កម្ពុជាកត់ត្រា កំណើត​កូន​ផ្សោត​ ១ ក្បាល​​ទៀត នៅអាងទន្លេមេគង្ក​កាំពី ខេត្តក្រចេះ

កូនសត្វផ្សោតទន្លេមេគង្គទើបនឹងកើតថ្មីមួយក្បាលទៀត ត្រូវបានអ្នកវិទ្យាសាស្ត្រកត់ត្រាទុកជាមួយក្តីរំភើបរីករាយឥតឧបមា។

ក្រុមអ្នកជំនាញផ្នែកស្រាវជ្រាវសត្វផ្សោតទន្លេមេគង្គនៃរដ្ឋបាលជលផលនិងអង្គការ WWF បានបញ្ជាក់ពីកំណើតនៃកូនផ្សោតថ្មីមួយក្បាលនេះជាកូនផ្សោតទីបួន ដែលត្រូវបានកត់ត្រាចាប់ពី ខែមករា ដល់ ខែឧសភាឆ្នាំ២០២១នេះ។ ក្រុមអ្នកជំនាញបានសន្មត់ថា កូនផ្សោតនេះមានអាយុប្រហែលពីរថ្ងៃ ក្រោយពេលដែលក្រុមស្រាវជ្រាវបានប្រទះឃើញវានៅថ្ងៃទី២១ ខែឧសភា ខណៈកូនផ្សោតនេះកំពុងហែលជាមួយសត្វផ្សោតពេញវ័យចំនួនដប់ក្បាលផ្សេងទៀតនៅក្នុងតំបន់អន្លង់សត្វផ្សោតកាំពី នៃខេត្តក្រចេះ។

យោងតាមលទ្ធផលជំរឿនសត្វផ្សោតទន្លេមេគង្គក្នុងឆ្នាំ២០២០ របស់រដ្ឋបាលជលផល និងអង្គការWWF បានបង្ហាញថា មានសត្វផ្សោតចំនួនត្រឹមតែ ៨៩ក្បាលប៉ុណ្ណោះ ដែលកំពុងរស់នៅក្នុងទន្លេមេគង្គកម្ពុជា។ សត្វផ្សោតអ៊ីរ៉ាវ៉ាឌី​(Irrawaddy) ឬសត្វផ្សោតទន្លេមេគង្គ គឺជាសត្វផ្សោតទឹកសាបមួយប្រភេទ ក្នុងចំណោមសត្វផ្សោតទឹកសាបសរុបតែចំនួន៧ប្រភេទគត់នៅក្នុងពិភពលោក។

បច្ចុប្បន្ន ថនិកសត្វមួយនេះ ត្រូវបានរកឃើញមានវត្តមានច្រើនជាងគេតែនៅក្នុងទន្លេមេគង្គកម្ពុជា ទន្លេក្នុងប្រទេសមីយ៉ាន់ម៉ា ទន្លេក្នុងប្រទេសឥណ្ឌូនេស៊ី បឹងមួយក្នុងប្រទេសថៃ និងឥណ្ឌាប៉ុណ្ណោះ។ ប៉ុន្តែចំនួននៃវត្តមាននេះ ត្រូវបានអង្គការសហភាពអន្តរជាតិដើម្បីអភិរក្សធនធានធម្មជាតិ ហៅកាត់ថា IUCN ចាត់ថ្នាក់ក្នុងបញ្ជីក្រហម ជាប្រភេទជិតផុតពូជ៕