ជប៉ុន ពិចារណាឲ្យអ្នកគាំទ្រក្នុងប្រទេសចូលទស្សនាការប្រកួតកីឡាអូឡាំពិក តែហាមស្រែកអបអរសាទរ

កាសែតជប៉ុន Yomiuri Shimbun បានរាយការណ៍ថា រដ្ឋាភិបាលជប៉ុនកំពុងពិចារណា អនុញ្ញាតឲ្យអ្នកគាំទ្រជប៉ុន ចូលរួមទស្សនាព្រឹត្តិការណ៍អូឡាំពិក និងប៉ារ៉ាឡាំពិក ប្រសិនបើពួកគេផ្តល់ភស្តុតាងនៃការចាក់វ៉ាក់សាំង ឬលទ្ធផលតេស្តអវិជ្ជមានជំងឺកូវីដ ១៩ ។

ការធ្វើតេស្តរកជំងឺកូវីដ ១៩ នឹងត្រូវធ្វើ មិនឲ្យលឿនជាងមួយសប្តាហ៍នោះទេ មុនពេលចូលរួមទស្សនាព្រឹត្តិការណ៍អូឡាំពិក ។ អ្នកគាំទ្រមិនត្រូវបានអនុញ្ញាតឲ្យស្រែកអបអរសាទរនោះទេ ហើយតម្រូវឲ្យពាក់ម៉ាស់ និងពិនិត្យសីតុណ្ហភាព ។

កាសែត Yomiuri Shimbun បាននិយាយថា ការសម្រេចចិត្តចុងក្រោយ ស្តីពីថាតើត្រូវអនុញ្ញាតឲ្យអ្នកគាំទ្រជប៉ុន ចូលទស្សនានៅព្រឹត្តិការណ៍កីឡាអូឡាំពិកទីក្រុងតូក្យូ នឹងត្រូវបានធ្វើឡើងនៅខែមិថុនា ឬក៏យ៉ាងណានោះទេ ។

ព្រឹត្តិការណ៍កីឡាអូឡាំពិករដូវក្តៅនៅទីក្រុងតូក្យូ ត្រូវបានគ្រោងទុកជាដំបូងនៅឆ្នាំ ២០២០ ប៉ុន្តែត្រូវបានពន្យារពេលនៅនិទាឃរដូវឆ្នាំមុន ដោយសារតែការរីករាលដាលនៃជំងឺឆ្លងកូវីដ ១៩ ។ ចំណែកការប្រកួតកីឡានៅរដូវក្ដៅឆ្នាំនេះវិញ នឹងធ្វើឡើងចាប់ពីថ្ងៃទី ២៣ ខែកក្កដា រហូតដល់ថ្ងៃទី ៨ ខែសីហា ។

ដោយសារតែជំងឺកូវីដ ១៩ រដ្ឋាភិបាលជប៉ុន បានសម្រេចរៀបចំព្រឹត្តិការណ៍កីឡាអូឡាំពិក និងប៉ារ៉ាឡាំពិកនៅទីក្រុងតូក្យូ ដោយគ្មានអ្នកទស្សនាបរទេសឡើយ ។

ទន្ទឹមនោះ ចំនួនប្រជាជនកាន់តែច្រើន ក៏បានអំពាវនាវឲ្យបន្តលុបចោល ការប្រកួតកីឡាអូឡាំពិកដោយសារការព្រួយបារម្ភពីការគំរាមកំហែង ដែលទាក់ទងនឹងជំងឺរាតត្បាត ដល់សុវត្ថិភាពសាធារណៈ និងភាពតានតឹងលើប្រព័ន្ធសុខាភិបាលរបស់ប្រទេស ដែលកំពុងប្រឈមនឹងការកើនឡើងនៃករណីឆ្លងថ្មី នៃជំងឺកូវីដ ១៩ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ ជប៉ុន ពិចារណាផ្ដល់វ៉ាក់សាំងការពារកូវីដដល់ តៃវ៉ាន់ ដែលទើបចាក់បាន ១ ភាគរយប៉ុណ្ណោះដល់ប្រជាជនខ្លួន

ចុចអាន ៖ ជប៉ុន ត្រៀមប្រើប្រាស់វ៉ាក់សាំង AstraZeneca ហើយនឹងចេញថ្លៃព្យាបាល បើមានករណីដុំកំណកឈាមលើអ្នកចាក់