នារីខ្មែរ២នាក់ និងបុរសប៉ាគីស្ថានម្នាក់ត្រូវបានម្ចាស់រថយន្តទម្លាក់ចោលនៅភ្នំឆ័ត្រ បន្ទាយមានជ័យ

ខេត្តបន្ទាយមានជ័យ៖ ស្រ្តី២នាក់ និងបុរសម្នាក់ ត្រូវបាន​ម្ចាស់រថយន្តដឹកយកមក​ទម្លាក់ចោល ក្រោយពេល​​មាន​បំណងធ្វើ​ដំណើរទៅថៃ​តែ​មិនបាន​សម្រេច។

លោកអធិការនគរបាលស្រុកស្វាយចេក ដែលឈរជើងនៅគោលដៅតេជោភ្នំឆ័ត្រ សហការជាមួយប្រជាការពារមណ្ឌលតេជោភ្នំឆ័ត្របានចុះឃាត់ខ្លួនបុគ្គលទាំង៣ខាងលើ នៅវេលាម៉ោង១១យប់ ថ្ងៃទី២២ ខែឧសភា ឆ្នាំ២០២១។

លោកអធិការនគរបាលស្រុកស្វាយចេកបានប្រាប់អ្នកយកព័ត៌មានថា បុរស និងស្ត្រី៣នាក់ ទី១ឈ្មោះ ថា ប៊ុនហ្គិច ភេទស្រីអាយុ២០ឆ្នាំ រស់នៅភូមិចំព្រេចគយ ឃុំព្រែកគយ ស្រុកស្អាង ខេត្តកណ្តល។ ទី២ ឈ្មោះ ថា ប៊ុនសៀកទៀង ភេទស្រីអាយុ១៨ឆ្នាំ នៅភូមិឃុំជាមួយគ្នា និងទី៣ឈ្មោះ មហា ម៉ាត់អៃយ៉ាស់ ភេទប្រុស អាយុ៤៥ឆ្នាំ ជនជាតិប៉ាគីស្ថាន។

លោកអធិការនគរបាលស្រុកស្វាយចេក បានប្រាប់អ្នកយកព័ត៌មានដឹងបន្តថា តាមចំលើយបុរស ស្រ្តីនោះមាននិយាយថា ទាំង៣នាក់បានចេញមកពីភ្នំពេញចង់ចេញទៅប្រទេសថៃ លុះជិះឡានមកដេកនៅសៀមរាបបាន១យប់ ហើយជិះឡានបន្តយកដេកនៅខេត្តបន្ទាយមានជ័យ១យប់ ដោយសារពិបាកក្នុងការធ្វើដំណើរទៅស្រុកថៃខ្លាំងពេក ក៏ចង់វិលប្រឡប់មកភ្នំពេញ។ ពេលនោះមានឡាន១គ្រឿងធានាថាដឹកទៅភ្នំពេញ ដោយសារខ្លួនទាំង៣មិនស្គាល់ភូមិសាស្ត្រត្រូវអ្នកបើករថយន្តយកមកទំលាក់ចោលនៅផ្ទះលោក ចាប វណ្ណី ដែលគ្មានម្ចាស់នៅ លុះព្រឹកឡើងទើបសមត្ថកិច្ចឃាត់ខ្លួនតែម្តង។

លោកអធិការបានបញ្ជាក់ឲ្យដឹងទៀតថា ក្រោយពីសួរនាំធ្វើកំណត់ហេតុរួច ជនទាំង៣រូបនោះត្រូវបានបញ្ជូនទៅច្រកអូរបីជាន់ ដើម្បីបញ្ជូនទៅមណ្ឌលចត្តាឡីស័កឱ្យគ្រប់ចំនួន១៤ថ្ងៃសិន ទើបឱ្យវិញត្រឡប់ទៅផ្ទះវិញ៕

អត្ថបទ៖ វ៉ាន់ ណាង