន្ទីរ ក្លឹបហាត់ប្រាណ និងមជ្ឈមណ្ឌលកីឡា ព្រមទាំងអាជីវកម្ម-សេវាកម្មផ្សេងទៀត ត្រូវបន្តផ្អាកដំណើរការជាបណ្តោះអាសន្ន រហូតដល់មានការសម្រេចជាថ្មី។

អាជីវកម្ម​ដែល​អនុញ្ញាតឱ្យបើកដំណើរការ ក៏​ត្រូវអនុវត្តវិធានការសុវត្ថិភាពផ្នែកសុខាភិបាលឱ្យបានម៉ឺងម៉ាត់​មាន​ជាអាទិ៍ កាតព្វកិច្ចពាក់ម៉ាស កាតព្វកិច្ចរក្សាគម្លាតសុវត្ថិភាព ការធ្វើអនាម័យដើម្បីសម្លាប់មេរោគ ការវាស់កម្ដៅ ការស្កេន QR Code និងត្រូវអនុវត្តតាមការណែនាំរបស់ក្រសួងសុខាភិបាល៕