ប្រជាជនប្រេស៊ីល គោះចានឆ្នាំង ធ្វើបាតុកម្មប្រឆាំង ប្រធានាធិបតី (មានវីដេអូ)

បាតុកម្មគោះចានឆ្នាំង បានផ្ទុះឡើងនៅតាមទីក្រុងជាច្រើនក្នុងប្រទេសប្រេស៊ីល កាលពីល្ងាចថ្ងៃពុធខណៈពេលលោកប្រធានាធិបតី Jair Bolsonaro បានថ្លែងទៅកាន់ជនរួមជាតិ។ 

បាតុកម្មនេះបានកើតឡើងត្រឹមតែប៉ុន្មានថ្ងៃប៉ុណ្ណោះ បន្ទាប់ពីក្រុមបាតុករបានចេញតវ៉ានៅតាមដងផ្លូវទូទាំងប្រទេស ជុំវិញការដោះស្រាយរបស់លោកចំពោះការឆ្លងរាលដាលនៃវីរុសកូវីដ-១៩ ដែលបានសម្លាប់មនុស្សជិតកន្លះលាននាក់ក្នុងប្រទេសប្រេស៊ីល។

យោងតាមទិន្នន័យរបស់រដ្ឋាភិបាលបានឲ្យដឹងថា ត្រឹមមួយថ្ងៃពុធ ប្រជាជនប្រេស៊ីលជិត១០ម៉ឺននាក់ បានឆ្លងវីរុសកូវីដ-១៩ ហើយមនុស្ស២,៥០៧នាក់បានស្លាប់។

កាលពីថ្ងៃសៅរ៍ មនុស្សរាប់ពាន់នាក់ បានចូលរួមក្នុងការតវ៉ានៅទីក្រុងយ៉ាងតិច១៦ ទូទាំងប្រទេស។ បាតុកម្មទាំងនោះ ត្រូវបានរៀបចំឡើងដោយគណបក្សនយោបាយឆ្វេងនិយម សហជីពនិងសមាគមនិស្សិត។

នៅ Sao Paulo ដែលជាទីក្រុងធំបំផុតរបស់ប្រេស៊ីល, មនុស្សពាក់ម៉ាស់រាប់ពាន់នាក់ បានបិទផ្លូវធំមួយ ហើយមានបង្ហោះប៉េងប៉ោងដ៏ធំដែលបង្ហាញរូបលោក Bolsonaro ជាបិសាចជញ្ជក់ឈាម។

ក្នុងសុន្ទរកថាខ្លីកាលពីល្ងាចថ្ងៃពុធ លោក Bolsonaro បាននិយាយថា ប្រជាជនប្រេស៊ីលទាំងអស់ដែលចង់ចាក់វ៉ាក់សាំង នឹងអាចទទួលបានវ៉ាក់សាំងមួយដូសនៅត្រឹមចុងឆ្នាំនេះ៕

វីដេអូ៖ 

ប្រែសម្រួល៖ Vann Vann

ប្រភព៖ Reuters

ចុចអាន៖ មនុស្ស​រាប់​ពាន់​នាក់​តវ៉ា​ឲ្យ​ចោទ​ប្រធានា​ធិបតី​ប្រេស៊ីល​ជុំ​វិញ​ការ​ទប់​ស្កាត់​កូវីដ-១៩