ព័ត៌មានជាតិ

ខែឧសភា កម្ពុជាទទួលបានភ្ញៀវទេសចរជាង ១៩ម៉ឺននាក់

បានផុស

៣ years មុន

នៅ

ថ្ងៃអង្គារ ១ មិថុនា ២០២១

ដោយ

ក្រសួងទេសចរណ៍បានឲ្យដឹងថា ខែឧសភា ឆ្នាំ២០២១នេះ នៅទូទៅប្រទេសកម្ពុជាទទួលបានភ្ញៀវទេសចរសរុបចំនួន១៩៤,០២៥ នាក់ ក្នុងនោះមានភ្ញៀវជាតិ១៩១,៨២០ នាក់ និងភ្ញៀវបរទេសផ្ទៃក្នុង២,២០៥ នាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាយការណ៍ពីក្រសួងទេសចរណ៍បានបង្ហាញថា សប្តាហទី១ មានភ្ញៀវប្រមាណ ១៩,៧០៥ នាក់, សប្តាហទី២ ភ្ញៀវប្រមាណ ៤៩,៨៨០ នាក់, សប្តាហទី៣ ភ្ញៀវប្រមាណ ៥២,៨៩១ នាក់, សប្តាហទី៤ ភ្ញៀវប្រមាណ ៧១,៥៤៩ នាក់។ គោលដៅទេសចរណ៍សំខាន់ៗ ដែលមានសកម្មភាពទេសចរណ៍ច្រើនជាងគេ ក្នុងខែឧសភានេះ រួមមាន៖ ខេត្តកំពត មានចំនួន ៣៨,៨១៧ នាក់, ខេត្តបាត់ដំបង មានចំនួន ២៦,៨៤០ នាក់, ខេត្តកែប មានចំនួន ២៣,០០៤នាក់, ខេត្តសៀមរាប មានចំនួន ១៨,៧៥៧ នាក់, ខេត្តកំពង់ស្ពឺ មានចំនួន ១៦,១៨៧ នាក់ និងខេត្តព្រះសីហនុ មានចំនួន១២,១៦០នាក់។

លោក ថោង ខុន រដ្ឋមន្ត្រីក្រសួងទេសចរណ៍បានឲ្យដឹងដែរថា ចំនួនភ្ញៀវទេសចរនេះមានការកើនឡើងប្រមាណ ៦៩៦.៣៣ ភាគរយ បើធៀបនឹងខែមេសា ដោយសារក្នុងខែមេសា រាជរដ្ឋាភិបាលបានផ្អាកដំណើរការរមណីយដ្ឋានទេសចរណ៍ទូទាំងបរទេសជាបណ្តោះអាសន្ន រយៈពេលជាងពីរសប្តាហ៍ ចាប់ពីថ្ងៃទី០៧-២៥។

សូមបញ្ជាក់ថា រមណីយដ្ឋានគោលដៅទេសចរណ៍ និងមូលដ្ឋានអាជីវកម្មទេសចរណ៍ បានចាប់ផ្តើមបើកដំណើរឡើងវិញជាបណ្តើរៗ ចាប់ពីរាជរដ្ឋាភិបាលបានបើកដំណើរការរមណីយដ្ឋានទេសចរណ៍ឡើងវិញរហូតដល់ដំណាច់ចុងខែឧសភានេះ ដោយបានអនុវត្តយ៉ាងហ្មត់ចត់តាមវិធានការ “៣ កុំ” និង “៣ ការពារ” រួមជាមួយវិធានសុវត្ថិភាពទេសចរណ៍ក្នុងការទប់ស្កាត់ជំងឺកូវីដ-១៩៕

អត្ថបទ៖ កោះកែវ