តាកែវបង្ហាញអត្តសញ្ញាណអ្នកឆ្លងជំងឺកូវីដ-១៩ថ្មីចំនួន ៣៣ នាក់

ស្នងការនគរបាលខេត្តតាកែវបានឲ្យដឹងថា តាកែវបានបន្តរកឃើញអ្នកឆ្លងជំងឺកូវីដ-១៩ថ្មីចំនួន ៣៣ នាក់បន្ថែមទៀត ក្នុងនោះមានស្រី ១៨ នាក់ នៅថ្ងៃទី២៩ ខែឧសភា ឆ្នាំ២០២១។

បើតាមលោក ឧត្តមសេនីយ៍ទោល សុខ សំណាង ស្នងការនគរបាលខេត្តតាកែវបានឲ្យដឹងនៅក្នុងរបាយការណ៍ចុះថ្ងៃទី៣០ ឧសភានេះថា ក្នុងចំណោមអ្នករកឃើញថ្មីចំនួន ៣៣ នាក់ ក្នុងនោះនៅស្រុកត្រាំកក់ចំនួន ១៤ នាក់ ស្រី ៩ នាក់ ស្រុកព្រៃកប្បាសចំនួន ៨ នាក់ ស្រី ៤ នាក់ ស្រុកដូនកែវចំនួន ៥ នាក់ ស្រី ១ នាក់ ស្រុកសំរោងចំនួន ៤ នាក់ ស្រី ២ នាក់ ស្រុកបាទី​ចំនួន ១នាក់ស្រី និងស្រុកទ្រាំង ចំនួន ១ នាក់ស្រី។

លោក វេជ្ជបណ្ឌិត នុត ស៊ីណាត ប្រធានមន្ទីរសុខាភិបាលខេត្តតាកែវបានឲ្យដឹងថា ករណីឆ្លងជំងឺកូវីដ-១៩នៅខេត្តតាកែវភាគច្រើនជាកម្មករ កម្មការិនីបម្រើការនៅតាមរោងចក្រ ពិសេសរោងចក្រសាន់បូដែលមានកម្មករឆ្លងរាប់រាយនាក់។

លោកប្រធានមន្ទីរបានអំពាវនាវដល់ប្រជាពលរដ្ឋក៏ដូចជាកម្មករ កម្មការិនីត្រូវអនុវត្តការធ្វើចត្តាឡីស័កឲ្យបានខ្ជាប់ខ្ជួនជាទីបំផុតតាមការណែនាំរបស់ក្រសួងសុខាភិបាលដូចជា ពាក់ម៉ាស រក្សាគម្លាត និងលាងដៃឱ្យបានញឹកញាប់ ពិសេសកុំប្រឡែងគ្នាដើម្បីការពារការឆ្លងជំងឺកូវីដ-១៩ពីបុគ្គលម្នាក់ទៅបុគ្គលម្នាក់ទៀត ក្នុងអំឡុងពេលធ្វើចត្តាឡីស័កនេះ។

លោកប្រធានមន្ទីរបានបន្ថែមទៀតថា ចំពោះអ្នកដែលមានជាប់ពាក់ព័ន្ធផ្ទាល់ជាមួយអ្នកជំងឺកូវីដ-១៩ត្រូវរួសរាន់ទៅធ្វើតេស្តឱ្យបានឆាប់បំផុត ដើម្បីដឹងលទ្ធផលធ្វើការព្យាបាលឱ្យបានទាន់ពេលវេលា និងធ្វើត្តាឡីស័កឱ្យបានត្រឹមត្រូវហាមប៉ះពាល់ជាមួយអ្នកដទៃជាដាច់ខាត៕

អត្ថបទ៖ សំអឿន

ចុចអាន៖ អ្នកដំណើរចាក់វ៉ាក់សាំងរួចហើយចូលមកកម្ពុជានៅតែតម្រូវឱ្យធ្វើតេស្តនិងចត្តាឡីស័ក​១៤ថ្ងៃ

ចុចអាន៖ ខេត្តស្វាយរៀងមានអ្នកជំងឺ កូវីដចំនួន៨២០នាក់ និងជាសះស្បើយ៣៧៨នាក់